RIPOTI O LE SUESUEGA O LE KOMESINA O SULUFAIGA 2016

20 April 2016, 12:00AM

Sailiiliga 1: O le faamaoniga o le Minisita ua lautele lona faaaogaina i lalo o le Tulafono o Malosiaga o Leoleo 2007.

E lua aso talu ona maea le osofaiga i Faleatiu, ae amata ona alia’e mai ni tulaga na mafua ai ona pu’e sese Suitupe ma fai i ai ni gaioioiga ua le tusa ma ala o le tulafono.    

I le Aso Sa, 16 Aukuso 2015, na alu ane le tasi tagata (Molimau A) i luma o le auala mai lona aiga e lata ane i le maota o le Minisita o Leoleo i Leauvaa, i lona taavale pikapu faatasi ma nisi o lana aufaigaluega sa nonofo i tua o le pusa, ae faateia i le se’e atu o le taavale ma faalava i ona luma ma valavalaau atu le tagata e faasua’avā ia te ia mai totonu o lona taavale. Sa faaleoina le toatamai o lenei tagata faasua’avā ia Molimau A e uiga i le osofaiga o Leoleo i Faleatiu ae leai sona malamalama i lea tulaga. Sa toe valaau atu le tagata  faasua’avā lea ia Molimau A, ua lelei e le i iai o ia ma isi vaega i le taimi o le osofaiga ma e le i maua e Leoleo mea uma. O le faamatalaga o Molimau A e leai ma se taimi na ia faalogo atu ai ua faia e le tagata faasua’avā lea ni lafoga tau faamatau o le a faaoo le oti i le Minisita poo le Komesina.

Na tau feosofi atu i lalo mai le pikiapu le aufaigaluega ae faatoatoa e Molimau A ma fai ane iai ua onā tele le tamaloa, e aua le pa’i iai ne’i afaina fua latou. E le i umi lava ae alu ese atu loa le tamaloa. Na molimau Molimau A e na te iloaina le tamaloa lea, o ia sa leoleo muamua ae na te le silafia lona suafa. 

Pe tusa ma le lua aso talu mai le mataupu i Leauvaa, poo se taimi faaaoauli o le Aso Lua, 18 Aukuso 2015, sa fono faatasi ai le Komesina ma le afioga i le Minisita o Leoleo ma na faamatalaina ai le mataupu na tupu i Leauvaa ma sa faaalia ai o le tagata faasuaava lea na leoleo muamua ma e igoa ia ‘Suitupe’. Atonu, o le taimi foi lea na faaopoopo iai ma le lafoaga taufaamatau i le Komesina ma le Minisita i nei fesootaiga. Ua tatou malamalama lelei i ‘faamatalaga feaveai’, e suia lava le faamatalaga i le faasolo atu i lea tagata ma lea tagata.  O le ala lea e faalagolago ai Leoleo i mau ua faamaonia faatoa fuafua loa iai se gaioioiga.  

E le o manino lelei poo le a tonu le taimi na aliae ai le taufaamatau i le Komesina ma isi ma e le o tulimata’ia e lenei suesuega, ae na ona faailo atu, le faaeteetega o le faalagolago i faamatalaga feaveai.  

O le taimi lea na feagai ai loa le Komesini ma se faaiuga e uiga i lenei faamatalaga – pe tulituliloaina pea le mataupu ma poo le a le gaioioiga e talafeagai mo le suesuega. O le taimi foi lea na amata ai ona aliae ai ni tulaga ese. 

O se vaaiga taulalata i se gaioioiga talafeagai i lea taimi, na sailia e le vaega suesue ia mau mai leoleo ua lava le tomai ma le agavaa i tulaga tau suesuega masani o leoleo ma faiga e silisili ona lelei e tusa ma le Taiala o Suesuega o Mataupu Tau Solitulafono. O loo faamatalaina i le Tusi Taiala, o le galuega faatino o Leoleo ina ia; (1) faamautu poo ua faia se solitulafono pe leai ma poo fea tonu le nofoaga na tupu ai le solitulafono i le faaaogaina o le tomai faasuesue e sailia ai ma le ua solitulafono; ma (2) pueina i latou o loo masalomia le solitulafono ma tuuina atu ia mau e talafeagai ma e tusa ma ala o le tulafono e molia ai latou ua tuuaia. 

