O LA’U TALA FO’I

23 March 2016, 12:00AM

1. Matauina i Tala Fou-o lea e tau fofō atu le faafitauli o le femisaa’i o tamaiti a’oga i le Taulaga ma ua manunu’a ai nisi-ae aliali mai foi isi faafitauli matuia tau fuala’au faasaina ma le aisa-e ese ai mai le gaoi, talepe fale, toso teine ma isi mea leaga uma!

A tilotilo toto’a la i nei faafitauli e tula’i mai nei-e le mafai ona faafitia le mea moni- o le tulaga lea e o’o i ai le toatele o tupulaga ia o loo taua’imisa nei i totonu o le Taulaga.

A toe faamalamalama atili la- o solitulafono uma lava nei –e lamatia ai a tatou fanau-ae o ai na te iloa pe le o felelei nisi o tamaiti a’oga o loo taulamua i nei vevesi? Afai la o lea ua ataata mai nei faafitauli-o le upu moni la- e le toe mafai ona faaitiitia-ma o le a sasao faa-afi-leaga e le o lava ma totoe ni fuafuaga ua faata’oto ma ni faiga e fo’ia ai nei faafitauli! O le a le pine o lena mea? A tatou vaai i le mea o loo tupu nei i le Falepuipui i Tafa’igata-e peiseai o soo se taimi lava e fia alu ai se pagota ia i tua-e pule lava ia! E mafua isea lea tulaga?

E mafua ona e le gata i le leai o ni fuafuaga ua faata’oto e taofi ai-ae o loo nofonofo foi i latou na tofia mo lea galuega! Afai la o le tulaga lea o le a tatou alu ai-o le upu moni-e maua loa e tupulaga talavou fualaau faasaina ma le aisa-o lona uiga-e feololo le ‘au-faatupu faalavelave a le ISIS lea tatou te faalogo so’o i ai i Tala Fou mai fafo!

O le fesili la-faamata o faamamafa e le Malo nei faalavelave e tutupu mai? Afai o popona i ai le Malo-o le a se fuafuaga ua faata’oto ae o ai latou te faatinoina? Afai e moni lea upu e sili le puipuia i lo le tau togafitia-aisea lava e mafua ai ona le kea le Malo i nei faalavelave o loo tutupu mai? Aisea e sosola so’o ai i tua Pagota?

O a mea a le Pulega o le Falepuipui o loo fai-ae ua toe lava o aso uma ma le pagota e sola i tua? Aisea la e faamaumau tupe a le atunuu e totogi ai ia tagata pe afai e le o mafai ona latou taofia pagota i totonu o le falepuipui? Aisea ua le mafai ai ona saisai i filifili pe afai ua faigata? O le a sou taofi?

2. Matauina i Tala Fou fai mai ua matua sasa pala e le Palemia le Vaega o Auaunaga Lautele Tau le Soifua Maloloina ona o le faatamala ma le leai o ni tupe e totogi ai vailaau. O le faaaliga la a le Palemia i Nusipepa e faapea e tupu pea lenei tulaga i totonu o galuega a le malo pe a o’o ina faatalale le aufaigaluega. Na faaalia e le Palemia e faapea ua leva ona tuua le Vaega o Auaunaga Lautele Tau le Soifua Maloloina e aunoa ma sona Pule-ina ua faamavae Leota Laki Sio e tauva mo le faiga-palota lautele talu ai nei.O iinei la e mafua ai lea faafitauli. O le faaaliga la a le Palemia –o le le lava o vailaau-e le ona pau lea o le faafitauli.

E pei ona faaalia e Tuilaepa-e anoano tagata mama’i o loo faatalitali mo le taimi e auina atu ai i fafo mo togafitiga. Sa faamaonia la e le Sui Pule Sili o le Vaega o Auaunaga Lautele Tau le Soifua Maloloina o Ma’atasesa Samuelu Matthes ua uma ona latou faia se tusiga-oloa (order) fou ma e tatau ona taunuu mai ia vaillau i lenei vaiaso! Ia-o le tala lena-ae a tatou tilotilo i le ata atoa o lea faafitauli-afai o le Falema’i Tele o le atunuu o loo i Motootua-ae fai mai ua leai ni vailaau-o le fesili-e mafai ona tupu se mea faapea i se falema’i tele o isi atunuu vagana ai lava Samoa?.

Ia atonu e mafua mai le faatamala ma le faatalale o le Matagaluega-ae o le fesili- afai e i ai se Minisita o lea Matagaluega-e ofo le loto pe afai na te lei silafia-ua leai ni vailaau a le Falema’i Tele-mo le atunuu! O le a sou taofi? 

3. Matauina foi i Tala Fou- e le’i maua lava le isi pagota na sola ese mai Tafaigata- ma e pei ona faaalia i Tala Fou- fai mai na vaaia lea pagota i Savaii. O le mea la e ofo ai- pe faapefea ona fealua’i solo lenei pagota ma alu i Savaii-ae le iloa e Leoleo?

O lona uiga e faasalalau mai i le atunuu-ae le logoina le Matagaluega o Leoleo?

E aliali mai e peiseai e le o galulue faatasi le Matagaluega o Leoleo ma le Vaega o Falepuipui? Sa tatau ona tofu le Leoleo i Apia nei ma Savaii ma le ata o pagota ta’ito’atasi uma e sosola ese mai le falepuipui ina ia mafai ai ona galulue faatasi mo le mea lelei. Afai la e le o galulue faatasi le Matagaluega o Leoleo ma le Vaega o Falepuipui- e faapefea la ona saogalemu le atunuu-pe afai e sosola i tua pagota ae le o iloa e leoleo uma o latou foliga? O le a sou taofi? 

Matauina foi i le tele o taimi o loo faaaoga pea e nisi o Minisita muamua o le Malo ia ua le toe foi mai ina ua mavae le Faiga-Palota Lautele talu ai nei-taavale a le Malo. O le tulaga la ua le mautinoa pe o ia taavale taugata na faatau i tupe a le atunuu- ua ave faa-meaalofa mo ia MInisita pe leai. Afai ua latou faatauina- e fia se tau na faatau ai ae faamata e talafeagai lea tau ma le tau tonu e tatau ona faatau atu ai lea taavale?

Afai sa faaaoga lava e ia Minisita ia taavale mo latou tofi faa-Minisita- ma faaaoga e i latou lava i soo se fe’au e faaaoga i ai e pei o le la’u ai o uta ma tiapula ma popo-faamata e le’i lava lena aoga? Afai la ua ave ia taavale mo ia MInisita muamua o le Kapeneta- e fia se tau na faatau atu ai ia taavale? O le isi fesili-na fetaui na tau ma le taugata o tau o ia taavale? O le a sou taofi?

 

23 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>