O TALATUU O ATUA

01 July 2016, 12:00AM

O le Tala ia Lautivunia ma Leutelelei’ite.

E to’alua atalii o le Tuitoga, o le igoa o le tama matua o Tuitoga, a’o le igoa o le tama la’ititi o Lautivunia. Fai mai na ula Lautivunia i le avā a lona uso matua o Tuitoga, ona ita ai lea o le Tuitoga. Ua iloa e Lautivunia ua ita lona uso ia te ia ona alu ai lea fai lana sua e ave i lona uso, ona ua ita ia te ia.

Ona avane lea o le lau o le Tolo ma le lau o le Fiso, ua ufiufi ai le Sua. E ui lava ina iloa e le Tuitoga ia mea ua fai, ae ua lē liliu lava lona ita. Ona toe fai foi lea o le isi Sua e Lautivunia ma toe ave i lona uso; o le fa’i ma le uso o le lei, ae ua le mafai lava ona liua le ita o le Tuitoga.

Ona alu ai lea o Lautivunia ma ‘eli le pu i lalo o lona vaa o le ‘alia; ona avane lea o Tao, ua faatutū mai lalo o le pu, ae u a’e i luga mata o Tao. Ona alu lea o Lauativunia ua oso i le Pu, ona oti ai lea. Sa le iloa e le Tuitoga ua oti lona uso, ona oso ai lea o lona alofa; ona fai atu lea i lona nuu- e o e su’e Lautivunia. Ona sau ai lea o le vaa i Samoa ma taunuu i Falefa i le maota o le Alii o Leutele. Ona fesili lea o Leutele:-“O fea e alu i ai le malaga?

Ona tali mai lea o le malaga-“Matou te o mai e su’e Laitivunia! Ona fai atu lea o Leutele- “Toe fo’i i Tonga- o Lautivunia o loo tanu i lalo o lona vaa i Tonga.” Ona fai mai lea o tagata Tonga:-‘Se tagata ina a poto tele o lenei tagata ma lona iite o mea lilo! Ona faapea atu lea o Leutele-ua maua lo’u igoa o “Leuteleleiite.”

O le Tofiga o Tauiliili i Amaile

Fai mai na usu Tuifiti ia Sinalefiti ona maua lea o Fatalevave; o le tama lenei fai mai e aitu toe tagata. Sa nofo lenei tama i ona matua; ona faapea lea o lona manatu- o le a sau i Samoa. Ona sau lea o lona vaa. Ona moe lea i le suati-ua ala mai ona toe faapea lea ua maua lona igoa o Fatamoeilesuati.

Na taunuu lana malaga i Mulifanua; ona alu a’e lea i le tuasivi o loo i ai le ala sopo i Atua; ona moe lea i gauta o le Tuamasaga i le pogai o le laau; ona maua ai foi lea o lona igoa o ‘Fatamoeipogai’. Ua toe alu le malaga ma moe i gauta o Saoluafata. Ua le moe i lalo a ua moe i le tumutumu o le niu; ona ala mai lea ua maua lona igoa o “Fatamoeita’ale”.

Ua toe alu le malaga ma moe i Vaimaga; ona usu lea ia Maugaoalii ona maua ai lea o Puatau. Ona alu ifo lea i lalo Fata ma ua alu nofo i Lotofaga. Ona usu ai lea i le afafaine o Sitagata faae’e le gafa o Leu ma Tauiliili ma lo la tuafafine o Talalaufala. Ona tofia lea o Tauiliili ma ua te’a i Amaile e nofo ai ma teu lelei- o le a te’a atu i ai le latou Tama e nofo ai, ae ositaulaga i ai Aiga. 

O Popoai ma Taufaito’a, o alo o Lealiifanovalevale mai Palauli ma Fililesalue-“igati” i le Tuitoga. Ona faatau-nonofo ai lea i le Tuitoga ona maua ai lea o Tuiavii, Togia lelei ma Puipuifatu. Ona te’a lea o Tuiavi’i ma Togialelei i Fiti, ua fao le Tuitoga, ae faate’a ese Puipuifatu na tofia e lo latou tama i le Tuitoga.

Ona filifili ai lea o Popoai ma Taufaito’a poo ai so la’ua e maliu. O a latou mavaega ia ma le Tuitoga: ‘A foua le nofo a Puipuifatu, ia maliu so la’ua’.Ona alu ai lea i Pulotu ma ta’u atu: ‘Ua foua le nofo. Ona maliu ai lea o Taufaito’a. E vaai mai le Tuitoga i Pulotu- ua alu atu Taufaito’a. Ona fai mai lea o le Alii-ua lelei, ua ‘ou iloa le mea ua e sau ai; ae sau ia-o le a ‘oulua o ma matagi ma uila ma faititili.

Tali atu le tamaiatai: ‘Aua, ne’i saua fua le laau tele i Tonga. Toe fai atu le Tuitoga:-‘Afai o lea, o le a ‘ou tuu atu nei lava faama’i, tou te o! Ae le mafai lava le tamaitai. Ona fai atu lea o le alii:’Ia sau ia-o le a sau nei le atalii o lou tuagane e igoa ia Tofeleifagao’o, lua te o! A sau nei le fuatau a Tonga- ua faasaga le fana a Tofele i le Lagi, ona fana lea ma pa’ū ifo tonu i le tumua’i o Togialelei ma maliu ai. Ona te’a mai lea o le Tuiavii mai Fiti, ua oti lona uso i le fuatau.

Ua sauni foi o le a sau i Samoa, ae fai ane le Pipili: ‘Aua e te alu, o lou uso lena e tanu i lalo ua oti i le fuatau. Ona alu lea o Tuiavii ua laga i luga lona uso, ma toe tanu lelei i Tonga, ae sau i Samoa!

01 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>