E le’o toe faigofie nei aso

By Aruna Lolani 15 August 2017, 12:00AM

O le taugata o le tau o le soifuaga o lo’o ua i ai nei o se tasi lea o vaega o lo’o ua avea ma popolega i nisi. 

O lea le tulaga na fa’ailao e le tamā i a Tele’a Sauiao o Lotofaga ma Matatufu i le fa’atalatalanoaga ma le Fofoga o Samoa.

O Telea o se tasi o tamā e  galue malosi mo le tautuaina o latou aiga aemaise o le nu’u.

“Ia o a’u o la’u masani lava lea i aso uma o le taumafai lava lea e fa’aaoga le lauele’ele mo vaega nei e pei o maukeni, talo ma isi vaega.

“Na ia fa’ailoa o se tulaga o lo’o ua ia va’ava’ai i ai ina ia fa’atumauina le ola e fa’apena ona ola galulue fa’atasi aua o nei aso ua le’o toe tutusa.

Na ia fa’ailoa i le Fofoga o Samoa le tulaga e ao lava ona mulimulita’i i ai aua le aga’i atu i le lumana’i.

“Ia e le’o toe po se lilo le faigata ua i ai nei aso, ua tau le mafai e nisi o vaega e tatou te tagolima i ai ona tau fai le soifuaga ua o tatou i ai nei ona ua matua’i faigata lava.

“O tau o oloa ia o lea lava ua tatou maitauina pe a fua atu i aso ua alu e moni lava ae na taugofie le tele o vaega aemaise o auaunaga.

“Ae o nei aso a leai lava se vaega e galulue ma fa’amoemoe i ai ua o tatou iloa uma lava le taunu’uga tatou te o’o i ai pea tatou ola fa’alagolago tele ae le galulue pea mo le lelei o aiga.

Na ta’ua e Tele’a le tulaga e ao ona nofo silafia ai ma tapena ai le atunu’u.

“E ao ina o tatou iloa e le’o toe faigofie nei aso ua o tatou i ai, o le ala lea e ao ai lava ona galulue.

“O a meaalofa ua aumai mai le Atua ia o tatou fa’aaogaina lelei ma le tatau ma le mautinoa e ao lava ona o tatou fesoasoani le tasi le tasi mo le aga’i ai le lumanai.

“Ae o le tulaga ia i totonu o si o matou nu’u o lo’o sologa lelei lava mea uma i le alofa mai le Matai Sili.

“O lea lava le ta’iala o lo’o manuia ai so’o se taumafaiga i tua nei.

By Aruna Lolani 15 August 2017, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>