O LA’U TALA FO’I

14 August 2016, 12:00AM

1.Matauina i Tala Fou se Ulutala fai mai –“ua faatu e Fiti se tala faasolopito o le Olimepeka”-ma o le pine la o lea ulutala-fai mai o lea faatoa maua e Fiti se Pine Auro mai Taaloga o le Olimepeka!

Fai mai sa pepese leo tetele le ‘au a Fiti mai o latou loto-ona o le maoa’e o lo latou faatinoina o lea taaloga-ua maua ai le latou Pine Auro muamua mai Taaloga o le Olimepeka. Ia-afai ua pepese fiafia Fiti-e mafai foi e Samoa ona pepese leotetele faapea-pe ana faapea sa tatou auai ma manumalo!

A tatou tilotilo la i tua i le Ta’ito’afitu a le Manu Samoa e pei ona sau ai-sa tele lava ina to’ilalo ai Fiti-i nisi o Taaloga faitauina faapea! Afai la ua faamanuiaina Fiti-atonu ua lava ma totoe lea e fai ma sui o tatou uma mai le Pasefika! Ae o le fesili-afai sa tulaga maualuga le Taitoafitu a le Manu Samoa i aso ua mavae-aisea ua faapenei ai?

Afai o i ai se faaletonu-o le a le pogai ua le mafai ai ona fo’ia-ae tuu le Manu Samoa Ta’ito’afitu  e fai e ni Tama Taalo tuai  sa lakapi-ona faatoa toe mafai lea ona foi i le tulaga lelei sa i ai muamua-ma tatou mafai ai ona ‘ausia le tulaga lea ua o’o i ai Fiti! O le a sou taofi?

2. Matauina foi ma le fiafia le lapataiga a le Palemia mo matua-a’o sauni atu le atunuu e faamanatu le “Aso o Tama”-i Samoa nei. O le lapata’iga la a Tuilaepa mo matua uma-“ia una’i a latou fanau e faaalu tupe latou te le o maua-mo latou tamā.

O le aano moni la o le fautuaga a le Palemia-“ia faaaoga e tagata na o tupe o ia i latou.”A toe faaupu la le manatu o le Palemia-“ia faaaoga ma le poto tupe”Ia-atonu ua fetaui ma talafeaga lea tuu-a-lalo-ae o le fesili-“E faapefea pe a fai atu ae fai mai le atunuu pe aisea na le faaaluina ai faapena e lana faigamalo-le faitau miliona ma miliona o tupe a le atunuu ia ua maumau?

A toe faaupu la i se isi faaupuga-o le fesili-“Faamata e tutusa le fautuaga a le Palemia ma le upu a le isi toeaina fai mai-“Fai le mea lea ou te fai atu e fai-ae ‘aua tou te faia le mea lea ou te faia.”! O le a sou taofi?

3. Matauina foi i Tala Fou le manaia ma le toatele o alo ma fanau a le atunuu-na famanatuina le taunuuga manuia o a latou aoaoga i mataupu tau le Tekonolosi! O le vaai tino la i lea tulaga-ona faapea ai lea o se manatu.

Afai ae tofu galuega uma nei alo ma fanau a le atunuu-e tusa ai ma o latou Tusi Pasi tau le aoaoina i lea mataupu-o lona uiga-o se fesoasoani tele lea i le atunuu-ae manuia ai o latou aiga! Afai la o le Tekonolosi o loo faatauaina e le lalolagi i ona po nei mo soo se mea tau le atiina a’e ma mea uma lava-o le mea moni la- e tatau ona tatou faafetaia le Atua-ona o lea ua tino mai le faamanuiaina o taumafaiga a nei alo ma fanau a le atunuu. Afai la e manuia ai le atunuu-e tatau foi la ona manuia ai tagata uma o le atunuu.

O le a sou taofi? 

4.Matauina foi i Tala Fou se Ulutala fai mai-“Ua pa’ia e le agalelei -se A’oga…”ma o lea la ulutala e faasino i le A’oga Fiamalamalama-lea na tuuina atu i ai e le Yazaki Samoa se meaalofa ananafi….!

Afai la o lea Aoga ua faamanuiaina o le “Fiamalamalama School”-o lona uiga-e tatau ona matua faafetaia le Yazaki Samoa-ona o lenei alofa maoa’e mo nai alo ma fanau a le atunuu-e le atoatoa le malosi. Ia-matou te le tau selu atu Yazaki Samoa-ae afai o lau lava lea masani o le “Alofa Fua”-o lona uiga-o le Atua na musuia outou finagalo-ae o le Yazaki Samoa-na faatinoina! Afai la e moomia e le Atua le alofa o le tasi i le isi-ua tatau la ma onomea ona viia le Atua-ona o lenei alofa tula’i-ua aao i ai le Yazaki Samoa! O le a sou taofi? 

14 August 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>