E faigofie le olaga i Savai’i

By Ilia L Likou 24 October 2016, 12:00AM

O le talitonuga o le tamā i a Le’oa Sasalu o Patamea i Savai’i, e sili atu le olaga i totonu o nu’u ma afio’aga nai lo  nisi o vaega o le atunu’u o lo’o tu lalata i le taulaga.

E fa’avae lona talitonuga i le tele ai o   suiga o lo’o ua silasila ai i le taimi lenei pe a fa’atusatusa atu i aso ua mavae.

O le taimi lenei o lo’o tele ina fa’alagolago  aiga i nisi o vaega e pei o fa’ato’aga ma e pei o lea lava le faigofie ai o le olaga i Savai’i.

 “O lo’u ia lea iloa i ai, e pei e sili atu totonu i nu’u ma afioa’aga aua e mamalu faiganu’u ia e leai lava ni fa’alavelave tetele e alia’e mai e saogalemu le tele o vaega.

 “O le to’atele e latou te fai mai o le olaga i totonu o afio’aga e faigata tele, ia ae leai lava se tulaga fa’apea o a ni vaega tetele o faigata.

“E tele lava ina solosolo lelei vaega uma ma e saogalemu lava i le tele  o vaega.

 “Ia o Apia i lo’u iloa i ai , ia o le tupe lava e talanoa ai le olaga ma le soifuaga i Apia, ae o iinei ia o le maua lava fanua e galue ai ma tōtō ai  tiapula , ia a mana’o lava e ave le maketi pe ā o’o le taimi lelei e mafai ona fa’atau atu ai ia o lena lava ae a leai ia ua fa’aaoga mo le tausiga ai o aiga.

Na ia taua o le isi itu lelei ai afio’aga i tua o le va’aia ai pea o tu ma aganu’u masani o le atunu’u.

 “Ia e moni lava ua tele suiga, ae le’o mafai ai ona maluelue le tele o nisi o vaega i Samoa nei.

 “E pei ona maitaulia ai ia ua i ai nisi o vaega o le aganu’u ua le toe mamalu i lenei vaitau ua i tatou i ai.

 “O tatou lava e leiloa atu ai nei tu ma aga , o tatou fo’i e olaola ai pea.

 O le isi itu taua na ia fa’ailoa o le nonofo ai pea o fanau i le soifuaga i afio’aga ta’itasi o le a maua ai pea le so’otaga vavalalata ma matua.

“Ia o se tasi lea o vaega e ao ona silasila pea i ai le malo, o le fa’aleleia ai o a’o’aoga i Savai’i ma avanoa faigaluega.

“Aua o mafua’aga nei e tele ina feoa’i solo ai tupulaga ma fanau ma galo ai le olaga na ola ane ai ae ua o atu i Upolu ma nonofo ai i aiga ia ma tula’i mai ai nisi o fa’afitauli.

 “O le vaega taua e pei ona masani ona fa’alogo i ai, a lelei i Upolu e lelei fo’i mo Savai’i.

By Ilia L Likou 24 October 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>