O le gaioioiga sa tatau ona faatino e le Komesina i lea taimi, o le valaau ia Molimau A (na silafia e le Komesina le suafa ma le nofoaga o lenei molimau) ina ia faia se faamatalaga e uiga i le mataupu ona fetuunai ai lea poo a le isi laasaga talafeagai. O le faatalanoaina o le molimau e mautinoa ai le o loo masalomia ma po o se mataupu ogaoga. Na faanatinati le agai o le Komesina i le Ofisa ma logo lona Vaega Faapitoa (TOS) ma faamatala iai le mataupu i Leauvaa. E le i logoina e le Komesina le Vaega o Suesuega o Solitulafono (CID), o loo iai le tomai faapitoa e faatino suesuega faapenei.

Ina ua faapotopoto e le Komesina le vaega o le TOS, sa ia faamatalaina ai le ‘taufaamatau’ ia te ia. I le faatalatalanoaga o le Komesina, sa ia faaalia ai lona popole mo lona saogalemu ona o le ‘taufaamatau’ lea e faasaga ia te ia. O le tele o le taimi o le faatalatalanoaga, e tapa lava le Komesina i le ‘taufaamatau’ ia te ia ae tau le faailoaina le aofia ai o Minisita o le Kapeneta ma isi.  

Na fesiligia e le Komesina le vaega o le TOS pe iai ni faamaumauga ia Suitupe, sa vave ona maua se faamatalaga ona sa galulue nisi o sui ma Suitupe a’o faigaluega i le Ofisa o Leoleo i tausaga ua tuanai atu. Na sailia foi le pepa o loo faamauina moliaga talu ai o Suitupe. Sa faamauina le solia e Suitupe o le tulafono i lona lafoga taufaamatau o le faaoo o le oti i le tagata, ma e 5 aso na taofia ai ma avea ai ma lona faasalaga. Na iai foi ma isi mataupu e aafia ai Suitupe ua fausia ai le finagalo o le Komesina ina ia saili Suitupe ma aumai i le ofisa. Sa maua faamatalaga i le nofoaga e ono maua ai Suitupe aua e faigaluega i se tasi o Stand Taxi ma e iai lona poloka i le Maketi i Fugalei. E toalua sui o le TOS sa faatonu e agai atu i le maketi e faamaonia ai le maua ai o Suitupe i lea nofoaga.  

Sa faaauau pea le feutanaiga ma sa faapea ona tuu atu se faatonuga o le Komesina i sui uma o le TOS ina ia faaauupegaina i latou mo le pueina o Suitupe. Na logoina atu loa e leoleo i le maketi o loo iai Suitupe i lona poloka, sa faapea ona toe faatonu e le Komesina lona vaega e agai faanatinati i taavale e lua i le maketi ae alu atu ia ma lona avetaavale i lona taavale, sa faaauupegaina foi ma laua.  

E tele lava le faaletonu o le feutanaiga lea. E leai se fetuunaiga poo a galuega o sui taitoatasi e faatino.E leai se sui o le CID na auai i lea feiloaiga, ma e leai se mau mautu e faavae ai le gaioioiga. E leai foi se tusi poloaiga e saisai mai ai Suitupe.Sa agai atu loa le TOS ma auupega. 

O sui o le TOS na auai i lea feiloaiga ma le Komesina sa faalogoina le le mautonu ona e le i maua atoa faamatalaga ma ua faia lona faaiuga i se tulaga faanatinati. O loo manino le le atoatoa lelei o tapenaga o lenei fuafuaga i lalo o le taitaiga o le Komesina. O faamatalaga na tuuina mai e nisi o leoleo, na faaalia ai le maualuga o le latou silafia ma le tomai i le latou galuega, ma e fia faaleoina ai le agaga faafetai i le latou lagolagosua i le galuega o le vaega suesue. Na manino lava le faamatalaga i le faagasologa masani i soo se tuuaiga o se solitulafono ma le maualuga o le tulaga e tatau ona ausia e leoleo e le gata i totonu o le latou lotoifale a o le galuega aoao i mataupu tau solitulafono, ma le faamoemoe, ia faataunuu le moliaga. O se tasi o mau o loo pesepese ai le Taiala o Suesuega o Solitulafono: ‘Faamautu muamua mau faatoa faatino’, o loo faamamafaina ai le faataua o le faamaonia muamua o faamatalaga o molimau ma nisi mau e faavae ai se gaioioiga nai lo le faalagolago i le latou malosi.

