lauga - “O le Olataga e leai sona noataga”

By Petaia Setu 24 July 2016, 12:00AM

(Galuega.5:17-25)

E pei ua masani ai le soifuaga nei, soo se mea e iai lelei, e le ’asa ma le faasalāvei. O le ala foi lea o le Saina loaloa o o tatou pisinisi ma faleoloa, auā ’a tau lelei a’e le isi Samoa, ae faamoo’amo’a e se isi foi Samoa.

Ona sa’o ai lea o se tasi tamaloa, “ua koe oki lava kakou iā kakou!” O le ituaiga loto lea, e faigofie ona sao i le va o le isi tagata ma le isi tagata. Ae le mafai ona faatū ’ala ai se tagata i le Atua.

E le i mafaia e pulega faale malo ma tulafono faale lotu a Iutaia ona taofi le afio mai o le Atua i le lalolagi e faaola le tagata agasala. E le i tali le malosi o le pouliuli i le silisili ese o le Alii o le malamalama.

Aisea? Fai mai Tavita, o le finagalo o le Atua, e ā le tu e ā le tu lava. O le faaolataga, o le mea a le Atua! O ai na te seua? O le olataga, e leai sona noataga.

Ua ou vaai ma le toto’a i lenei parakalafa, ona oso vave mai lea i lo’u mafaufau le upu a se tasi toeaina i le nuu sa ma galulue ai i Savaii e faapea, “kalofa e ia ka igoigo e!’O ai lenei ’au le anoano ua latou taofia le talalelei a le Alii? O ai se toa faavalevalea na te vaoia le fofoga o le Atua? E mafai? “E fai atu ea le mea na faia i le na faia o ia e faapea ma faapea?” (Rom.9:20).

Ua lolofi uma ane le nuu ia Peteru ma Ioane ona o faailoga ma vavega e tele ua faia i le suafa o Iesu i le ua fuā ai toeaiina ma le au ositaulaga sili.Tatou te le o ese ma tulagā aao o ō tatou tua’ā ua mavae (Mose).

O le faatuatuaga lea faa Iutaia. Ioe, e lelei faiga masani la ‘ia auā e mau ai lava na o le ‘au taualoa. E mā’ona ai na o le au fai tonu. E taumasuasua ai pea taga a kama makukua. Lea la o le a ō uma atu le nuu i le tala’iga fou lea, ae le lava ai loa la faasoa a tatou.

O le faaiuga, loka. O le tala a Luka, ua latou tuu le au uso i le falepuipui, ina ia muta ai le tala’iga lea! A o upu a le atalii o Sakaria, “E ao ina tupu pea o ia….?” (Ioane.3:30). O lona uiga, e gata mai augatupulaga, ae tumau pea le faaolataga. E gase le tagata, a o le alofa faaola o le Atua e le gata. 

A tatou talanoa i le olataga, o lona uiga ua tatou talatalaina le alofa tunoa o le Atua. O lana galuega faaola i tagata. O lona aotelega o lea talatalaga, o lona afio mai i le lalolagi e ala i lona liutino tagata.

O lona uiga, o le mea lelei lea mo le lalolagi uma, a ua le o se mea lelei ia Iutaia. Ui i lea, e ao ina malamalama tatou Samoa, e le alalai ni a tatou fuafuaga i le tofā pa’ia a le Atua ua faata’oto ai lana polokalame. E le fua faatatauina le polokalame a le Atua i ni polokalame a le au satukaio mo le au ositaulaga sili. O le faamaoniga, ua loka e le pule a Iutaia, ae tatala e le pule a le Atua (f.18,19).

O ō tatou manatu, e le o le finagalo lea o le Atua (Isaia.55:8,9). Ua loto mau toeaiina; a o le finagalo o le Atua i le talalelei ia faasalalauina. O la le agelu a le Alii, “Inā ō ia outou, inā tutū i le malumalu, ma tautala atu i le nuu i upu uma lava o lenei olataga.” (f.20) O le “ō,” “tutū,” “tautala,” o upu galue.

E galue i le alofa tunoa. E galue mo le faaolataga. O molimau ia i le alofa faaola o le Atua. E le mafai ona faapumoomooina i le falepuipui. E le mafai foi ona pa puipuia i tulafono ma pulega faa Iutaia. O le mataupu i le olataga, o le faamaoni o le Atua i le amataga (Ken.3:15).

