Toe mafaufau tasi lava… E le’i leva atu, na ‘ou matamata ai i le TV i le fa’atalanoaga o le ali’i e suafa ia Kulklinski, o lo’o falepuipui i le fasioti-tagata.

O le tagata lenei na ia fasiotia le silia i le 100 tagata, sa fa’atalanoa e se faufautua fa’apitoa, lea na fa’amatala, na mafua ona avea Kuklinski ma fasioti-tagata, ona o ituaiga matua sa tausia o ia mai lona la’ititi.

E masani ona fasi-fa’amo’amo’a Kuklinski e lona tama e aunoa ma ni mafuaga tatau. E fa’apena fo’i lona tina, e le taitai fa’aalia sona alofa i lana tama i so’o se taimi.

Ua alu aso ma tausaga, o feagai pea Kuklinski ma faiga fa’atautala nei ma i’u ai lava ina leai sona fa’amoemoe lelei, ua noa o ia ma ni mafaufauga lelei, ua le-iloa fo’i le mea e ta’u o le ALOFA.

Talu ai la le-leai o se alofa na fa’aalia iai, toe leai fo’i sana uo, na fa’amatala e Kukilinski, pau lava le mea o lo’o totoe e mafua ai ona ola, o lona ita tele lea i isi tagata.  

A’o le isi ali’i o Henry Luce, e matua ‘ese lava lona tamā mai le tamā o Kuklinski. O Henry Luce, na amatā le kamupani solo-solo manuia o le Time-Life lea e lolomia ma fa’asalalauina tusi-faitau o le Time ma le Life.

O le mea moni, e manatu le to’atele, o Henry Luce lea ua tele ina suia ai mafaufauga ma lagona o le to’atele o le lalolagi, nai lo se isi lava tagata-fa’asalalau i le tala-fa’asolopito.

E masani ona talanoa Henry Luce, i le tele o tausaga o avea ma atali’i o se misionare a’o ola a’e i le atunu’u o Saina. A’o la’ititi, sa masani ona alu se la savaliga-mamao ma lona tama ma talatalanoa fo’i i le tele o afiafi ta’itasi. Fai mai Henry:

“E fai lava a’u e lo’u tama e pei o se isi tagata matua.” Fai mai, e va-va-lalata lava ma mafana le la mafutaga e foliga o se uo, ae le pei o se tama ma sona atali’i; o se uo mamae.  

Manatua, e ola ane fanau ma avea ma tagata e pei lava o e sa latou fa’afeagai ma avea ma a latou uo, i le tele o taimi. O le mafuaga lea e tele ai ina fai e tupulaga mea sese.

E tau-mulimuli i fa’ata’ita’iga a isi tupulaga aua e tele atu taimi e fa’atasi ai ma ana uo nai lo taimi ma ona matua. Na fa’ate’ia le lalolagi ina ua fetalai Iesu Keriso, na faia e Le Atua tatou, e le gata o lana fanau a’o Ana uo-mamae fo’i.

Na fetalai, e alofa tele Le Atua ia tatou, e finagalo ai lava ia fa’atasi ma tatou i aso ta’itasi ma mafuta latalata mai ma tatou ta’ua ai o Ia, o le “Tama.” Mo le aso, a tatalo ia Iesu e fa’amagalo ‘Oe ona o lou ola pea na o ‘Oe i ou lava ala, o le a Ia faia o ‘Oe ma fanau ma le uo a Le Atua Soifua.

A’o tatou taumafai la e ola i ala o Keriso, o le a mafai ai fo’i e tatou o tama, ona iloa ma avea o tama-alolofa, o uō mamae fo’i e mo’omia e a tatou fanau. Toe mafaufau tasi lava…