O le faaiuga o le faasiilima i fana, pueina ma saisai mai Suitupe e aunoa ma se toe faamaonia o faamatalaga e faasaga ia te ia, ua feliua’i ai e le Komesina le mau lea ‘Faamautu muamua mau faatoa faatino’

Ina ua fesiligia le afioga i le Komesina i lea tulaga, na ia faamanino mai ai, soo se solitulafono e ono tupu ua faaalia atu e le Minisita o Leoleo ia te ia, e 100% lona talitonuga o lenei faamatalaga e matua ogaoga ma e tatau ona faatino se gaoioiga faanatinati. E ui i le taunuuga o lenei mataupu ia Suitupe, e le i maluelueina le taofi o le Komesina ma na ia saunoa mai na te toe faia lava lea gaioioiga i le lumanai. E ese mai lea i faamatalaga faatauto o leoleo na aafia i le mataupu, o le latou taofi, e le lelei le faafoega o le mataupu, ma e iai lava auala talafeagai sa mafai ona faaaogaina. Sa faaalia lagona o le ita ma le faanoanoa o isi leoleo i le gaioioiga, ma lona aafiaga i galuega taualoa o le Matagaluega.

Sailiiliga2: Ua faatamala le Komesina o Leoleo i lona le faaaogaina o vaega taua mo suesuega ma ua fulisia faalaau mamafa lona faamomoe i faamatalaga e le i faaamaonia, lea na pu’e ai Suitupe i se gaioioiga sese ma le tusa ma ala o le tulafono.

Na toe saunoa le Komesina, atonu sa tatau ona valaau Molimau A ae le i pueina Suitupe, a ua ogaoga tele le taufaamatau sa manaomia pea le faatino o se gaioioiga faanatinati. E le taliaina e lenei suesuega lea faamatalaga ona ua le ogatasi ma le isi ona faamatalaga faapea e ono faitau vaiaso le sailia o lea tagata. Ina ua iloa Suitupe ma sa mataituina e leoleo i le nofoaga faitele (Maketi i Fugalei), e leai ma se avanoa e ono faaoso ai sana osofaiga i se isi, aemaise i le Komesina o Leoleo ma Minisita o le Kapenenta. O lea sa malu lava lea vaega ma o le taimi tonu lena sa tatau ai ona faatalanoaina Molimau A e maua ai le atoaga o le mataupu. E leai se faatalanoaga. 

O se faatataitaiga, ua valaauina nei Molimau A mo se faamatalaga ma ua ia faamaonia le tagata o loo masalomia ma o loo i le nofoaga faitele lea tagata. A faapea o lenei tagata e iai ona moliaga muamua i le taufaamatau, e ono talafeagai le umia pea o leoleo o fana ma faatino le saisaiga o le tagata?    

E taua le toe tepa i le Tulafono o Malosiaga o Leoleo o loo faataoto ai le faatoa faamaonia e le Minisita le faaauupegaina o leoleo i ‘tulaga faapitoa e aliae mai ma faapea ona tusa ai ma poloaiga po o tulafono faafoe talafeagai tau lotoifale a leoleo’. O le faaauupegaina o Leoleo e tatau ona tusa ma poloaiga poo tulafono faafoe tau lotoifale. O loo manino i le Faiga Faavae o le Faaaogaina o le Malosi Faa-Leoleo le fua faatatau i le faaaogaina o le malosi faa-Leoleo i se ‘tulaga maulalo talafeagai’. Sa autasi molimau o leoleo ina ua fesiligia lea tulaga, e le i faaaogaina lea fua i le faatonuga o le Komesina. E le o se gaioioga sa faaaogaina muamua pe manaomia i Samoa. Na faaleoina e se tasi o leoleo i lana faatalatalanoaga o le latou lagona e faapea:

“O le aauupega malosi o le Leoleo talu ona ou faigaluega i le Matagaluega, o le fofoga. A o le vaega lea ou te iai i le taimi nei, ua na o le matou umia o fana i luga o faatonuga o le Komesina ma faamaoniga o le Minisita”.  

O le a la le mafuaaga na ala ai ona tagofia lea tulaga? O le talitonuga o le Komesina sa matua talafeagai lea gaioioiga aua, e tusa ma lona faamatalaga, e le iloa poo nanā e Suitupe se auupega matautia (bazooka) i totonu o le keli o lana taavale poo se fana taavili laitiiti (uzi) i lalo o fata o lona poloka. E iai le popolega i ituaiga faamatalaga faapenei mai se tagata e tatau ona silafia lelei aga o tagata Samoa ma o loo iai le faatuatuaga na te umia le malosiaga e faaauupegaina ai leoleo. 

