O LA’U TALA FO’I

14 May 2016, 12:00AM

1. Matauina i Tala Fou fai mai ua faamalōlō le Failautusi Aoao o le EFKS mai lana galuega. O lea la faaiuga- e foliga mai e le o fiafia i ai le Susuga i le Failautusi Aoao-o Afereti Uili.O lana mau-o lea faaiuga e leai se faavae.

Fai mai sa tatau ona latou taumafai muamua e fuafua lelei pe o i ai se mea moni o i totonu lea tuuaiga-ona faatoa fai ai lea o lea faaiuga. O lea la faaiuga-ua matua afaina ai le Failautusi Aoao muamua a le Ekalesia ma lona aiga-e tusa ai ma le faaaliga a le Faife’au o Afereti Uili.

Ia-atonu e moni le faife’au pe a fua i le ‘auga o lea tuuaiga-fai mai o se tuua’iga tau feusua’iga ma se tamaitai-e le o ta’ua lona suafa. A fua la i lea tuuaiga-o se tuua’iga matuiā-ae ailoga na faia i ai se suesuega poo se faamasinoga-ona faatoa fai ai lea o se faaiuga. 

Ae peita’i-afai o lea faaiuga e faavae i luga o se mea moni ua faamaonia e se faamasinoga-lea na fesiligia ai le Failautusi Aoao o le Ekalesia-ma le tama’ita’i na afaina ai-aemaise ai o le punavai na maua mai ai e le nusipepa na faasalauina-ia molimau; ia atonu ua tatau ma talafeagai le faaiuga ua fai e le Ekalesia-ae afai e leai se faamasinoga na faia e tusa ai ma lea mataupu-pe faaalia foi e le nusipepa na faasalalauina lea tala-le punavai poo le tagata na maua mai faamatalaga o lea mataupu ua tuua’ia ai le Failautusi Aoao a le Ekalesia-ua sala la ina to’atama’i le Failautusi Aoao lea ua faamalolo!

Ua le gata ina afaina o ia ma lona aiga-ae ua faapea foi ona ta’uvalea ai ona aiga uma ma ona nuu. Ae le gata i lea-afai o tala- e fai o latou apa’au- e le taumate la o lenei tala ua iloa e le lalolagi atoa!

Ae o le itu e sili ona faanoanoa ai-o le afaina ai o le Ekalesia pele a le Atua! O le fesili la-o le a tu’u ai lava faapea lenei mataupu pe afai o loo teena e le Failautusi Aoao lea ua faamalolo? E i ai se tasi e mafai ona oti e aunoa ma le faamaonia o sana sala?

Ia, o le lalolagi nei lea tatou te nonofo ai ma tutupu ai nei mea! Afai la e leai se amiotonu i lalo o le La-o ai la na te faia le amiotonu? Afai la ua siliga i le aufaigaluega totofi a le Atua-o ai la na te faia? O le a sou taofi? 

2. Matauina foi i Tala Fou fai mai ua manaomia e le Palemia se ta’utinoga mai le Kolisi o Avele- e le toe faia e tamaiti a’oga ni amioga mataga e pei ona faia e nisi o tamaiti a’oga o lea Kolisi.

Fai mai o se tasi lea o mana’oga na faamamafaina ananafi pe afai- e manaomia le toe tatalaina o le Kolisi a’o faagasolo fonotaga i le va o matua-faia’oga ma Tuilaepa.E tusa ai ma le Palemia-se’ia vagana ai ua faamaonia e tamaiti a’oga o le Kolisi o Avele- e le toe faia ia amioga-o le a mafai loa ona tapunia tumau le aoga.

O lea la fono sa faagasolo a’o tapunia pea le a’oga.E sili atu i le luasefulu matua, faia’oga ma tama tuai o le Kolisi sa auai i lea fono. E tusa ai ma sana faaaliga i nusipepa mulimuli ane ai-fai mai Tuilaepa- ua uma ona ia talosagaina tamtiti a’oga tuai o Avele ma faia’oga ina ia tapena ma sainia se ta’utinoga e faamanino lelei ai lo latou maliega.

Ia-o se tala umi lenei-ae o le mea moni ua aliali mai-o lea ua taunuu le upu a le atunuu-“E a le uga e tausili- ae tigaina ai le atigi”-o lona uiga- e a tamaiti tautalaiti e fai nei amioga mataga-ae faalumaina ma tigaina ai matua-faia’oga ma le Malo! O le a la sou taofi?

3. Matauina i Tala Fou nisi o faalavelave na tutupu i ala tetele e uia  vaitafe! O le itu la ua mautinoa-o nisi lava o avetaavale- e manatu māmā i ia auala-aemaise ai lava- o pasi ia o loo feavea’i ai tagata. I le taimi nei-ua fai sina umi o to’ulu pea le timu-ma o nisi o vaitafe sa le masani ona tatafe-ua tafe malosi!

Ae o le mea ua tupu ua pogai ai nei faalavelave-o avetaavale ina lē faautauta lelei. Afai o se ala e sopo’ia ai se vaitafe-e tatau lava ona tilotilo lelei muamua-pe lautele pe lauitiiti-ona fai fuafua lea i ai o lana fuafuaga-pe sopo’ia pe leai.

E tatau foi ona matua vaai lelei i le malosi o le tafe-ae le o le alu atu –alu loa. Atonu la o se itu lenei- e tatau ona tilotilo i ai le tulafono! O fea lava o i ai nei ituaiga o ala laupapa-e tatau ona tuu i ai ni faaaliga e lapata’ia ai avetaavale-ina ia saogalemu le pasese-poo lona lava aiga. 

Afai foi ua siliga ona faatino sea tulaga e le faalapotopotoga o loo gafa ma femalagaiga i ala tetele-ia atonu ua tatau loa i afioaga ma alalafaga o loo i ai ia ala laupapa-ona latou faatinoina lea galuega-aua lava le saogalemu o le atunuu femalagaa’i. Afai foi e fai ni faasilasilaga faapea i ia nofoaga -ae le aloa’ia e avetaavale-ona ave loa lea i le faamasinoga-ona o le toe faatautala lea i soifua o tagata! O le a sou taofi? 

14 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>