Amioga a meaola

02 July 2016, 12:00AM

Toe mafaufau tasi lava…Ua tatou fa’alogo so’o i fa’a’upuga: E le-mafai lava e le nameli ona tu’ua o lana amio.  “E le-mafai fo’i e le taika ona suia e ia lava lona lanu.” Ae moni lelei ia fuaitau i ia fo’i ituaiga o manu. Ae a la tagata? E mafai  ona suia tagata? Pe pei fo’i tatou tagata-soifua, o aga a manu? Pe mafai ona fa’atonutonu a tatou amioga ma aga-masani?

Fai mai le isi ali’i, “O amioga mataga, e pei o se moega e manaia i le moe: e faigofie ona puna iai, ae matua faigata lava ona toe oso ‘ese mai ai.” Ae fai mai fo’i le isi ali’i: “O amioga fai-fai-so’o nei, e fa’ale-ano iai i le amataga, mulimuli ane ua matua fefeu ma tia’a ma le-mafai ona toe gagau”.

A lē “faia la iai se fa’atatau” e atili tia’a ai lava, ma atili telē ai le fa’aletonu. Moni e le faigofie ona gagau amio-mataga fa’apea, ‘a o le tasi lea o sa’olotoga aupito mata’ina o le soifuaga nei, o le sa’oloto mai mea-sese, o mea fa’aletonu ma amioga mataga.

O amioga-masani, e pei lava o ‘auala tatou te ui ai i aso ta’itasi. A o le fa’alavelave la, e le o ‘auala uma e taunu’u ai i le mea e manana’o ai. O le tele o ‘auala e le faigofie. Tele ina gogoto ai vae ma faigata ona aga’i i luma. O le mafuaga lea, e ao ai lava ona vave suia nei a tatou amioga mataga a’o le’i avea tatou ma tagata “le-toe talitonuina ma le-fa’atuatuaina”.  Ioe, e faitauina o tatou tagata, ona o a tatou amioga ma fa’apea ai lava i le soifuaga atoa. Pei o tala a le isi toea’ina: “Sui lau amio ona avea lea o ‘Oe ma tagata lelei.”     

A’o le fa’alavelave lea o tatou, e le manana’o lava e suia amioga ua masani ai. Ona tatou fai ai lava lea o le mau fa’amatalaga e ‘alofaga iai: “E le mafai ona suia lo’u tagata, o le mea lava ua masani a; pe o le “mea lava lena na ‘ou fanau mai ai.” Ia ma le tala masani lava: “E le mafai ona toe a’oa’o ni togafiti fou i se ta’ifau ua toea’ina.” Lena la: e le o tatou o ni ta’ifau po’o ni manu fo’i. A’o le mea moni lava ia, e na o tatou lava tagata soifua na faia e Le Atua, e iai le malosi ma le sa’olotoga e fai ai le tonu ma le filifiliga sa’o, e suia ai ituaiga tagata tatou te iai.

O a la au masani ma amioga e tatau ona amata suia i le aso? Le masani ma le amio e te mana’o e sui muamua, ina ia mafai ona suia uma ai ma isi au amioga e finagalo ma fiafia iai Lou Matai. E na o Ia lava e silafia le ‘auala moni ma aupito lelei mo lou olaga. E na o Ia fo’i e maua ai lou malosi e suia ai ou mafaufauga, o ou fa’alogona uma ma lau amio, ina ia e taunu’u ai i le fa’atinoga sili o ‘ou tiute ma faiva i aso ta’itasi. Ioe, tatalo nei ia Iesu e fa’amagalo ‘Oe ma fa’asa’oloto ‘Oe, ma Ia fa’atonutonu ma pulea e Ia au amioga ma ala e ola ai. Toe mafaufau tasi lava… 

(Fa’aliliu e Maiava)

02 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>