E le gata i lena, ina ua fesilgia poo le a le malosiaga na fai ai lona faatonuga e faaauupegaina ai lona vaega, sa le mafai e le Komesina ona tuuina mai se tali ma’oti ae na maua’a pea lona taofi, o le faamaoniga mai le Minisita ua maua ai lona faatagaga e faatino ai le gaioioiga. Pe a fua i faamatalaga ua tuuina mai, e le i usitaia e le Komesina le Faiga Faavae o le Faaaogaina o Malosiaga Faa-Leoleo i le faaaogina o le tulaga maulalo talafeagai, ma e le sa’o lona taofi i lea tulaga. Ina ua maea foi le faatinoga o le pueina o Suitupe, e le i gaioi le Komesina e saili pe toafia leoleo na seiina i fafo latou fana. E leai foi se ripoti tusitusia o lea mataupu.

O le taofi o le Komesina, ua tele le suiga i Samoa ma ua alaga tatau ona faaauupegaina Leoleo. Ae peitai, sa faaalia ai i lea faamatalaga, le pu moomoo o lona silafia i aafiaga matuia e tulai mai i le soona tuulafoai o le faaauupegaina o Leoleo, i le atunuu aemaise le saogalemu o ona tagata. 

Na faaleoina foi se lagona o tagata i le maketi i le vaega suesue, afai o le a agai Leoleo i faiga nei e pei ona latou molimauina i le pueina o Suitupe, ua tatau foi ona latou umiaina ni auupega. O se vaaiga faanoanoa lea ma o le popolega, o se faafitauli e faigata ona toe foi i se lelei. E le i amanaia e le Komesina aafiaga nei.     

Sailiiliga3: O le faaiuga o le Komesina i le faaauupegaina ma le faatagaina o le umiaina e leoleo o fana, ua le tusa ma le Faiga Faavae o le Faaaogaina o le Malosi o Leoleo, e faatamala, ma e iai ona aafiaga matuia mo le saogalemu ma le puipuiga o Samoa.

1.2 O le pu’eina ma le saisai

E toasefulutasi leoleo, le avetaavale o le Komesina ma le Komesina o Leoleo na agai atu i le Maketi i Fugalei i le itula 3 i le aoauli o le Aso Lua, 18 Aukuso 2015. O le tasi o taavale leoleo e foliga o se taavale sivili e leai ni faailo e iloa ia o se taavale leoleo, a o le isi taavale e tau leai ni ona faailo. Sa laeiina e alii leoleo ofu mitiafu faikola lanu moana malosi o loo faapipii ai le pine poo le tagavai o le Matagaluega o Leoleo i luma, ma le upu ‘POLICE’ i tua o le ofu. O isi leoleo sa laeiina ofu e tali ai pulufana. 

E feteenai faamatalaga o le Komesina i le faatauaina o le nofo silafia o le mamalu lautele i ituaiga osofaiga faapenei. I atunuu i fafo, ua maea ona faataoto ma le manino ma le mausali faiga ina ia silafia e tagata lautele o le a faatino se osofaiga o leoleo. O le faanaunauga ina ia taofia le aafia o tagata a o faatino galuega o leoleo, ne’i meaane ua siitia i se isi tulaga le manuia. 

Na saunoa le Komesina, sa ia talosagaina leoleo uma o ofu toniga i totonu ma lata ane i lea vai aai, e agai mai i le magatolu i Farmer Joes ina ia faailoa i tagata o le a faatino le galuega o leoleo. Ae peitai, sa ia toe faailoa mai lona le tuliloaina o lona talosaga sa fai ma na te le iloa pe na faataunuu lona faatonuga pe leai. E leai se molimau sa faatalanoaina na vaai i se leoleo poo ni leoleo ofu toniga i lena aso.

E ui lava sa tau iloa atu e tagata o se galuega o leoleo o loo faatino i pine o loo faapipii i ofu mitiafu faikola ma ofu e tali ai pulufana, faapea ma taavale leoleo ma laisene leoleo, e le mafai ona faamomoe i lena taimi o le vevesi, ma o se gaioioiga e le i vaaia muamua i laufanua o Samoa, le silasila totoa o tagata i faailo nei poo latou ni leoleo. Na saunoa le Komesina, e leai ma se taimi na popole ai mo le saogalemu o tagata i le maketi ma na te le i amanaiaina aafiaga i le faapopole ma le fefefe.    

