Ali’i-taeao le Afio’aga o Vailele e fa’afeiloa’i matai fou

Ripotia e Deidre Fanene

Fa’aliliu e Maiava

 

E to’asefulu sui o le Aiga Sa-Tuimatavu’i ‘Aipili o le afio’aga o Vailele na fa’asuafaina i le suafa maualuga o Te’omatavu’i i Vailele lava i le Aso Faraile.

ADVERTISEMENT

Na fa’ailoa mai i le Sunday Samoan e se sui o le Aiga, o Te’omatavu’i Lealailepule Maisa, o se taimi fiafia tele i le Aiga Sa-Tuimatavu’i ona ua fa’ataunu’uina ma le manuia le fa’amoemoe sa lavasi iai.

“Ua leva o tau-fuafua lenei fa’amoemoe o le Aiga,” o lana fa’aaliga lea. “Ua tausaga o fuafua lenei fa’amoemoe ma o le fiafia sili lea o le Aiga, ua tau-lau ma ua taunu’u le fa’amoemoe.

“Na tonu i le ‘Au-matutua o le aiga, ua talafegai i le taimi nei ona fai o nisi matai ona ua tupu ma ola le aiga. E tu-ma-salalau i le lalolagi aoao suli ma feoi o lenei aiga ma ua alaga-tatau ai ona fa’atele nisi e fesoasoani i le va’aiga o le aiga ae maise le aga’i i luma o le soifuaga.”

Na ta’ua fo’i e Te’omatavu’i Maisa, e le itiiti le sao aoga o i latou ua sao i matau, aua atina’e fai mo le aga’i i luma.

“O latou tonu nei o mamao le silasila ma ta’ita’ia le aiga i taimi uma,” o lana fa’aaliga lea. “O le fa’amoemoe ‘autu lava o se aiga, ia soifua ma ola fa’atasi i le fealofani, e tutu-fa’atasi i mea-fai ae maise le fa’amautuina o le a’oa’oina lelei o fanau a le aiga mo le lumana’i manuia.” 

O suafa fou na fa’apa’ia, sa fautuaina malosi ina ia ta’ita’i ma le poto, ta’ita’i ma le alofa le aiga i mea uma. O matai fou sa fa’asuafaina i le suafa Te’omatavu’i, e aofia ai Peseta Sesilia Sala, le faletua o le Minisita o Leoleo, o Sala Fata Pinati. 

O SUI O LE AIGA NA FA’ASUAFAINA I LE SUAFA TE’OMATAVU’I:  o Danny Aumua, Pauga Talalelei Pauga, Filipo Ueta Sitaina, Lei’ataua, Percy Kelsall, Peseta Sesilia Salā, Faimafili Samoa, Lealailepule Maisa, Lealasina Lesona ma Lealaoo Lautoa.

ADVERTISEMENT
Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?