Fa’alagolago i le sami
O le tamā i a Sapati Togatuki, 33 le matua o le soifua mai le afio’aga o Nofoalii Uta o loo feagai ia ma le tausiaiga.
O le alagatupe a lea tamā e maua mai i le sami.
E toaiva le fanau a Sapati ma o ia ma lona toalua ma le la fanau o loo nonofo i uta ae o loo ia tausia foi si ona tinā matua i tai i le aai.
E maua atu e le Fofga o Samoa lea tamā o loo faga mai lana vao i luma o lo latou fale i le mutinitini o le la.
O le finagalo fa’aalia a le tamā o le vaitau lenei ua fai lava sina faigata.
“E toaiva le ma fanau ma si o’u toalua ae leai sesi o maua e faigaluega o le sami lava lea e maua ai alagatupe ma tausi ai le fanau aemaise si o’u tinā matua e nofo lava ia I le matou fale I le aai ae o maua ma si o’u toalua ma le ma fanau matou te nonofo I uta nei.
“E na’o po lava ou te alu ai ou te lama ma e le’o po uma foi ou te alu ai ou te lama.
“E na’o aso lua I le aso faraile ou te alu ai ou te lama.
“O aso Faraile uma lava ua uma ona faatonu mai ai le oka a le Farmer Joe ma o iina foi la e fua ai I’a o lo’u faiva.
“A lelei lava le faiva e ova ma le $400 la’u tupe e maua i le vaiaso.”
Na fa’ailoa mai e Sapati o lana tupe lea e tausi ai si ona toalua ma le la fanau, ma tausi ai si ona tinā ma fai ai latou mea faalelotu ma faalenuu.
“I taimi o a’e aoga e maua loa le tupe fa’atau loa le taga araisa ma le pusamoa e faasoasoa i lunch a si au fanau i le vaiaso.
“E lelei lena e sefe mai ai le tupe ia o lesi vaega e faatau ai le suka ma le masima ma fai ai mea faalelotu ma mea faalenuu.
“E oo atu lava i le isi vaiaso o loo i ai lava le seleni pe a faasoasoa lelei lava.
“O le taimi la lenei o lea e faaputuputu le tupe auā aoga a le fanau pe a toe a’e.
“E totogi ai pili ma faatau ai ofu aoga ma mea lava e manaomia e si au fanau i le aoga.
“O lenei vaitau e fai lava si taugata o le soifuaga.”
Sa ia fa’aalia foi lona agaga fiafia ona o le faamama avega o loo maua mai i faleoloa a le au Saina.
“Ua laki lava faleoloa o nai Saina ia e maua ai oloa paū ae o le tele foi o ia oloa paū e le umi lava e vave leaga foi ia a’o lea lava e faamama avega nai tagata ia.
“A’o le tele o tatou tagata ia e fai latou pisinisi ua sue lava le polofiti a le tagata fai pisinisi ia ae le vaai ma se alofa i nai tagata lima vaivai.
“E iai foi lesi polokalame fou lea o le a amatalia i le tausaga fou o le a fua kilo le tele o oloa ia a fika atu ai e telē atu le kilo i le pauna ia manaia sina faamama avega mo i tatou foi.
“Ae o loo sologa lelei lava mea uma isi matou nuu nei.
“O le soifuaga foi ia o loo lelei lava o le tagata lava ia e ala ai ona safa ae tusa lava poo le a le galuega e maua a tinoū lava I ai e manuia lava mea uma.”