Chief Justice welcomes new Judge

CJ
By Chief Justice Patu Tiava’asu’e Falefatu Sapolu, 02 April 2017

Lau Susuga ile Taitai o le Sauniga, lau Susuga Patele Etuale Etuale,

Lau Afioga ile Alii Palemia faapea lau Afioga ile Tamaitai Sui Palemia ae tainane lau Afioga ile Alii Minisita o Faamasinoga ma le Mamalu ile Aiga Kapeneta. 

Afio foi lau Afioga ile Minisita Lagolago o Faamasinoga.

Afifio a outou Afioga i Faamasino o le Faamasinoga.  Afio foi lau Afioga ile Tamaitai Faamasino o le Faamasinoga Faa-Itumalo faatoa mae’a ona fatautoina ma lou Alii,

Afio lau Afioga ile Fofoga Fetalai faapea lau Afioga ile Sui Fofoga Fetalai ma Sui Mamalu ole Palemene,

A outou Afioga i Faatonu o le Faamasinoga o Fanua ma Suafa,

Lau Susuga ile Alii Loia Sili a le Malo ma Sui o le Komisi o Galuega a le Faamasinoga, 

Lau Afioga ile Taitaifono ma Sui o le Komisi a Tagata Faigaluega a le Malo,

Lau Susuga ile Pule Sili o le Matagaluega o Faamasinoga faapea le Maaveeseese o le Au-Faigaluega a le Matagaluega o Faamasinoga,

Faauluuluga o Matagaluega a le Malo faapea le Samoa Law Reform Commission,

Lau Susuga ile Tamaitai Peresetene o le Sosaiete a Loia faapea Sui o le Sasaiete a Loia,

Lau Susuga ile Tamaitai Peresetene ma Sui o le Sosaiete a Mediators i Samoa,

Le paia i Aiga o le Tamaitai Faamasino faatoa mae’a ona faatautoina,

Le Maaveeseese ile paia o lenei Aofia.

E avea lo’u leo e fai ma Sui o le Faamasinoga e muamua ona momoli atu ai le faafetai tele i lau Susuga ile Taitai o lenei Sauniga lau Susuga Patele mo upu tima’i ma upu faalaei’au faale-agaga ua e laugaina i lenei taeao.  Ou te talitonu o le a aoga lea e saga faamalosia ma saga fa’aaupegaina ai pea le Tamaitai Faamasino e faasino tonu iai lenei aso aua lona sauni alofaiva atu i galuega a le Faamasinoga Faa-Itumalo ua tofia nei o ia iai.  E talitonu le mafaufau o faiva e talosia ma tapuaia e i’u ma le manuia.  Ma faatasi le Alii ma i tatou e leai se faafitauli e le mafai ona tatou foia.

Ia e avea foi lo’u leo e fai ma sui o le Faamasinoga matou te faatalofa atu ma faa-feiloai aloaia atu ai i lau Afioga ile Tamaitai Faamasino faatoa mae’a ona faatautoina.  Faamalo i lou tofiga fou.  E le tau fesiligia lou galue malosi ma lou sogasoga ile galuega faaloia ile tele o tausaga ua mavae ua mafua ai lou tofiga i lenei taeao e avea ma Faamasino o le Faamasinoga Faa-Itumalo.

E toeitiiti lava leai se vaega o le tulafono a Samoa e te lei galue ai ile galuega faaloia mo tagata sa e tauaveina a latou mataupu i luma o le Faamasinoga.  Ma ua e tulai soo foi i le galuega faaloia e tauave faamasinoga a tagata e le gata i luma o le Faamasinoga Faa-Itumalo ae faapea foil i luma o le Faamasinoga Maualuga ma le Faamasinoga o Talosaga.  O lona uiga, e leai se Faamasinoga a Samoa e faataga ai loia e te lei tulai ai i le galuga faaloia.  O lou tulai mai la ile tofi faa-Faamasino ua lava ma lautele lou silafia ma lou tomai masani ile tulafono ma le galuega faa-Faamasinoga.  Ua leva foi lou silafia o natura faale-tagata soifua ma le soifuaga ol o’o soifua ai tagata o si o tatou atunuu.  E taua le atamai ma le iloa o le tulafono.  Ae ile galuega faa-Faamasino ou te talitonu e sili atu ai le le lava o le tofa ma faautaga.  Ma ou te talitonu ua lava tapena ma fa’aaupegaina oe i lea tulaga.

