Sasa-pala e Fa’amasino le le-fa’amaoni

18 December 2015, 12:00AM

Fa’aliliu e Maiava 

Ua fa’amaonia ma fa’asalaina i se sala-tupe e $800.00 e le Fa’amasinoga Fa’aItumalo, se ali’i e 40 tausaga, ona o le tau-fa’asese i galuega a le Ofisa mo Faiga Palota, ma ua momoli atu ai fo’i ma se fe’au i le ‘Au-palota, a’o aga atu le atunu’u mo Faiga Palota Tele i le tausaga fou.  

Na fa’asalaina e le Fa’amasino Fa’aItumalo, o Fepulea’i Ameperosa Roma, le ali’i o Aukusotino Ng Lam, ona o moliaga e lua i lona faia lea ma le mautinoa o faiga e fa’aseseina ai le Komesina o Faiga Palota atoa ma le sainia o se tusi e aunoa ma se iloa po’o se maliega, a lē ona le fanua, o Toaono Ng Lam.  

Na sainia e Aukusotino ni pepa e fa’amaonia ai le nonofo o nisi o tagata palota i le fanua o To’aono Ng Lam i Moamoa.

Na fa’ailoa i le Fa’amasinoga, o nei tagata-palota, e mai Tapatapao.

Na fa’amaonia moliaga o le ua fa’asalaina nei. Ina ua tu’u iai le avanoa e le Fa’amasino, na fa’aalia ai e Aukusotino lona fa’alumaina i lenei mea ua tupu, ma ua salamo i lana mea sa fai ma fa’ato’ese ai i le Ali’i Fa’amasino.

“E matua leai so’u manatu ‘ou te o’o mai i le Fale Fa’amasino ona o le mea sa ‘ou faia,” o lana fa’aaliga lea. “Na una’ia malosi a’u nei e le komiti o faiga-palota e fai le mea lea ma lo’u le-iloa lava ‘ou te afaina ai i le tulafono.” 

E le’i ta’ua lava e lē na molia, po’o fea e iai le komiti o faiga-palota lea sa na ta’ua.

Ae na tauto i le Fa’amasino o Fepule’ai, o le taimi mulimuli lea e tu ai i le Fale Fa’amasino ona o lea mata’upu.

Na fa’amauina e le Fa’amasino le ‘ai’oiga a Aukusotino ma ia fa’ailoa atu iai, le ogaoga o lana solitulafono ua faia.

“O le tulaga mata’utia o au gaioiga na fai, ua iloa ai lou le-fa’amaoni,” o lana saunoga lea. “Sa tatau lava ona e iloa ma malamalama lelei, o le palota, o le fatu lea o le fa’atemokalasi.

“O le avanoa ua tu’uina atu mo tagata-nu’u uma o lo tatou atunu’u, e filifilia ai o latou ta’ita’i fa’aleMalo.  Ma e le tupu so’o fo’i na filifiliga. 

 “O le avanoa lea ma le ‘auala e filifilia ai o tatou ta’ita’i, a’o lea e solomua i le ‘au-palota ma tagata o le tatou atunu’u, ona le-fa’amaoni i le ‘auala e fa’atino ai lea filifiliga, ma ua matua lepeti atoa ai le agaga matagofie ma le taua, o faiga-palota.”

Na ta’ua e Fepulea’i, e tele suiga ua faia nei i tulafono mo faiga-palota, o lona uiga, e le faigofie le galuega o lo’o feagai ma le Ofisa o le Komesina mo Faiga Palota. 

 “O le fa’atuatuaga atoa o le Ofisa mo Faiga Palota, o lo’o ta’oto i le ‘au-palota ma le mamalu o le atunu’u, ina ia mautinoa e sologa lelei mea uma ma amiotonu le faiga o filifiliga a le atunu’u,” o lana saunoaga lea.

“Ae a le-fa’amaoni loa le ‘au-palota, pei o ‘Oe ma lau mea ua fai, o le a matua faigata lava la latou galuega o tau fa’atino.”

Na ta’ua fo’i e le Ali’i Fa’amsino, e le māmā i le va’ai a le Fa’amasinoga, ituaiga mata’upu fa’apenei.  

“Na ‘ou ta’ua muamua, o faiga-palota, o le fatu lea o faiga fa’atemokalasi i le atunu’u lenei. O le faia ma le iloa, faia ma lou mautinoa o au gaioiga uma, ua aupito ogaoga ai tele ma mata’utia lou sese ua fai. 

“E fa’alagolago Fa’amasino i a’oa’oga lelei ma talitonuga masani e fesoasoani ai i le fuafuaina o se ituaiga fa’asalaga e talafeagai ma mata’upu fa’apenei.” 

Na ta’ua e Fepulea’i, o le falepuipui lava le fa’asalaga e matua talafeagai ma solitulafono fa’apenei. 

 “Ui i lea, ua ‘ou matau ma le toto’a fa’amaumauga ma molimau sa tolaulauina, sa e ioeina moliaga uma i le amataga, ma o le fa’atoa molia fo’i lea o ‘oe ma ua e salamo i lau gaioiga na fai.

“O ia tulaga uma, ua tonu ai ia te a’u, ua le talafeagai se fa’asalaga fa’aFalepuipui, ae po’o le a lava le fa’asalaga e tu’uina atu e le Fa’amasinoga i lenei aso, a ua atagia ai se fe’au fa’apea, o ituaiga fa’atinoga ma moliaga fa’apenei, e matua le taliaina lava e o tatou tagata-palota.”

Na fa’amaonia e le Fa’amasino o Fepulea’i moliaga ma fa’asalaina ai Aukusotino i se sala-tupe e $800.00, ia totogi e le’i taina le 12 o le aoauli ananafi, a leai, e valu vaiaso e nofo falepuipui ai i le to’ese.

Ua māua e le Samoa Observer, e tele isi mata’upu fa’apea, o le lē-usita’ia o le Tulafono o Faiga Palota 1963, ua tu’uina atu nei e le Matagaluega o Leoleo i le Ofisa o Fa’amasinoga.

18 December 2015, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>