O LA’U TALA FO’I

24 July 2016, 12:00AM

1. Matauina i Tala Fou se ulutala e faapea”Ua faatoese se tagata faatautala e sili ona amio leaga” ma o lea ulutala e faasino i le pagota o Lauitiiti Tualima! Ia-atonu ua talafeagai lea ulutala pe a fua i uiga o lenei tama-ae tasi le mea ua galo ia i tatou-‘O le a le pogai ua faapenei ai lenei pagota?

O le fesili lea mo i tatou uma lava-aemaise ai lava i tatou o matua-o “tamā ma tinā o fanau. ”E mafua ona fesili-ona afai o le Atua Soifua na faia le tagata-“e mafai ona tatou faapea-o le finagalo lea o le Atua-ia amio faapenei lenei tama?

E mafua se manatu-ona ailoga e i ai se matua- e mafai ona faapea mai –“e matua selau ma ona tupu pasese amio a lana fanau uma”?

O soo se fanau lava-e tatau lava ona filo ai ma se tagata faalogo-gata se to’atasi pe to’alua! Afai la e tulai mai lea tulaga-aemaise ai lava- pe a ua fiu e faatonu-ona ‘o’o mai lea o le lagona- e sili ia ona tu-u e faitalia o ia ma lona olaga-ae galo ai ia i tatou-ua tatou tuuina atu a tatou fanau i le afi ma le teiŏ! Afai la e le faia e le Atua se tagata leaga-o lona uiga-atonu o i tatou ua mafua ai le faaletonu o fanau.

E o’o mai loa le fiu ona tatou faapea loa lea-……”Faitalia ai oe ma lou olaga”-ae galo ai ia i tatou-o lea ua tatou tatala le faitotoa o le malaia ia tatou fanau!

A tatou tilotilo la i lenei pagota-e le o se tagata ua matua-o se tagata talavou-ae a fua i soligatulafono ua na faia- e matua maoa’e lava ma ua salalau atu i le lalolagi atoa!

Afai la o lea-e le na o le igoa o le pagota o loo ta’u ai-o loo ta’u atu ai ma lona aiga. Afai la ua siliga se suiga i le olaga o lenei pagota-o lona uiga-e tasi pe lava le mea o loo ona mana’omia, o le “alofa o ona matua e faamagalo ai ona sese”!

E tusa ai la ma lo’u manatu-ua siliga ona maua se suiga o lona olaga i le falepuipui-ae o la’u mau-e na o lona aiga lava e maua ai lena suiga! Maua faapenea? E maua i le upu o le alofa ma le filemu mai matua-faatasi ai ma le faapalepale a ona aiga uma ma lona nuu-ona faatoa mafai lea ona toe maua mai le agaga o lenei tama –lea ua manumalo ai Satani! O le a sou taofi? 

2. Matauina foi i Tala Fou le anoano o finagalo faaalia o sui o le atunuu e uiga i le fusuaga a Joseph Parker talu ai nei. O la’u lava vaai i nei finagalo faaalia- e ma’eu le matagofie ma le talafeagai-ae tasi lona-e leai ma se tasi o i latou sa fusu e pei o Joseph Parker! Afai foi sa fusu nisi i aso ua mavae-ta te le’i vaai faatasi i ai-a’o fai fusuaga i le Fale Tifaga tuai o le Tivoli.

O le taua tele la o latou finagalo faaalia-ua o’o mai ai loa le manatu-ua tatau foi ona aga’i mai loa latou ia- e fai se tatou Maea Fusu i Samoa nei-ma a’oa’o lelei e i latou ni a tatou tama fusu- e fetaui ma siamupini o le lalolagi-e faaaoga i ai le maoa’e o lo  latou tomai tau fusuaga e pei ona faaalia.

Ma e aoga foi lea e mafai ai ona latou aumaia ni tama fusu iloga i Samoa nei- e maimoa i ai le atunuu! O le a sou taofi? 

3. Matauina foi i Tala Fou se tamaitai Samoa e faapea na ia lafoa’i sana pepe e tasi le aso le matua- i totonu o se autu-i Ausetalia. O lea tamaitai Samoa e 32 tausaga- fai mai na ia lafoa’i lana pepe i lea autu i le 2014-ma o le Aso Tofi la talu ai nei- na tuuina atu ai o ia i le falepuipui mo le tolu tausaga ma le ono masina-ina ua mae’a le suesueina o lea mataupu e le Faamasinoga i Parramata-Ausetalia.

E peiseai la na mafua ona fai e lea tamaitai Samoa lea solitulafono-ona ua tuua o ia e lana paaga! Ia –o lea ua manino mai-poo fea lava o i ai tagata o Samoa-ae tupu loa se faaletonu-e ta’u ai lava ma le igoa o Samoa! O le a sou taofi?

24 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>