Fa’aliliu e Maiava

Ua toe manuia fo’i taumafaiga a le Samoa Mata’utia, o Mark Hunt ina ua taofia i le ta’amilosaga muamua le la fetauiga ma se tasi fo’i o toa o lea ta’aloga, i le fusu’aga na fa’aigoaina o le UFC Fight Night 85, i Brisbane i Ausetalia.

A’o le’i faia le fusu’aga lea, sa folafola e Frank Mir (18 fusu’aga, 11 manumalo) lona fa’afaia’inā o le ali’i-Samoa, o le siamupini talu ai o le lalolagi - K1 World Grand Prix, i se tulaga mata’utia ma fa’aalia ai, a manumalo i le fusu’aga lea, o le a maua ai loa sona avanoa e fetaui ai ma isi tama lelei o le paga-mamafa. 

 “E matua aloa’ia lelei le Samoa lea i le ta’aloga ma a manuia la’u ta’aloga lenei, o le isi tama-fusu o le a ma fetaui, o se tasi e iloga ma e mae’a ane, ua sologa lelei ma e iai i le tausinioga a tama pito i luga,” o lana fa’aaliga lea i upega-tafa’iLagi, le UFC.com.

“O le vaega o le paga-mamafa lea, e le pei o le vaega ta’i-155 pauna. O i’ina e mafai ona o’o i le iva ou manumalo ae le avea lava o se siamupini.

“A’o le ‘au-paga lea, e tolu lava pe fa ou manumalo i nisi iloga o le ta’aloga, ae mafai ona e fusu mo se fusi.” 

Peita’i, o ia lea (Frank Mir e 36 tausaga le matua) na faia’ina-leaga ma ua atoa ai le 11 o ana faia’ina talu ona fusu.

O le tama-Samoa o Mark – lea na oti ai fo’i se tasi mata’utia, o Antonio ‘Bigfoot’ Silva i lana fusu’aga talu ai – na amata le fusu’aga i se tulaga televave tele ma afaina ai lana paga mai Amerika, i ana tu’i-malolosi i le amataga.

Na ‘alo’alo mamao lava Frank Mir i le amataga o le fusu’aga ‘ae o tu’i malolosi muamua lava e lua, na afaina ai i le ulua’i minute o le fusu’aga.

Na tulituli lava e Mark le siamupini o le fusi-uliuli o le Brazilian Jiu-Jitsu ma fa’amuta ai loa le fusu’aga i ana tu’i malolosi ae toe lua ma le ‘afa-minute o totoe.

Na titino ona saputu tu’i a le tama Samoa i le isi 30 sekone ma tauga ai loa le taumatau-malosi na palasi ai Frank Mir ma mae’a ai le fusu’aga, ina ua fa’ailoa ane, ua le-mafai ona ia fa’aauau.

I le isi paga-‘autu o le po, i le au-paga mama, na avea ai le ali’i o Neil Magny ma ulua’i tama-fusu na fa’aumā le siamupini talu ai o le paga-ogatotonu a Bellator, o Hector Lombard.