Manatu o le Fa’atonu - O se laasaga talafeagai mo le tineia o sauaga tau fana

15 January 2016

Tusia - Mata’afa Keni Lesa

Faaliliu e Seagaitumua Tupuola

 

E ese ai mai le afaina tau le si’osi’omaga o le lafoa’ina lea o faava’a o fana ua nuti i le moana loloto, e tatau ona tatou aloa’ia taumafaiga a Leoleo ma latou paaga ina avea Samoa ma atunuu saogalemu. 

O se galuega lea e tatau ona faalauiloa ma faafetai e tagata taito’atasi. 

O lea matou te talanoa atu e uiga i le laasaga talu ai nei o se finauga ina ia matua tineia sauaga tau fana i totonu  o Samoa, lea na vaaia ai le sili atu i lo le 500 fana na matua nuti lili’i, ma la’u atu i luga o se vaa o Leoleo, ma lafoa’i i le moana sausau i le Aso Lulu.

O ia ‘auupega-e solitulafono ma e le’i resitalaina na aoina mai e avea ma vaega o se polokalame a Leoleo e lua masina e faamagalo ai ia laau malosi, ua laumanu’ia e avea ma taumafaiga na matua faamanuiaina.  “O le sini autu o lo matou faamoemoe ia faaitiitia faalavelave faafuase’i e ala i sauaga tau fana i totonu o lo tatou atunuu,” o le faaaliga lea a le Komesina o Leoleo o fuiavailili Egona Keil. 

Ia, talu ai ona ua faatama’ia o le sili atu i lo le 500 fana, o se matua laasaga maoa’e lea, o se laasaga lea e tatau ona tatou matua faafetaia. 

I lenei la taimi-e taua ona manatua le muagagana e faapea o i latou  e ola i le pelu, e oti foi i le pelu. I totonu o se atunuu e pei o Samoa lea e tatau ona fo’ia ai feeseesea’iga ma feteenaiga e ala i le talanoa, ava fatafata ma le alofa, o loo i ai se manaoga mo soo se fana. Ae peitai-e le o le tulaga lena o loo i ai ma o le toatele lava o i tatou –ua tatou iloa lea tulaga. Poo le a lava, ae o le faamagaloina o ia fana ua toe faamaonia ai le aofa’i o fana-e aofia ai fana aupito i malolosi ma fana solitulafono- o loo maua iinei. 

O le itu la lenei; atonu e talafeagai ona faapea atu o le aofai o fana na faatama’ia e Leoleo i lenei vaiaso-ua na o se vaega lea o le faafitauli. O le pogai lea e popole ai le mafaufau. 

ADVERTISEMENT

Tama’ita’i e ma alii, o le taunuuga o le i ai o fana i totonu o le atunuu ua loa ona avea ma tulaga faigata. I le tele o tausaga, sa tatou vaaia le anoano o maliu e le talafeagai ai i le salafa o le atunuu talu ai faalavelave e aafia ai fana poo laau malosi. Mo se atunuu itiiti ma se faitau aofa’i e sili atu teisi i le 180,00 tagata, o fuainumera faamaumauina e tau faamata’u. Ae peitai-o lena tulaga ua faaalia ai le lautele o le faafitauli.

I Samoa nei, ua tatou iloa e faapea o fana e matua faigofie lava ona maua. Ona o lea tulaga-e te vaaia tagata o feoa’i solo i luga o tafā-ala ma fana e peiseai e leai se afaina. Ua ou iloa lena tulaga i le tele o taimi, o ia laau malosi e fuafua mo le fasiga o povi fafine ma povi.  Ae peitai- o le vaaia o alii faasausau o feoa’i solo ma fana i luga o latou tau’au o se vaaiga lea e le tauga-malie. Ua matou fai atu faapena ona o ni mafuaga se lua.

Muamua, o le toatele lava o tagata e faaaogaina fana i lenei atunuu e leai ma so latou aoaoina aloa’ia e uiga i le saogalemu tau fana. E pau lava le mea latou te iloa o le ta’i o le fana ma oomi le amoti.

E faamanatu atu i tagata uma lava iinei ma le taimi nei e faapea o fana o ni mea mata’utia. E le o ni mea taalo. O lona luga, aisea ua faatagaina ai tagata e savavali faataamilo i nuu ma faalalā solo nei ‘auupega mata’utia e peiseai o se mea noa? O lona uiga e lei faalogo lava se tasi o lenei atunuu i upu faalavelave faafuase’i? O Faalavelave faafuase’i e tutupu mai lea taimi i lea taimi. O le faafitauli a Samoa e faapea ua tutupu so’o tele ia faalavelave.  

Talu ai ona e tutupu nei faalavelave, o lona taunuuga o le maumau ai o soifua taua.

Ma o le aano moni lena o le mataupu. Faamata e tutupu nei faalavelave faafuase’i pe ana matua leai lava ni fana? 

O le Aso Lulu na taofia ai e le Komesina o Fuiavailili le tele o auupega malolosi e aofia ai ma se AK 47 lea e tutusa ma fana ia na faaaoga i le osofaiga faatupu faalavelave i totonu o Pale talu ai nei-ma na faaalia ai nisi o itu taua. Muamua-sa na fesiligia poo a mea a nei fana o loo fai i Samoa. O lona lua, na ia tuuina atu le fesili pe na faapefea ona aumai ia fana i totonu o Samoa.  Afai la e fesiligia so matou manatu, e matua faigofie lava tali.

Mo le itu muamua, o ia auupega malolosi sa le tatau lava ona aumai i se nofoaga e latalata mai i lenei atunuu. E matua le mana’omia lava ia fana vagana ai o fai se fuafuaga a se tasi e amata se taua i se nofoaga. Ae mo le finagalo lona lua o le Komesina-e ono mafai lava ona tutupu mai ni mea faapea.

O se tasi e aofia ai le le mafai e le Ofisa o le Tiute ona maua ia mea i le tuaoi. O le vaaia lona lua o le ono mafai lea e se tasi o i totonu o le pulega ona faataga mai nei fana i totonu o le atunuu ma le iloa lelei lava. I lea la tulaga, e tatau ona matua faapopoleina i tatou.

Ua matou fai atu faapena ona matou te le iloa pe fia nisi auupega faapea o i totonu o le atunuu. Ma ia mafaufau lelei  lava pe afai e taunuu atu ia fana i lima sese? 

I se tasi itu, mo nai masina ua mavae atu, e tele osofaiga a Leoleo na maua ai ni fana malolosi, ututau ma fualaau faasaina. O se tuufaatasiga mata’utia lenei. O se mea lea e tatau ai i tagata uma ona galulue faatasi ina ia mautinoa o le a muta ai iinei, i le taimi nei lava. 

Tama’ita’i e ma alii, matou te toe fai atu foi; o i latou e ola i le pelu e feoti foi i le pelu.  Se’ia vagana ai-ua tatou lafoa’i nei fana uma ia e le talafeagai i totonu o Samoa, o le a faaauau pea ona tatou faamaumau ola taua ona o lea tulaga. Ae peitai-o loo i ai le faamoemoe. A fua i le taunuuga o le Faamagalo a Leoleo, lea na faamuta i le Aso Lulu, o loo i ai lava se faanaunauga taua i vaega eseese o le atunu ina ia avea Samoa na nofoaga saogalemu. O le mea lea- ia tatou taofi pea le taumafaiga ina ia faaauau.


15 January 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?