Keke-pua’a mogamogā

By Lanuola Tusani Tupufia 07 June 2016, 12:00AM

Na matua fa’ate’ia se teineitiiti-a’oga o le Tulagalua a Vaimoso, ina ua maua se mogamoga i totonu o lana keke-pua’a i le aoauli ananafi.

Na ta’ua e Italian Tavita – e 7 tausaga, sa fa’atau lana keke-pua’a i le faleoloa e fa’afefasa’i ma le falea’oga. 

Ua mae’a ona ‘ai le isi itu o le keke-pua’a, ae va’ai e Italian se “mea-uliuli” i totonu.

Fai mai na tago loa vavae-‘ese le pa’u, ma iloa ai se mogamoga.

O le le-fiafia tele o se tasi o tina mai le a’oga a Vaimoso, sa ia fa’afeso’ota’i mai ai Samoa Observer ma ripotia ai le mea sa ia va’aia.

Na ta’ua e le tina lea – e le mana’o e fa’ailoa lona suafa, e mana’o e fa’ailoa i tagata uma e ala i le nusipepa, mea’ai o lo’o fafaga ai nei a tatou fanau.

“’Ou te manatu, e tatau lava ona siaki lelei e matua uma mea o lo’o fa’atau mo a latou fanau,” o le fa’aaliga lea a le tina.

“Pau lea o le ‘auala ‘ou te iloa, e mafai ona fa’ailoa atu ai mea fa’apenei e tutupu aua ‘ou te iloa lelei, a toe ‘ave i le faleoloa, e mautinoa lava le togi i fafo e le manana’o e fai iai se fa’ai’uga.

“O ai na iloa ua tele atu ni mogamoga ua uma na a’ai ai fanau ae latou te le-iloa.” 

Na saunoga le Pule o le A’oga Tulagalua a Vaimoso, o Sasola Amataga Niko, o le a ‘ave se lapata’iga a le a’oga mo matua uma, ona o mea’ai o lo’o fa’atau mai mo a latou fanau.

Na ta’ua, e iai le faiga-masani a le a’oga, e le fa’atagaina ai le fa’atau ma ‘aumai i le lotoa, o keke-pua’a ma isi ituaiga mea’ai. 

Na fa’aopopo mai fo’i, o le a ripotia e le a’oga le keke-pua’a mogamoga lea i le Matagaluega o le Soifua Maloloina.

E le’i maua e lau nusipepa nei, se fa’amatalaga mai le pule o le faleoloa i le maga-fa i Vaimoso sa fa’atau ai le keke-pua’a lea. 

Ae na ta’ua e le fa’atau-oloa ananafi, sa fai i le teineititi lea e fa’afo’i atu le keke-pua’a ma le mogamoga ae toe fa’aola atu lana tala ($1.00).

Na ta’ua e le fa’atauoloa lea o Palepa, latou te faia ni keke-pua’a a’o mea e avatu i le faleoloa i aso uma, e tagata latou te gaosia.

By Lanuola Tusani Tupufia 07 June 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>