ADVERTISEMENT

Ao se upu e auau ma fa’aautu iai sa’u faamatalaga i lenei taeao e faavae lea i upu o le tautoga faa-Faamasino faatoa mae’a ona e faatinoina.

Fai mai upu amata o le tautoga faa-Faamasino: “Ou te tauto i luma o le Atua Silisili Ese, o le a ou tautua lelei ma le faamaoni ia Samoa”.  Ma o ituaiga faaupuga masani ia o lo’o amata ai tautoga faa-Faamasino i atunuu o lo’o mulimulita’i i faiga-Malo faa-temokarasi.  O lona uiga o le allegiance po’o le loyalty o se Faamasino e agai tonu lava lea i lona atunuu.  Ma o le tautua ma le auauanaga a se Faamasino e agai tonu foi i lona atunuu.  O le uiga lea o upu ia ou te tauto ile Silisili Ese, o le a ou tautua lelei ma le faamaoni ia Samoa.

Ona toe foi mai lea o upu o le tautoga faa-Faamasino, o le a ou faia le mea tonu i ituaiga uma o tagata.  O nei upu o lo’o momoli mai ai le feau taua e tutusa tagata i lalo o le tulafono.  E le faailoga tagata le tulafono.  E tutusa le tagata malosi ma le tagata vaivai; e tutusa le tagata mauoa ma le tagata mativa; e tutusa foi le tagata taualoa ma le tagata le taualoa.  E le faailoga tagata foi le tulafono ona o foliga poo le lanu o se tagata, pe ona o se tagata o se tane poo se tamaitai; e le faailoga tagata foi le tulafono ona o ni talitonuga faale-lotu o se tagata pe ona o nisi lava talitonuga talafeagai o se tagata.  E tutusa uma lava tagata i lalo o le tulafono, lea e faa-Peretania ina o le “equality under the law”.

Ona toe faapea lea o upu o le tautoga faa-Faamasino:  “O le a ou faia le mea tonu i ituaiga uma o tagata e aunoa ma le fefe”.  O le tasi lenei o natura masani faale-tagata soifua ua tatou lau silafia, o le fefe.  A e le fefe i tagata e  tau faamata’u mai ia te oe, o lou fefe lea i tagata e sili atu lo latou malosi ia te oe.  

 

 

A le o lena, o lou fefe lea e fai se faaiuga e faaono le fiafia mai ai nisi tagata ia te oe.  O le natura ta’atele lava lea faale-tagata soifua.  Ae fai mai upu o le tautoga faa-Faamasino, ile taimi e seei ai se Faamasino ile nofoa o le Faamasinoga, ia aveese lou fefe ae fai le mea tonu.

Ona toe faapea lea o upu o le tautoga faa-Faamasino: “O le a ou faia le mea tonu i ituaiga uma o tagata e aunoa ma le faapito”.  Ou te manatu o ia upu, o lo’o faamamafa mai ai le le faaituau o se Faamasino.  O le tasi lenei vaivaiga taatele faale-tagata soifua, o le faaituau.  E faaupu e nisi tagata le ituaiga vaivaiga lenei o le fai ma sē tau iai; ia poo le afisi o le isi ae toso le isi.  Ae ile taimi e faatino ai ou tiute faa-Faamasinoga, fai mai upu o le tautoga faa-Faamasino, ia e faia le mea tonu i ituaiga uma o tagata e aunoa ma le faapito.

