O le taugata o le soifuaga
O le a ea le olaga o lea tatou maua i le lumana’i pe a fai e aga’i ai pea i luma le tau o le tatou soifuaga?
O se fesili lea sa fa’aalia i le saunoaga a se tasi o tamā mai Tanumapua e suafa ia Sione Siaki. E 62 le matua o lona soifua.
O se manatu fa’aalia a Sione sa ta’ua o le taugata tele o le soifuaga ua iai nei.
“E tatou te taumafai pea e aua le mafaufau tele i le soifuaga ua iai nei ae peita’i; i le tele o mea fai ua alu ai nei le seleni, e iai lava le to’atele ua fa’asea i lea mataupu,” o lana tala mai lea.
“O a’u e to’atolu la’u fanau ae na’o le tasi o lo’o faigaluega nei ae o isi o lo’o fa’auma a’oa’oga.
“E le mafai e se tagata e to’atasi ona fai uma mea o le aiga. E le mafai fo’i e se tagata faigaluega e to’atasi ona fai uma mea e tatau ona fa’aalu ai le seleni i lenei vaitaimi aua fo’i ua taugata.
“Ua vave le aga’i i luga o le soifuaga ae ua le gafatia e tagata le tele o mea ua saputu mai lenei vaitaimi.
“E le gata e totogi le aoga a tamaiti, totogi le faiga o mea’ai aemaise le totogiina o pili ma isi mea fa’apena.
“O le mea lea ua ou va’ai atu iai, a u’u le $100 e le atoa se vaiaso o fa’aaoga. O le matua vave ona uma aua e tele mea fai i totonu o le aiga.
“Ae o le lelei a o nai Saina ma latou pisinisi lea e maua ai se auala foi lea e faigofie ma taugofie mo tatou.
“Aua a e alu atu i pisinisi a Samoa, ia o le tele a o oloa e taugata.”