Tatau onā toe si’itia totogi o tagata faigāluega
O le si’itaga o totogi o le tagata faigaluega o le malō, o se matāupu ua leva ona finaua’ina i totonu o le faigāmālō o lo’o ua iai nei.
O le tele o finauga ina ia si’itia le totogi amata o le tagata faigāluega lea o lo’o tumau pea i le $2.30 i le itulā.
Fuafua lea i le maualuga o le tau o le soifuāga o lo’o iai nei, auā o le tūmau ai pea o le totogi amata o lo’o iai nei, o le fa’aauau ai foi lea ona feagai le atunu’u ma faigatā o le soifuāga.
I le fa’atalatalanoaga o le Fofoga o Samoa ma le tamā ia Tagaloa Sa’e mai le afio’aga o Falelauniu –Tai na ia tā’ua ai ua tatau i le malō ona toe iloilo le si’itaga o totogi o tagata faigāluega.
Auā o lona talitonuga o le lava o le seleni, o le mafai fo’i lea i tagata o le atunu’u ona ola i se olāga fiafia.
Nā ia tā’ua fo’i e lē talafeāgai foi le si’itia o tau o le soifuāga ae tumau pea totogi o tagata faigāluega.
“O le fa’afitāuli sili lava, o le lē lava o le fa’asoa i le itu tau seleni auā le tausiga o le aiga i aso ta’itasi.”
“O le olāga leā tatou te ola ai, e pei lava o le olāga i Niu Sila, e totogi mea uma, o le pili o le vai, pili o le moli, fanua ma meā uma lava faapēnā.”
Sāunoa le tama ia Tagaloa, e tusa lava po’o leā le to’atele o tagata faigāluega o le lātou aiga, e lē taitai lava ona lava le fa’asoā o lona aiga.
“E na’o lo’u to’alua e faiā’oga i le ā’oga fa’ata’ita’i, ae o la’u fanau faigāluega ua faito’alua uma lava ae nonofo lava i āiga o lātou ta’ito’alua, e mōni lava lā e āsiāsi mai e āumai meātaumafa auā le fofoga taumafa o le matou aiga.”
Nā fa’amānino foi e le tamā iā Tagaloa ua tātāu i le malō ona ave le fa’amuamua i ōna tagata, auā le sāilia lea o ni atina’e lelei, e fa’afaigōfie ai le soifūāga o lo’o iai.
O se tasi o tūlaga e ao i le malō onā fa’amuamua, fa’ataugōfie le soifuāga, ina ia māfai e tagata o Samoa ona ola fiafia ai.
A’emaise lava le tūlaga o fanuā mō tagata e le tatau ona faigātā ona sāilia auā o se tasi lea o itu e faigatā o lo’o feāgai ma tagata o le tatou atunu’u.
O le tulāga lea e lē māfai ona maua e aunoa ma le itu tau seleni o le ala fo’i lena e ala ai ona fa’afaigātā ona maua.
Na sānoa foi le tamā ia Tagaloa ua tātaū lava i le malō ona toe iloiloa le tulāga i totogi o tagata faigāluega.
Onā o le olāga lea ua tatou iai nei ua leai lava se ‘ese’esega ma le olga i fafo o i le tele o mea e totogi ae fa’apea foi le fānau a’oga.
“Auā a si’itia le totogi o tagata faigāluega, e avea lea ma fa’amāmā avega i olaga o le tagata o le tatou atunu’u fa’apea foi le soifuāga o lo’o tātou ōla ai nei.
O le tamā iā Tagaloa ua siliā ma le lua tausaga o āumau ai i Falelauniu ae o ia ma lona aiga e mai le motu tele i Salafai.
O sē tasi o tūlaga sā ta’ua e le tamā ia Tagaloa, ua tatau i le malō ona silasila i le itu tau auāla mo le lātou pitonu’u.
“Uā fai tele sinā leva talu ona fa’apea le mātou au’ala, ae le’o iloa fo’i po’o feā o iai matou faipule, ae ua tatau ona tagata’gai i leā tūlaga.