Ona toe faapea lea o upu o le tautoga faa-Faamasino, ia e faia le mea tonu i ituaiga uma o tagata e aunoa ma le alofa po’o le loto tiga.  O le isi foi lenei natura masani faale-tagata soifua, o le alofa.  E te alofa i tagata e alolofa mai ma fai mea lelei mai ia te oe.  E te alofa foi i ou aiga ma au uo mamae.  Ae ile taimi e te seei ai ile nofoa o le Faamasinoga e faatino ou tiute faa-Faamasinoga, fai mai upu o le tautoga faa-Faamasino, ia aveese lou alofa ae fai le mea tonu i ituaiga uma o tagata.

O le isi foi natura masani faale-tagata soifua o le loto tiga poo le ita.  A e le ita ia i latou e ita mai ia te oe, e te ita i tagata e fai mea leaga mai ia te oe.  Ae fai mai upu o le tautoga faa-Faamasino, i le taimi e faatino ai ou tiute faa-Faamasino, ia aveese lou ita ae fai le mea tonu.

E aliali mai la ile tautoga faa-Faamasinoga, ile taimi e seei ai se Faamasino ile nofoa o le Faamasinoga e faatino ou tiute faa-Faamasino, ua malemo uma ifo i lalo ia ni natura faale-tagata soifua o loo ia te ia ae fai le mea tonu.  Ua le pei le Faamasino o le lautele o tagata soifua aua ua le faale-tagata soifua lana tofa a ua faale-Atua.  I se isi faaupuga, ua leai lou tagata, a o le agaga o le Atua ua galue i totonu ia te oe.

E le faigofie la le galuega faa-Faamasino aua e iai taimi e faaono feteenai ai lona faatinoga ma natura masani faale-tagata soifua.

Ona fai mai lea o upu o loo faaiu ai le tautoga faa-Faamasino: “Ia fesoasoani mai le Atua ia te a’u”.  Ia e malamalama gofie lava le uiga o ia upu. Ma ou te manatu o nei upu o le tautinoga lea a le Faamasino i lona Atua e le lava ia na o ia ile faatinoga o lona tofi Faamasino.  E na te moomia le fesoasoani mai a lona Atua.

O upu a le Tusi Paia o le poto o le tagata o le mea noa lava lea i luma o le Atua.  Ma afai tatou te talitonu faamaoni o le Atua na ia faia le lagi ma le lalolagi ma isi paneta uma, faapea ai ma le vanimonimo ma fetu uma o lo’o iai, o le talitonuga o nisi o saienitisi atamamai o le lalolagi, e tusa na o le 4% pasene o le “universe” ua oo iai le malamalama o tagata o le lalolagi lenei a o le isi 96% pasene o le “universe” ma mea uma o iai tatou le’o malamalama iai.

Ia, ia fai le Alii ma sulu i ou vae ma malamalama i ou ala.  Ia fetutaiala o Ia i ou ala uma.  Ia fai foi le Alii ma leoleo ia te oe, aua e le tulemoe o Ia, e le moe lava.  E na te le tuuina atu foi oe ina ia mapeva lou vae, ae leoleo o Ia ia te oe i lou ulufafo ma lou ulufale e amata atu nei lava seia oo ile faavavau.

Ia, ia tautuana foi le tapuaiga a si ou aiga ma si o tatou atunuu o loo nofo tapuai mai ma talosia le Malo o Samoa faapea lo tatou alofaiva i galuega a le Faamasinoga.

Ia mamao foi lau ti’a, ia mau ou faiva, ma ia tafe toto ou ala.

Ia faafualoa e le Atua lou soifua ma ia tautoaluaina e lona mana lau faatamasoālii i totonu o galuega a le Faamasinoga.

Ia manūteleina foi ile alofa o le Atua le paia o lenei Aofia. Soifua,

CJ
By Chief Justice Patu Tiava’asu’e Falefatu Sapolu, 02 April 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?