O se fa’amanuiaga le aiga
O le maua ai o le avanoa o le Fofoga o Samoa i le aso ananafi ma le tamā i a James Fa’asuaga, o se avanoa tele lea mo ia e fa’asoa mai ai fo’i nisi o vaega o lo’o mafai ona soifua ai ma le aiga i totonu o le afio’aga i Pata Falelatai.
“E pei ona outou maitau mai ia o lea o lo’o o matou galulue atu e fau lo matou fale ona o lea fa’atoa o matou omai iinei.
“E pei o le taimi atoa lava ia o totonu o le ‘a’ai sa i ai ma le aiga ma le fanau, ae ua tumu fo’i ia lea la ua tapena mai ai lenei pito o le nu’u.
“E le tele lava se fale, aua o lea lava le olaga olo’o ua tatou i ai nei, ia e amata mai lava i lalo mea uma ia o le manuia fo’i lea.
“Ia o lo’o tatou tau fai ioe i le faigata o lo’o ua i ai nei le soifuaga ae ao lava ona o tatou galulue fa’atasi e atia’e o tatou aiga.
Na ia fa’ailoa o nisi o lo’o ua faitio i le tulaga e pei ona i ai le soifuaga ae o se itu e ao lava ona galulue i ai mo se suiga lelei.
“Ia e le fa’apea mai e mativa ae na’o le nofonofo lava ma fa’atali ni tupe e pau’u’ mai le lagi , e leai se tulaga fa’apena e mafai ona tupu.
“Ia o lea la e ao ai lava ona galulue pea.
“Ia o nei aso ua tau fainonofo uma tama ma tinā i le fale ae ua leai se isi e faigaluega mo le tausiaina o le aiga.
“Ia o lo ma aiga e leai se isi faigaluega ae o lo’o i ai la’u fa’ato’aga mo le tausia ai o le aiga.
“O le uiga o la’u tala ia a le galue lona uiga e falolo le aiga ma le fanau.
Na ia fa’ailoa o le itu o le tele ai o le mau atina’e o lo’o ua i ai nei o lo’o ua fesoasoani tele mo le atunu’u.
“Ia o lo’o alofa mai lava le Atua , ma o lea lava le manuia o lo’o ua i ai.
“Tatou o ai ia fa’apea i lea tulaga ua i ai le taimi lenei.