Manatu O Le Fa’atonu

By Faaliliu e Seagaitumua Tupuola 01 July 2016, 12:00AM

Tou te manatu ua i le Vaega Faa-Upufai e Puipuia Aia Tatau a Tagata le aia tatau e faatau atu ai a tatou aia tatau faale-tagata- i tagata ese?


A tatou mafaufau i ai, e ui lava ina aliali mai e faapea ua matua noatia lava le Palemia o Tuilaepa’s Saielele Malielegaoi i le faamoemoe tau le faatauina atu o Tusi Folau Samoa ma sitiseni i tagata maumea mai fafo,e ono mafai ona faapea o sia mea itiiti o le a le mafai ai ona maua sana moe i le po. 

Faamata e moni lona talitonuga o miliona ma miliona o tala o loo moe miti i ai o le a mafai e lana faigamalo ona maua e ala i le faatauina atu o tusi folau Samoa ma sitiseni, i tagata mauoloa mai fafo –o le a aveeseina ai ana mea o loo popole ai? Leai pe afai o le a faaauau poea ona ia fulitua i ai-i lea lava taimi-o le sasao o faiga pi’opi’o ia e tatau ona ia iloa-o le pogai atoa lea o le mata’utia o le mativa lea e mafua mai ai sauaga i soo se nofoaga?

O manatua le alii Asia lea na taunuu mai i le aso 23 o Aperila 1977 sa na faaaogaina se tusi folau Samoa na ia faatauina i Tonga, ae sa mulimuli ane ona falepuipui o ia i le Falepuipui i Tafaigata, ona o le avea o ia ma tagata malaga e le tusa ai ma le tulafono? 

O le taimi lena na amata ai mea uma 

Ma ona mapuna mai ai lea o le Tulafono o Sitiseni 2004.

I se taimi mulimuli ane ia Ianuari 2015, na faataatia ai e le malo i le laulau-a-fono a le Palemene Tulafono Tau Faaofi Tau Sitiseni ma le Tulafono Tau Faaofi o teugatupe faafaigaluega, na faailoa atu ai e le Tautua Party lana tete i ai, ma ua tala ai loa le va i le va o vaega faa-upufai e lua,a ma faateleina pea. 

O le ta’ita’i o le Vaega a le Tautua i lea taimi, o Palusalue Faapo II, na ia faailoa atu i le Palemene-o latou ua popole-talu ai-o ia tulafono tau faaofi o le a avea ma punavai o lu’itau matuia-ma e leai se tasi e mana’o i ai pe a avea ma tulafono..

Na ia faailoa atu fo’i o i latou ua popole talu ai o le faamoemoe o ia tulafono tau faaofi o le faatosina mai lea o tagata maumea mai fafo e teu faafaigaluega a latou tupe i totonu o Samoa, e ala i le ofoina atu ia i latou le faatauina o sitiseni Samoa ma tusi folau.  Fai mai a ia: E mafua ona o le taimi lava e avea ai na tagata mai fafo ma sitiseni Samoa, o le a latou mafai loa ona faatau fanua, ae o fanua Samoa o le oloa lea faale-aganuu e le faatauina. 

Ae pei ona tula’i mai, sa le aloa’ia e Tuilaepa, lea na tula’i ma osofa’ia le Itu Agai, ma fai mai…….o i latou e i ai na popolega o vale.”

”Ona ia faamanatu atu lea ia Palusalue e faapea o Samoa na faavae e tagata totoa, ae le o ni tagata pala’a’ai.

Fai mai a ia: “O le fefe o le faailoga lena o lo latou faavalevalea. E faaalia ai latou te le o manana’o e ati a’e le atunuu.

 “Latou te manana’o ia tumau pea le atunuu i le mativa. 

Na tuua’ia foi e Tuilaepa: “E leai se aoga e maua ai le lototele ae leai ni fai’ai. O a tatou aia tatau ma o tatou eleele o loo malu pui[ioa i lalo o le Faavae.

Ia-o se mea moni lena tulaga?

E mafai faapefea e se Faavae na fai e le tagata ona puipuia o ia mai le tagata lea ua faamoemoe i le taimi nei e matua soli ia malepe? 

Poo le a lava, i le taimi nei o lea ua matua manino mai e faapea o le mea moni, e i ai lava le mafaufau o Tuilaepa ia.

 Fai mai a ia: “O le fai mai ua latou fefefe ina nei avea a tatou aia tatau –e sese. Ua na ona faaalia ai latou te le malamalama i le tulafono.”

Ia tatou talanoa la i le tulafono. 

O le a le uiga ia te oe o lea faaupuga Vaega Faa-Upufai e Puipuia AiaTatau a Tagata? O le mea moni, o le a le mea o latou faailoa mai ia i tatou? 

O lona uiga ea o le pati lea na te puipuia aia tatau a tagata, ma e tusa ai la ma lena tulaga, o aia tatau a tagata o Samoa ia e tatau ona ia puipuia? 

Ma i le taimi nei-o le faigamalo a le Vaega Faa-Upufai e Puipuia Aia Tatau a Tagata, lea o loo alii-ta’ia i le Palemia o Tuilaepa , o lea ua na fuafuaina le faatauina atu o sitiseni Samoa ma tusi folau i tagata maumea mai fafo, o le a sou manatu? 

O le mea moni, e te manatu-o se mea lea e tatau ona fai e le malo i ona tagata? 

Ma o le mae’a la ona faia lea tulaga, o eleele faale-aganuu a Samoa-ia o loo faatatauina o le tofi o sitiseni Samoa uma, o le a faapea foi i le taimi nei ona faatauina atu. 

