Tu’ua’ia e Tuilaepa ave pasi

By Deidre Tautua-Fanene 17 February 2018, 12:00AM

Ua tu’ua’ia e le Palemia, Tuilaepa Sailele Malielegaoi le lē magafagafa o ave pasi ma mafua’aga autu o le tele ai o fa’alavelave i luga o le auala.

 O lana saunoaga lea ina ua fesiligia mo sona finagalo e tusa ai ma le mau a le to’atele ina ia aveese loa pasi laupapa.

E tusa ai ma le fa’alavelave mata’utia lea sa tula’i mai i Faleula lea na ma’imau ai soifua o nisi.

 “O le lē fa’autauta o ave pasi o le mafua’aga lea o le tele ai o fa’alavelave i luga o le auala,” o lana saunoaga lea.

Sa ia fa’ailoa o ave pasi le mafua’aga e tele ai ina lavevea pasi.

“E le o pasi laupapa le mafuaaga,” o lana saunoaga lea.

“Afai ae tu atu le malo e aveese pasi laupapa o lona uiga o le a le toe i ani pasi e feoa’i mo le mamalu o le atunu’u.

“E lē o pasi le mafua’aga, o ave pasi ona o le o le mafuafua i luga o le auala.

 “O le fa’alavelave lea na tula’i mai, sa maua maua mai le pasi pe tusa ma le 100 mita mai le nofoaga sa tupu ai le fa’alavelave ma o i’ina e fa’amaonia mai ai sa saoasaoa le alu a le pasi.”

O le fa’alavelave lea sa ta’ua e Tuilaepa o le fa’alavelave lea na tula’i mai i Faleula i le masina na se’i mavae atu nei lea sa fa’apea na ta’avalevale fa’atolu ai le pasi ma ma’imau ai ni soifua se to’atolu.

E tusa ai ma fa’amaumauga a le matagaluega o leoleo, e to’a 46 le pasese a le pasi fa’atasi ai ma soifua ia na ma’imau.

O le ave pasi ma nai tinā matutua se to’alua lea sa maliliu ai i lea fa’alavelave.

“I le saunoaga a Tuilaepa sa ia fa’ailoa mai ai o le sees o le ave pasi ae le o lē e onaina le pasi po’o le pasi fo’i.

Sa ia saunoa fo’i e ao i le pulega o auala ona fa’amausalī tausaga e tatau ai ona fa’atulafonina le ave ta’avale i luga o le auala.

“E tatau ona 30 tausaga o le tagata fa’atoa mafai lea ona aveina le pasi.

“E foliga mai o le au laiti lea malovale i luga o le auala ma o le tulaga la lea e o’o i ai.”

Sa ia fa’ailoa fo’i e i ai le vaega a le pasese e tatu ona fai.

“E le tatau ona e nofoa’i pe a e va’ai atu e saoasaoa le alu a le pasi.

“E tatau ona taofi lelei le pasi ma otegia le ave pasi.

“Fai i le ave pasi o le a lipoti i le ofisa o leoleo fa’apea ai ma le e onaina le pasi.”

Sa ia fautuaina fo’i le pulega o auala ina ia toe iloilo lelei a latou tulafono a’o le’i tu’uina atu laisene aveta’avale i le mamalu o le atunu’u.

By Deidre Tautua-Fanene 17 February 2018, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>