Galue malosi mo aoga a le fanau

DF
By Deidre Fanene, 22 February 2018

O le taugata o pili aoga ale fanau ua tauau ina fati ai nisi o aiga e fa’aauau a’oa’oga.

O le popolega lea mai le tinā ia Sose Filipo, mai le afioaga o Satapuala-uta.

“Ia te a’u lava ia ua ou saili isi auala ina ia mafai ai ona maua mai le seleni e totogi ai pili aoga o le fanau,” o lana saunoaga lea i le Fofoga o Samoa i le aso ananafi.

“O la’u tama teine o lo’o a’otauina i le Iunivesite Aoao o Samoa, ma e fai lava si tauagata o tau o mataupu.

“Ae tusa lava po’o le a le taugata, o le tiute o le matua o le ave lea o le fanau i le aiga.”

Sa fa’atalanoa e le Fofoga o Samoa Sose ina ua tau atu ai o lo’o toso mai lana uili paelo o lo’o tumu i aufa’i

E leai se mea e mafai ona taofia lenei tināmai le galue malosi ina ia maua se lumana’i manuia o lana fanau.

“Sa ola mai lava i le mativa, ma ou te le mana’o la e ola ane la’u fanau i lena olaga.

“Tusa lava po’o le a le matitiva i fea e fai lava mea uma ma le loto ina ia maua mai se seleni e fesoasoani i le fanau ma a latou aoga.

“O le latou lumana’i lea, afai ae fa’aauau pea latou aoga ma fa’ai’uina ma le manuia e talitonu le loto o le a lelei ni galuega latou te mauaina ma o le manuia foi lena o aiga aemaise matua.

“O le malosiaga lea olo’o tuleia lenei tinā ina ia galue malosi auā aoga a le fanau.

“O le ki lea o le olaga manuia o le fanau, ae o nai isi aiga ua le gafatia ona ave latou fanau i aoga ma o le iuga lava o le ola falōlō ma le pologa e pei o matua.

“Ae le faitio ai fo’i i nai nei aiga , ona ua fai lava si tauaga o pili aoga ale fanau.”

ADVERTISEMENT

Sa ta’ua e Sose, o le ola mativa o se lu’itau lea, ae mo nai aiga tau atia’e o se fa’amama avega pe ana fa’apea e tu’utu’u i lalo le tau o pili aoga.

“Sa tatou feola ane lava i se olaga mativa ma o le mafuaaga lea e le’i i’u ai fo’i aoga, ae tatou le alo ese mai la i lenei olaga e talitonu o le a fa’aauau e fanau.

“E tatau i le malo ona fai ni polokalame mo nai aiga e le lava le tamaoaiga ma latou totogiina pili aoga o le fanau.

“E tatau ona latou fa’amuamua aoga a le fanau ona o lea e faimai o le fanau o le lumana’i lea o aiga, nu’u ma atunuu.”

Mo Sose o lana tama teine lea ua mafai ona a’otauina i le iunivesite aoaoa o Samoa.

Ma o le alagatupe e maua ai le pili aoga a lenei tinā o le fa’atauina atu lea o chips.

O le tama o le aiga e sikulati ma o lona totogi e $200 i le vaiaso.

“Ae ui i lea e le taitai lava le faasoa.

“E tusa ai ma le tau o le soifuaga ou te talitonu o le itu lena e patino i le mao.

“Ua o’o lava i taumafa ua le gafatia, pau taumafa ia e gafatia o taumafa e maua mai i faleoloa o Saina ona e taugofie.”

O lesi avega mamafa a lenei tinā o le leai lea ose suavai.

“Pau le taimi e ola mai ai o le po, on ape lea i le aso atoa.

“O le isi lea avega mamafa, ae pule lava le malo ia i le latou suavai.

“O le galuega la e fai o le fa’atutumu o kalone vai i le po ina ia pe mai i le taeao ae ua lava ma totoe le suavai e fai ai feau o le aso.

“O se olaga faigata ae e talitonu e sili atu isi mea e tatau ona popole i ai e pei o aoga a le fanau nai lo le popole i le suavai.”

DF
By Deidre Fanene, 22 February 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?