E fia’ai le tagata paiē

By Vatapuia Maiava 02 October 2016, 12:00AM

O lea le talitonuga o le ali’i talavou i a Amoe Manigi i le Fofoga o Samoa i le aso ananafi i le Fofoga o Samoa.

 “O le taunu’uga lava lena o le tagata e paiē ma le lē sogasogā i galuega fai.

O Amoe e 24 tausaga ma o ia o se fai fa’ato’aga mai le afioaga o Satitoa, Aleipata.

 “Ia e pei ona outou tagataga’i mai ai nei, ia o le tu’u uma lava o le malosi i galuega o lo’o fai ia aua e lē taumateina le tali mai o le lumana’i.

 “Ia o le taimi muamua ia sa ta’ata’a solo lava ma sa le manatu tele i le tausiga o le aiga aemaise o se galuega fa’apenei e pei o le gagauina o le vao ma fai le ma’umaga.

 “Ia ma o le tulaga lava lea na taumafai mai ai ia ma o lea ua fai atu lava ua manaia ma ua lagona le fiafia i ai.

 “I a a’u ia, toeitiiti lava a sese le itu e ave ai le fa’amuamua ae ua alu alu ia o le galue lava e tausi le aiga e maua ai fa’amananuiaga e tele.

 “Ia o le taimi lenei o lo’o fa’aaoga lava le ma’umaga e fai ai mea’ai o le aiga, o lo’o mafaufau atu lava e fa’atau nisi o talo i se taimi o i luma.

 “O lo’u uso ma se tasi o o’u tuafafine o lo’o faigaluega i Apia ma o i la’ua nei o lo’o fesoasoani tele i le taimi lenei.

 “Ia e leai lava ni fa’afitauli o lo’o feagai ma a’u i le taimi lenei, o lo’o tele lava ina solo lelei i le tele o taimi.

 “E ui lava o nisi fo’i o taimi ua fa’atūtū gatā ia ae  o lo’o taumafai lava i ai e ave’ese nei fa’alogona.

 “Ia o le masani lava o lo’o fai o le alafa’i mai lava o le ma’umaga i taeao uma ina ia aua ne’i maua mai e le la…ia a tau velavela loa ia fai se malologa.

“Ae o le aotelega lava ia o le tausia ai o le aiga ma avea ma fai fa’ato’aga ia o e leai se faigata o i ai, aua  o lo’o lelei mea uma.

“E i ai lava taimi e sau ai le fa’avaivai, ia ae fa’afetai ona o lo’o fesoasoani mai lava le Ali’i ma aumai mafaufauga lelei i aso uma ina ia alo ese mai le tele o mailei a le fili ae to’aga e tausi matua ma le aiga aua o fa’amanuiaga mautinoa lava ia.

By Vatapuia Maiava 02 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>