Samoa ne’i Galo - Talatu’u ma Tala o le Vavau a Samoa

18 April 2016, 12:00AM

E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa

O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i vaiaso ta’itasi.

O LE FE’E AITU

Upu Tomua:

E to’atele ni Tusitala ua mae’a tusitusia mau e uiga i le Fe’e. O le moni o manatu, o loo faaalia manino i ia tusitusiga. Soo se tala e tele i ai sailiga, o le mea lelei lea aua e toe teuteu ma toe faatulaga ai taofi.

O le a olaola pea pei o se punavai, e utuvai i ai le au i luma o tupulaga o se atunuu. Anamua, sa i ai se Fe’e na mau i gauta o nu’u o le Vaimauga se vaega o le Taulaga o Apia i Upolu. Na ta’ua o le Aitu aua sa feliuliua’i.

Molimau fo’i le aumatutua o nu’u ua ta’ua, a o’o i le ao ua tino i le Fe’e, ae o le po, na liu tagata loa lea. 

E maniti ma mogea tino ona o se tasi alii matua na faamatala e faapea: o se vaaiga mata’utia ona e uiga ese le lapoa o le Fe’e e tusa ma upu a tua’a ua mavae. E foliga lava o se sauali’i. Sa feliuliua’i le tino Fe’e, e mumu pe a i le sami aemaise i le po. Ua faaalia fo’i e tele foliga eseese e liliu i ai le Fee, ma atili ai ona faamata’u i tagata. 

O le Fe’e Aitu e sau mai Fiti. O le ave atu o tala o nisi toa malolosi o Samoa, le mafuaaga lea na sau ai na te foua. E faapena le taofi o le alii Tusitala o C.Stuebel. O le taofi i le alii matua o Vailima, o Sooalo e pei ona ia lagolago mai, sa osi le nu’u o le Fe’e, ma sai fai fo’i aso o le Fe’e.

O le toai o le Fe’e i gata o Vaimauga, na ia alu ai lea i le alatafe o le vai ua igoa o Vaisigano agai lava i le tuasivi. O iai le manatu o e na faamatala, o le fausia o le Fale-o le-Fe’e i gauta, na toatele aitu na auai i le galuega.

O le vaaiga i le Ana na mau ai le Fe’e, o se foliga lava o se fale. E ofoofogia i le vaai ia papa o loo ato ai le fale, pei na tofia mai i ni mea faigaluega ma’ai. 

Fai mai le taofi, na umi ma tele ni tausaga sa i ai le Aitu Fe’e i Samoa. Na fai ma Atua na tapuai i ai i po o le Vavau. Sa itea ma iloa faailoga o le lelei poo le le manuia o se faamoemoe i aso o taua.

Le Fe’e fo’i lenei na fai ana usuga i tama’ita’i Samoa. Nisi aso na alu i Savaii ma nofo ai, aemaise o ni nu’u o le itu ua taua o le Gagaifomauga. Sa o’o ane fo’i i le itu Faasaleleaga. O le molimau faamaoni na faaalia, na toe folau ese le Fe’e ma fo’i i le nu’u na sau ai, o Fiti lea. E oo mai i aso nei, o loo i ai le Fale-o-le-Fe’e i gauta o le Vaimauga. O le a liliu i le Tala. 

O LE TALA

“Funa e, a vele lava na vao i le la”

O le lu’i lava le ala mai o le Fe’e na ‘auvasa mamao mai ai ona o tala ave i nisi toa o Samoa aemaise o Vaea lea na ia sii le vaa o le auso mai Fiti ma sili i le tumutumu o laau.

O le aitu le Fe’e ma o ia lava o le Tuifiti. O le aasa o lona loto toa na te fia faatoilaloina toa o Samoa na ia faamoemoe o le a taunuu lava. 

O gataifale o le Vaimauga na to’ai muamua i ai le Fe’e ona faalepa ai lea ma nofo ai e tau saili se ala e na te iloa ai poo fea tonu o i ai toa e taua atu o le atunuu.

Sa iloa gofie ogasami na ta’oto ai le Fe’e ona sa mumu ‘ula’ula lena vaega o le sami ma sa iteite tagata poo le a lea vaaiga fou o le gataifale.

O le manatu fo’i o Samoa anamua e le na’o le Fe’e na aau mai ae sa faatasi ma ia nisi o aitu o le Atu Fiti ma o le ala lea na faaopoopoina ai lona malosi.