O le taunuuga o nei gaioioiga ma le leai o ni faailo faa-Leoleo, na afaina ai se tasi o tina i lona popolevale ma le fefe, ua tele le aafiaga i lona soifua maloloina ma talu mai le osofaiga e le i toe foi ane i lona poloka i le maketi. Na faateia le Komesina ina ua faamatala atu i ai, ae na te le i faaalia sona popole i lea vaega.

Sailiiliga 4: Ua faatamala le Komesina i lona le faafoeina o ni laasaga talafeagai e faailoa i tagata o le a faatino le galuega o leoleo, lea na sosolo faaafi le matatau i tagata ma i’u ona afaina ai ma le soifua maloloina o le tasi tagata.  

E faigata ona faamatalaina le aafiaga o tagata sa iai i le maketi i lea aso, i le faateia o le taufetuli atu o ni alii e le iloa poo ai ma seiina i luga o latou fana ma agai ia Suitupe. O isi leoleo na feosofi i luga o le laulau ma latou fana ua i fafo mai le sulufana, a’o isi na femoulu i lalo o le laulau, ua pei lava o se ata tifaga. I lena taimi vave, a o su’i le niu o Suitupe ua faateia o ia i le ta’i atu o le fana pe inisi mai lona ulu e Leoleo X, a’o Leoleo Y o loo ta’i atu lona fana pe 2 i le 3 futu le mamao mai ia Suitupe.  

“Faapea a’u o se osofaiga o se au tau mai fafo.”

Molimau i le pueina o Suitupe Misa

E leai se taimi na faailoa atu ai e nei alii o latou o ni Leoleo. Latou te le i faailoaina foi ia Suitupe poo ai latou ma le mafuaaga ua osofa’ia ai ia (sa feteenai ma le faamatalaga o Leoleo X, ae le i faamalieina lenei suesuega i lea faamatalaga). O Leoleo Y, o ia lea sa faalala solo lona fana e taofiofi ai le fetuleni mai o tagata i le mea o loo vevesi. O le lagona o Suitupe i lena taimi, ua matua tumu i le matau ma le fefe, pau lava le mea na fai o le tilotilo sa’o i luma ma tatalo leoleoa ia faasaoina o ia mai lenei mea matautia ua tupu. Sa fetagisi tamaiti, ma e toatele tagata sa faaalia lo latou le fiafia.

Sailiiliga 5: O gaioioiga o Leoleo X ma Y i le seiina o la auupega ua le tusa ma le Faiga Faavae o le Faaaogaina o Malosiaga Faa-Leoleo a’o le lē faailoaina i le o loo faasea ona aia tatau faaletulafono ma le mafuaaga ua pu’e ai o ia ua le tusa ma le Tulafono o Malosiaga o Leoleo 2007 ma le Faavae o Samoa.

A’o luga aao o Suitupe ina ua faasiilima, sa tuuina atu iai le fesili mo lona suafa, ona saisai ai lea ma taitai atu i le taavale leoleo o loo faatali atu i fafo. O le taimi foi lea na faatonuina ai isi leoleo e toalua e feosofi i le taavale taxi o Suitupe ma ave i le Ofisa –mo le silafia e leai se faavae faatulafono e faatino ai lea faatonuga.

Pe tusa e faitau minute le umi na faatino ai lea osofa’iga. Ae e le mafaitaulia le tele o le faatamala ma le faaletonu a o faagasolo tapenaga o lenei osofaiga mai lona amataga se’i o’o ina ua pu’e Suitupe ma nisi aafiaga e ono tulai mai.

O molimau o leoleo uma sa auai i le osofaiga i le Maketi i Fugalei, o latou na o i luga o le faatonuga o le Komesina e pu’e ma saisai mai Suitupe ma sa iai gaioioiga sa taumafai e ufitia le latou faatamala i  faagasologa masani ua faataoto ma fuafuaina mo le pu’eina o Suitupe.

Sailiiliga 6: O le faatamala o le Komesina e faamanino atu i lona vaega le faafoega o le latou galuega, na lepeti ai le saogalemu o tagata lautele. E leai se faatonuga ma’oti i leoleo pe taofia pe pu’e ma saisai mai Suitupe, pau lava le faatonuga manino ia faaauupegaina i latou.  

E le gata i le faaiuga o le Komesina i le faaauupegaina o leoleo e faatino le faatonuga ma le faatamala i tapenaga, a o se atugaluga tele ua maitauina, o lona le silafia o tulafono ma taualumaga i Samoa e uiga i le taofia ma le pu’eina ma saisai.

