Masini komipiuta fou mo le Kolisi o Sagato Iosefo
O le anavatau o le Asosi ale Malisi i Sini, Ausetalia o le fai lea ma fa’ata’ita’iga lelei.
O le taimi lona lua lenei mai tausaga e tele ua toe omai ai le Asosi a Malisi mai Sini, Ausetalia e fesoasoani i le Kolisi Maualuga a Sagato Iosefo i Alafua.
I le Aso Faraile o le vaiaso na te’a nei sa foa’i atu ai e le Asosi a Malisi mai Sini, Ausetalia, ni masini komipiuta se 20, ma ni tusi faitau i le kolisi.
O le tauaofa’i o lenei foa’i e ova ma le $20,000.
Sa mafai ona fa’afeiloa’iina lenei vaega e ala lea i le fa’atautaia e le kolisi o se ava o le feiloaiga.
E tusa ai ma le saunoaga ale Peresetene o le Asosi, Hendry Lees, sa ia ta’ua ai le aogā o le fesoasoani ma le fa’asoa atu i fanau aoga a Samoa.
“O le taimi muamua lea ua matou uia mai ai le aoga maualuga a Sagato Iosefo ma matou foa’i ai se fesoasoani,” o lana saunoaga lea.
“o le tausaga na te’a nei sa matou foa’iina ai ni meatotino e fa’aaogaina e le au lakapi a tama aoga matutua fa’apea ai ma i latou o lo’o ta’aalo afereti.
“Ae matou te le’i toe fo’i i le tausaga na te’a nei sa talosaga mai ai le pule aoga mo ni masini komupiuta mo le aoga ma o le mafua’aga lena o le o’o mai i le taeao lenei.”
O Lee o se tama tuai a le aoga ma o lona talitonuga e aoga le toe fesoasoani atu i le aoga ma le nofoaga sa ia mauaina ai le poto ma le atamai.
“I totonu o Ausetalia, o isi tamaiti fa’atoa ta’i tolu tausaga ua tofu iPads ma telefoni uma, ae o iinei i Samoa e tu’ufa’afeagai lava.
“Pau le taimi e mafai ai e le tamaititi aoga ona maua lea fa’amanuiaga pe afai e au i luga o kolisi ma univesite.
“O le matou o’o mai la i le aso lenei o fia fesoaosani lea i fanau aoga ina ia maua fa’amanuiaga o lo’o maua e tamaiti aoga o lo’o i atunuu mamao.”
Sa fa’afetaia e le tama’ita’i pule o le aoga, Susotina Maletino Levao le Asosi ona o le loto fesoasoani.
“Fa’afetai i le Atua ona o lea ua mafai ona tatou feiloa’i ma nisi sa a’otauina i le kolisi nei,” o lana saunoaga lea.
“E le o se taimi muamua lenei ua tuu mai ai le tauau o lenei asosi e fesoasoani i le aoga ma o le mafuaaga lea e fa’afetai ai le loto i le Atua.
“Ou te iloa e le faigofie le galulue ai i atunu’u mamao aua le tausiga o aiga ma o le ala lea e fa’afetai ai pea le loto i le Atua ona o lana foa’i i le Asosi ma le malosi.
“Fa’afetai i ai latou na a’otauina i lenei aoga ona o le loto fesoasoani i le kolisi e le gata i le itu tau aoga ae fa’apea fo’i i le itu tau ta’aloga.”
Sa mafai fo’i ona ofo atu e le Asosi ni sikolasipi mo nai fanau aoga o lo’o galulue punoua’i e ala lea i meaaoga, ae peita’i e mamao nuu o lo’o nonof ai.
O lenei Asosi sa auai mai i le fa’amoemoe o le vaiaso ta’alo ale Malisi.