O Vaisigano o le vaitafe lea o loo tau lona mulivai i le taulaga o Apia ma e faamaonia lea i aso o tafega aua e ena atoa le gataifale atoa ma le taetafe e lilofia ai. O le ala lea na alu ai le Fe’e nisi ogavai mo lona ala ma agai lava i le Tuasivi.

Le mafuaaga lea o le isi igoa o le vai o “Soaga”, talu le fe’e lenei. Na mautu le aitu i uta ona la’u atu lea o puga tetele o le sami mo lona nofoaga. E mamao le nofoaga ma e i gauta tonu o Magiagi.

O le vaaiga i aso nei, o se fale lava e foliga o se Ana e ato i oga papa maa peiseai na totofi mai ni papa tetele. O loo taatia nisi puna tetele i autafa o le vaitafe e tulata i le nofoaga. Ua taua lea Vavau, o le “Fale-o-le-Fe’e”.

O le aitu o le Fe’e, ae liu tagata fo’i e pei ona o loo ta’ua i upu tomua o lenei Tala. E le gata sa tu le malo o le Fe’e, fai lona nu’u, aemaise i lea vaega o le Vaimauga i ona aso sa lei tele na’ua tagata.

Ae sa faapea fo’i ona fai usuga a le Aitu o le Fe’e i nisi tamaita’i o Samoa. O le a oto se manatu i le usuga a le Aitu Fe’e liu tagata, sei tau i le upu ua fai ma Auga o le Tala. 

O le mau a Sooalo i le nu’u o Vailima. 

Na faiava le Fe’e ia Sinamomoemaleula o le tama’ia’i o Falelatai, ma la faatasi i le mea sa nofo ai. O le upu a le Fe’e, i le aufaatosaga “a fanau se pepe a’o se teine, ‘aua nei leoa, ae a ola lona tolaua o se tama, ona tapisa lea ma fai se muamuao.

Na ola le fafine o le teine, ona le apisa lea pe muao. Sa toe fanau le fafine o le tama ona faato’a muao lea ma pisao. Ua soso’o alo o le Aitu liu tagata.

Sa faaigoa le teine ia Sina, a ua igoa le tama i le suafa o le na ta’ua ma faamatala le mau, aua ua soso’o ona alo i le tama’ita’i. O le tasi lenei o taofi faaalia.

Na aau le Fe’e i Savaii, taunuu i gatai o Safune ona taoto fo’i lea i gataifale o ia nu’u i le po, ma iloa ai e tagata le mumu o lea ogasami. O le ao e alu ifo i uta ona pipii lea i le tafa e lata i le sami.

O Samauga o le pitonuu o Safune le mea tonu lea sa mau ai le Fe’e, o le nu’u fo’i lea i ai le suafa e pei ona taua ma o le talitonuga lava e mafua lava i le Tala lenei. Atonu e leai se isi nu’u o le Atu Samoa e iai le suafa pei ona taua, ua na o Vailima ma Samauga lea i Savaii.

Na tuu alea o Sisifo e le Fe’e ae alu ane i le itu Faasaleleaga ma nofo i gatai o le nu’u o Iva. Sa faapea fo’i ona iloa le taoto o le Aitu i gatai o ia nu’u i le po. I le o i ai upu o loo logomalie i faalagiga o ia afioaga, faapea na pogai ona o le Tala lenei. Mulimuli ane, na toe fo’i le Fe’e i le nofoaga ua taua muamua. 

Talu ai o tala logologoa ia Samoa e uiga i le Feíe, na alu ane ai se malaga a alii e toalua mai Safata, o le itu lea i sauté o Vaimauga i le Tuamasaga, le vaega ogatotonu o le motu o Upolu o toa foài i laua e fia vaai i le Aitu.

Le malaga lea na tau ane ua lata i laua i le nofoaga o le Feie ao velevele vao le teine o Sina i le vevela o le la i tafafale o lo latou aiga. 

“Funa, a vele lava na vao i le la”. O le upu lea a alii malaga na fai i le teine o Sina. Sa fesili le tina o le teine, “O le a le tala a alii ia te oe?” Sa faamatala e Sinai  lona tina, ona faapea lea o le fafine lelei, ua maua le soa o lou igoa, o le a “Sina le Avele oe”.

O le finagalo o le alii matua o Sooalo, o le pogai lea o le igoa Sina le Avele, pei ua igoa ai le ogaeleele o i ai nei le aoga i Vailima, o Avele po o Sina le Avele. 