O le maua’a pea o le taofi o le Komesina o Suitupe sa taofia ae le i pu’eina, ua atagia ai lona le amanaia o se tasi o mau faavae i galuega faa-Leoleo i totonu o Samoa.

Ua faamatalaina e lenei Ripoti le tulafono e uiga i le taofia ma le pu’eina o le tagata ma auala e faatino ai le taofiga, i le suesueina o se mea ma a faapea e maua, ona iai loa le avanoa o Leoleo e fetuunai pe tatau ona pu’eina le tagata. E mafai e Leoleo ona ave le tagata i se isi nofoaga ese? E saisai? Faasiilima i fana? E matua leai lava, a ua faaalia e le Komesina lona le malamalama i mea nei i ana gaioioiga ma lona molimau.

I lalo o le tulafono, afai ua masalomia e se leoleo, i luga o mafuaaga talafeagai, o loo tauaveina e se tagata se mea na gaoia, e mafai e le leoleo ona:

(a) taofia ma puipuia le tagata; ma

(b) faafeoina se suesuega o le tagata mo le mea e talafeagai; ma

(c) faoa faamalosi le mea pe afai ua mauaina e le leoleo lea mea.

O le taimi e aveesea ai le saolotoga tau le tagata, ua faatino le saisaitia poo le pu’eina o le tagata. I lenei mataupu, e matua leai se masalosaloga, o Suitupe na pu’e ma saisai. E na o le Komesina lava e auese lona finagalo.   

Sailiiliga 7: E le malamalama le Komesina i tulafono ua faamamafaina i le pu’eina le taofiga i Samoa.

I le aotelega o gaioioiga o Leoleo i le pu’eina o Suitupe, e leai se mafuaaga tatau na faatino ai le pu’eina o ia, e le i faailoa atu iai ona aia tatau faatulafono, e le i faamatalaina iai le mafuaaga ua mafua ai ona fai lea gaioioiga ia te ia, ma e mafai ona faapea atu, o le pu’eina o Suitupe sa faatino i se auala le talafeagai ma le tusa ma ala o le tulafono.

Sailiiliga 8: O le pu’eina o Suitupe, sa faatino i se auala e le talafeagai ma le tusa ma ala o le tulafono, ma ua solia ai lona aia tatau o le saolotoga tau le tagata.

O galuega faa-leoleo i le aganuu faaSamoa, e tasi lava le mau e faamamafa: aga o fesootaiga. O loo aoaoina leoleo ina ia latou faaaogaina le malosiaga o fesootaiga e fausia ai sootaga vavalalata ma nuu ma afioaga, mauaina o faamatalaga ma le faafoeina o se mataupu.O se gaioioiga na fofoa mai le tu faaSamoa o le feavaa’i, ma e aofia uma ai tagata Samoa. O le tausia o lea va fealoai, e le gata i le fofoga, a o tu ma aga faaalia o le tagata.

I le tuliamata’ia o aga o fesootaiga ma le feavaa’i, seia vagana ai osofaiga ua fuafuaina, e le faaaogaina e leoleo ia gaioioiga e pei ona molimauina i le Maketi i Fugalei, ma o le mafuaaga lea, mai faamatalaga na maua mai isi vaega leoleo i auaunaga o le tausiga o le filemu i atunuu i fafo, e maualuga lava lo latou amanaia o leoleo Samoa i le faatinoga o galuega. O faamatalaga mai molimau sa faatalanoaina e lenei suesuega, o se taimi muamua lea ua latou molimauina se faiga faapea. Sa iai foi atugaluga i nisi o leoleo i le faatinoga o lenei galuega ma na latou faamatalaina e tele isi auala e mafai ona uia. O loo faamatalaina i le Faiga Faavae o le Faaaogaina o le Malosi le faamamafaina o le faaaogaina o le malosi maulalo talafeagai i le faatinoga o tiute. O loo atagia i faatonuga o le Komesina ma ona tapenaga, e le i faaaogaina lenei taiala o le Ofisa o Leoleo.

Sailiiliga 9: I luga o le faatonuga o le Komesina, o gaioioiga sa faatino e leoleo ua le tusa ma taualumaga ua faataoto ma faiga faaSamoa i galuega tau leoleo ma ua le ausia le faiga manaomia o le ‘faaaogaina o le malosi maulalo talafeagai’. 

20 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>