Ia manuia aiga
E afea e le Fofoga o Samoa i le aso ananafi le tamā i a Tuaiaiga Suavai, 58 le matua o le soifua o Levi Sale’imoa o lo’o faia se galuega tu’ufa’atasi a le aiga aua le teuteuina o lumāfale ma nisi o vaega aua lava le alo atu i aso fiafia.
“Ia e pei ona outou tau mai nei, ia o lo’o ua galulue taulele’a o si o matou aiga mo le valiina o le pa aemaise o nai faleo’o nei e mapu mai ai le to’atele i so’o se taimi.
“O se fiafiaga tele lea mo si o matou aiga, pe a o’o i aso fa’ailogaina ia e omai uma ai lava e pulupululima fa’atasi mo le fa’atinoina o galuega nei.
“O lo’u ia iloa i ai ia e leai lava se isi vaega e pito sili ona taua i so’o se aiga Samoa pe a nonofo ma galulue uma aua le lelei alu i luma o le aiga.
“O si o matou aiga i’inei ia o le masani lava lea, e omai uma fanau , o tama’ita’i, tinā, taulele’a e o’o lava i le au tino matutua e tapena si o matou fanua.
“Ia o le fa’aosofiaga lea i so’o se itu matou te galulue ai, ma o lo’u ia iloa ia e leai lava se isi mea e sili atu nai lo le taumafai e aumai fa’atasi aiga i lenei vaitau.
“E pei fo’i la ona outou tau mai, ia e leai ma se isi o nofonofo o lo’o tau fai galulue uma lava.
Na ia fa’ailoa o lea fo’i le una’i o lo latou aiga i le to’atele o fanau o lo’o tuputupu a’e.
“I a te a’u ia o lea lava vaega taua o lenei fa’amoemoe, ia aua ne’i gata ai , a matutua ane fo’i fanau ia latou te iloa fo’i ona omai fa’atasi ma punoua’i i so’o se galuega mo aiga.
“O le iloa ai e fanau o vaega nei, aemaise o galuega e pulupululima uma ai, ia e le taumateina o le a feola ane fo’i i latou iloa lelei vaega e ao ona o latou fa’atinoina.
“O lo’u ia iloa i ai, ia e leai lava se isi itu olo’o va’ava’ai atu ai i le lumana’i, ia o le finafinau lava i mea lelei aua le atina’eina o aiga ma afioaga ta’itasi.
“O le olaga o le Samoa ia e leai lava se isi mea na o le fiafia lava, ia o lea fo’i ua i ai lenei vaitau o aso fiafia ia o le mea taua o le maua ai e Samoa atoa o se Kirisimasi Fiafia ma se Tausaga Fou manuia.