O le mea lea-faamata e le o le matua soli pala lea o le tulafono e faapea o tagata o lenei atunuu to’afilemu ma le to’amalie, o le a faamalosia e tauaveina e aunoa ma se faaseā i o latou olaga atoa, ma e faapea foi le ala i le tuugamau? 

I totonu o le Palemene i le vaiaso talu ai, o le faipule o Olo Fiti Vaai, lea na saunoa e fai ma sui o le Palemia o Tuilaepa, sa na tuuina atu se lapata’iga, fai mai: “O lo’u popolega e faapea afai o le tulafono tau faaofi  o Sitiseni Tau Teugatupe Faafaigaluega-e mo tagata mai fafo e teu faafaigaluega a latou tupe, o lona uiga foi la-o le a avanoa foi i latou  (mo sitiseni),”o lana faaaliga lea.

 “O le faaauau atu i le tupulaga lona lua ou te popole ai ona afai e mo na o tagata Samoa, ou te fai atu nei lava e tatala, aisea e taofi ai? 

Ae peitai tatou te le o talanoa i na o tagata Samoa. O lea (foi) tatou te talanoa e uiga i tagata mai fafo ia o le a avea ma sitiseni e ala ia latou teugatupe faafaigaluega ma mea faapena.”

E le tatau foi ona popole i ai le Tamaitai. Talu ai ona o le alaua tatou vaaia, ona pau tagata o le a saili ni sitiseni Samoa iinei, o tagata mai fafo –ia atonu ua uma ona fai a latou teugatupe faafaigaluega i lo tatou malo mo le faamoemoe ia maua atu sitiseni Samoa poo le a lava. .

Ae mo le Tautua Party i lena taimi, e manino mai le manatu o Tuilaepa, e maumau ai lona taimi, i le taumafai e matua tali atu ia i latou.

Fai mai a ia: “Afai ona pau o le mea o latou faia e faavae i luga o le latou fefe, o lona uiga, ua tatau ona faamavae uma Sui Auai o le Itu Agai.

Ma e pei ona tulai mai, e na o le toatolu sui auai o le Itu Aga ii totonu o le Palemene i aso nei, o lona uiga, atonu o i latou o totoe ai ua tatau ona fausia le lapataiga a Tuilaepa ma faamavae loa lava. 

I le taimi nei la-o sina mea faate’i itiiti lenei tatou te talanoa i ai. Mai le limaseulu –tolu o sui auai o le Palemene o Samoa i le taimi nei, o le limasefulu o loo faatasi ma le faigamalo o loo pulea le malo o le Vaega Faa-Upufai e Puipuia Aia Tatau a Tagata, ae na o le toatolu le Itu Agai..

I le taimi nei la-faamata e le o ta’u maia e ia fuainumera se tala uiga ese? 

Ta’u mai ia i matou sou manatu. 

Ae o loo tumau pea le fesili faatiga. 

Fai mai: I le taimi nei fai mai ua ta’ita’ia e le Palemia oTuilaepa Sailele Malieleagoi le Vaega Faa-Upufai e Puipuia Aia Tatau a Tagata i se tulaga uiga ese e le masani ai mo le sefulu-ono tausaga talu ai-i le ala atoa aga’i i se manumalo maoa’e talu ai nei-ma o aso nei-o loo ia pulea faatasi ai ma se numera tele maoa’e i totonu o le Palemene-,– o le a la e se mea o i ai e taofia ai o ia mai le pasia o ia Tulafono Tau Faaofi o Sitiseni ma Teugatupe Faafaigaluega-ia o loo tatou talanoa i ai? 

Leai se mea:

E leai se tasi o le a na fesiligia le fai o soo se isi mea. 

I se tasi faaupuga, o ia o le pule e pei ona tatou iloa uma.

Silasila i le Lipoti a le Pule ma Su’etusi Sili. E leai se tasi o toe kea i na lipoti. O na mea uma e i totonu o le taimi ua te’a, ma e tusa ai ma tagata uma ta’ito’atasi, o le taimi ua te’a e tatau ona nofo mau ai na mea. 

O le mea e tatau ona teu i mafaufau o tagata uma, o nei upu uiga ese mai lo tatou Palemia o Tuilaepa.

Fai mai aia o le atunuu lenei na faavae e alii totoa (ma) e le o ni tagata pala’a’ai,”ma i lona ta’ua o le Itu Agai, fai mai a ia o le fefe o le faailoga lena “o lo latou faavalevalea. O loo faaalia ai latou te le manana’o e ati a’e le atunuu. 

“Latou te ,manana’o ia tumau pea le mativa o le atunuu” Ma o le itu mulimuli, tatou toe mafaufau tasi lava i le popolega la ua toe tulai mai, e faapea o le faatauina atu o aia tatau faavae a lenei atunuu-o latou tusi folau, sitiseni ae mulimuli ane ai eleele faale-aganuu i tagata mai fafo-o le faigamalo a le Pati e Puipuia Aia Tatau a Tagata-o le a na tuuina atu i tatou uma lava o loo soifua i le asŏ, faapea ma i latou e le’i taunuu mai, i se olaga o le mata’utia o le le mautinoa ma le pagatia, o i luma.

Ia, o le a la sou finagalo? 

E te manatu o se faigamalo na te faaigoa o ia lava o le Vaega Faa-Uufai e Puiuia Aia Tatau a Tagata-e tusa ai ma soo se mea lava e ‘alo i ai-ua ia te ia le aia tatau e faatau atu ai aia tatau a tagata ia e tatau ona pulea tagata mai fafo? 

Faailoa mai ia i matou lou finagalo.

By Faaliliu e Seagaitumua Tupuola 01 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>