E moni lava le taofi, na toe tuua laufanua o Samoa e le Fe’e poo le Tuifiti, a ua toe folau atu i le Atu Fiti. O mea ua taua, e fai ma pine faamau e faamaonia ai le Tala i ona po o le Vavau.  

Manatu Fa’aopoopo:

1. O loo faaalia le taofi o C. Steubel, Tala o le Vavau (Myths and Legends of Samoa 1976 e faapea: e mai Fiti le Fe’e na i Samoa. O Taga o le faoa ‘aa’i lea anamua sa i gauta o le Vaimauga sa masani ona taeele ai fafine i le vai lea e tafe lata ane i le mea na mau ai le Fe’e.

O Pava o le Aitu sa mau e lata i le mea na avea ma nofoaga o le Fe’e lenei. E tutusa le manatu o le alii Tusitala ma le su’esu’ega lenei aua sa avea le Fe’e ma Atua na tapuai i ai lea vaega o tagata i po anamua.

A laei’au se taua, e faalagolago manatu o tagata i se faaaliga mai lo latou Atua. Taimi o le ‘a’ava poo aso o le manino, pe manumalo poo le nofo toilalo fo’i. 

2. Sa faaali fo’i se taofi o Sooalo o Sina le Avele na maliu ona tanu lea i le mea o iai nei le Aoga o Avele, peitai na liutofaga i le tasi fanua o ona aiga.

E le auiliiliina fo’i se manatu i nisi suafa poo igoa matai na faapogai i le Tala nei aemaise fo’i o ni vaega o faalupega o se nu’u i Savaii ina nei fai ma lape o agaga faaosofia e faitau pe tuua’ina ai se galuega lelei. 

3. Ua faamaonia i sailiga, e ui ina o le Tala lenei e iloa e le toatele o le autalaia o Samoa ae ua le tele ni tusitusiga e faamatalaina ai pei o le alii o C.Steubel i ana sa’iliiliga.

Amata mai po o le vavau e o’o mai lava i aso nei e iloga lava se ‘aiga o le Vaimauga i Vailima e fitoi tonu i ai aga o le Tala. 

4. Ma’eu fo’i le taua o ni mea tutupu anamua lava aua na fofoa mai ai tulaga lelei o loo sapi ai augatupulaga seia tau mai i aso nei. 

E anoa’i, e lautele fo’i le tala, a ua na o ni nai vaega ua faamatalaina ina ia apoia se faavae moni mo tagatanuu aua a taeao, ma lau faitau le gaganaina. 

Uiga o Upu:

Ua faatatauina uiga o upu i le faaaogaina i le Tala 

‘aufaatosaga – tama’ita’i e faafanauina fafine poo tina 

‘auga – autu, faapogai, faatauaina, tumutumuga

Aso o le aava – taimi vevesi, taua, maseiga, feeseeseaiga 

‘ena atoa – lilofia atoa, lanu enaena atoa, lilo i le palapala 

I le tafa – autafa, vaega alalo o se mauga, auvaemauga

Oto se manatu – faaali, faailoa, tautino se taofi, agai i ai 

Faalepa – taoto, nofo, mau i le sami, taotooto 

Faanuupo – aso anamua, tu faa-anamua, aso o le pogisa 

Le soa o lou igoa – se faaopoopoga, faapipii, faaopoopo atu 

Loloa – umi, ola umi, faafualeva, tele aso 

Lui – foufou, foua, faualuga, aleale 

Mua o – faailoa atu, pisao, faailo, vavao, 

Taetafe – otaota o tafega, gasu o le tafe o le vai 

Totofi – totofi, vete, gaosia, maua mai ai 

Tu le malo – pulea, puleaga faatasi, puleina, pulega 

Upu Faatusa:

1. “Se’i tala le ati”

a) o se mea e nofo sauniuni i ai 

e) ia mataala ma mataalia 

 Sina le Avele:

Ua le o se muagagana a ua na o se igoa e faasasagi lona tau’ga. Ua maea ona faamatala le pogai. Ua tuufaatasi le ‘A’ ma le ‘Vele’ ona maua lea o le igoa ‘Avele’. Ua faamatalaina le igoa Sina ona ta’u lea – ‘Sina le Avele’.

Faamatalaina:

Sooalo o Vailima i le itumalo o Vaimauga o Upolu. Na maua fo’i se faamatalaga mai Samauga i le suafa Sooalo. 

 

18 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>