O le Atua, ua tatou iloa, o le alofa lava ia (I Ioane.4:16). Pe ‘ana le o le alofa, po ua le mafai ona liutino tagata e faaola oe ma a’u. Pe ‘ana le o le alofa, po ua le maliu fua Keriso mo lou saolotoga. Pe ‘ana le o lea, po ua le faapei le au aposetolo o ni tagata faavalevalea. Fai mai Paulo, “ua faapologaina a’u e a’u mo tagata uma, ina ia atili ai ona toatele ou te maua. Sa ou faapei o se Iutaia ia Iutaia; ina ia ou maua ni Iutaia. Ua ou faapei o sē nofo i le tulafono i ē nonofo i le tulafono, ina ia ou maua ni e nonofo i le tulafono. Ua ou faapei o sē vaivai i e vaivai, ina ia ou maua e ua vaivai.

Ua avea a’u ma mea uma mo tagata uma, ina ia i’u lava ina ola nisi ia te a’u.” (I Kori.9:19-22). O le alofa lea Samoa, o loo ua nofo pule i le loto ma le ola o le tagata ua talitonu faamaoni ma faatuatua i le Atua ma lana faaolataga. Le alofa lea ua māmāsagia ai le faamata’u mai. Ua fai ai le falepuipui poo faasalaga ona o le talalelei a le Alii ma mitamitaga.

Ua suamalie ai tiga o le olaga. Amuia oe, pe afai ua agaleagaina lou faamaoni. Amuia oe pe afai ua faamasinoina lau amiotonu. Amuia oe pe afai ua faamata’uina lau molimau!

E le faigofie le galuega molimau o le faaolataga. Ae talofa e, iā ta inoino e, pe afai e afua mai luga ona faatu ’ala! Pe afai o se manu’a lava i fale e pei o Iuta le Sekara! Ou te faamanatu atu, o le olataga mai le Atua e leai sona noataga. Ua le taofia le mana o le Agaga. Ua ta’iala i le tafa o ata. Samoa o le galuega faaola, o taimi uma lava.

E le na o le Aso Sa. E le seia potopoto pe se i sau se logo. O le galuega o taimi uma i ou aso uma. E pagātia, ae tauia. E inosia, a o manuia. O tiga e faamata’u e le oti, ae tua lelei i le olioli (Ioane.16:20).

Oe ua mafai ona oo atu iai lenei feau; poo e iloa le tuaoi o oe ma le Atua na faia oe? Poo e iloa ona fua o lau savali ma lau tautala i le alofa ma le faamaoni o le Atua ia te oe ma lou aiga? Pe le o fai oe ma faalavelave (roadblock) i le alofa faaola o le Atua i lou toalua ma lau fanau?

Ae poo e malamalama e leai sē tu ma tetee atu i le Atua? Vaai oe i satukaio ma le au ositaulaga sili, e agaga i le lotu, ae le o le amiotonu. Ua faamamafi tulafono ma faavae o le ekalesia, ae latou te le talia Iesu, o le Mesia.

Ae o le ala foi lea o le mulimuli uma o tagata ia Peteru ma Ioane. Auā o a la a’oa’oga ma tala’iga, ua mautinoa ai le saolotoga ma le faaolaina.  Le ekalesia e, Samoa lolotu, tala’i ma a’oa’o atu le talalelei; ae le o le lotu.

Folafola atu Iesu Keriso na maliu mo lou faaolaina; ae ‘aua le laugaina oe ma lou aiga. Fai mai lava toeaiina Iutaia o Mose! A o ai lau tala’iga? Folafola le faatuatua ina ua e mautinoa le olataga mai le Atua.

Ua faapea le faamalosi a se tasi tamā o le uluai ekalesia, “Preach faith until you have faith, then preach faith.” ‘Aua le faia ma le masalosalo. O popolega ia o le faitaulaga ma le pule i ‘au o le malumalu, ina ua saili atu ua leai  le au uso mai le falepuipui ae o loo malu le puipuiga – pe i’u i ni a! (f.24).

A o le tala ua faapea mai, “Faauta, o tagata sa outou tuu i le falepuipui o loo i le malumalu i latou, o tutū ma a’oa’o atu i le nuu. “ (f.25). E le taumasina oe ma le Atua. E tupu pea lava pea le Atua.

Samoa e, ‘aua e te mā e ta’uta’u atu le Alii i nisi tagata. Ne’i le faailoaina oe e le Alii i le mamalu o lona Tamā (Mar.8:38). ‘Aua ne i tuta’ia lou alofa ma lou faamaoni.

‘Aua le fetōtōa’i lou agalelei ma ou manatu lelei. ‘Aua ne’i faōa e le tulafono lau amiotonu. Tumau i le mea moni. Mauaa i le Atua. O ia lē alofa fua. Na ia saunia le olataga mo oe ma a’u. O ia lava o le Olataga. O lenei, o le olataga mai le Atua, e leai sona noataga.

 

Amene.

7737063/7783782

E-mail: [email protected]

 

 

By Petaia Setu 24 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>