O LA’U TALA FO’I

22 March 2016, 12:00AM

1. Matauina i Tala Fou fai mai ua ofo mai e Matua se vaifofō e fo’ia ai fusuaga a tamaiti a’oga ia e masani ona fai i le Taulaga, aemaise ai lava le Maketi i Savalalo lea fai mai ua avea ma nofoaga o ia fusuaga poo misa a tamaitai a’oga!.

O ia la faiga e fo’ia ai -fai mai o fautuaga mai le ‘au-matutua- e aofia ai le faasalaina e matai o le nuu-faatasi ai ma le faatinoina o tiute o Leoleo e ala i se leoleoina o ia nofoaga e faatali ai pasi.

Ua mafua la ia fuafuaga ona fai mai- o nisi o le ‘au-matutua o le atunuu ua fefefe e o atu i lea nofoaga-talu ai nei misa a tamaiti a’oga-ma ua tatau ai i faia’oga ona matua faasaga ane e sasa tamaiti nei e taulamua i nei faiga!

Ia talosia ia taunuu le faamoemoe e tusa ai ma nei fuafuaga-ae o le lu’itau i tamaiti uma nei e faatupu vevesi i le Taulaga-talofa e-ua matua malaia lava outou olaga-talu ai e tou te le o iloa le pagatia o outou matua i le sailiga o tupe –e totogi ai outou pili a’oga-mea a’oga ma pasese i aso uma e tou te o atu ai i le a’oga ma toe foi mai-e ese ai mai tupe o loo avatu tou te aai ai.O le mea la ia outou iloa vae atu le atunuu-sa savavali outou matua i le a’oga ma le mole manava- e leai ni pasi na feoa’i ai-leai ni tupe e taumamafa ai-ae sa matua finau lava! O le pogai lena ua outou manuia ai!

E matua leai lava ni misa na fai i o latou taimi a’o a’o’oga -vagana ai le misa i mafaufau ina ia maua Tusi Pasi maualuga o na aso e pei o le Samoan Public Service Exam, New Zealand School Certificate ma le University Entranace ma isi faailoga. Afai la ua maua taavale e momoli ai outou i a’oga-e le o ni taavale na to’ulu mai le Lagi-a’o le finau ma le tautiga o matua lea ua outou ‘ae’ae ai.

O le a la le pogai e maumau ai le taimi i mea valea-ae le faasaga e matua saili le poto ma maua le galuega lelei-e tausi ai outou matua ina ia outou manuia ai ma ni a outou fanau i le lumana’i! O le a sou taofi?

2. Ua matauina foi i Tala Fou fai mai e i ai ni tamaiti a’oga ua loka e Leoleo talu ai lava nei misa i le va o tamaiti a’oga. O ia tamaiti a’oga na loka e Leoleo e i le Aso Tofi talu ai- o tamaiti a’oga o le Sagato Iosefo ma le Don Bosco!

O le a taatia la le Don Bosco aua o le a’oga fou nei lava-ae o le  fesili la ia Sagato Iosefo-na tupu se mea faapenei talu ona faavae mai le Kolisi o Sagato Iosefo i Mulivai i le 1953? O le tali-e leai! Aisea? Leaga o tamaiti sa lelei ona aoaoina e o latou matua!   Leaga sa lelei ona pulea Sagato Iosefo aemaise ai o le malosi o Felela e aoa’i tamaiti uma ina ia amio pulea!

O le taunuuga la o lena tulaga-e leai ni misa ma isi lava a’oga! Sa tauivi tamaiti a’oga uma ina ia maua le poto-sa tauivi tagata uma i soo se taaloga sa fai e pei o le lakapi ma fusuaga, ae leai ni misa! O le fesili la- aisea ua ta’uvalea ai le a’oga pele a Felela Malisi poo Sagato Iosefo? Faamata e le mafua mai nisi o faia’oga o le Kolisi?

Aisea ua ‘au’aufau faatasi ai Sagato Iosefu ma Don Bosco e fai nei mea mataga? Faamata o iloa e Faia’oga o Sagato Iosefo- o le to’atele o Ta’ita’i o le Malo o Samoa-Ekalesia ma nuu uma o Samoa-o tagata sa aoaoina e Felea Malisi poo Sagato Iosefo?

O le fautuaga la ae le faapea o le a fai a’i-atonu o se tasi lenei o itu taua e tatau ona silasila i ai le Faalapotopotoga a Tama Tuai o le Malisi pe afai ua siliga ona maua se vaifofo! ! Aisea? Leaga e leai se aoga o mea lelei o loo taumafai le Faalapotopotoga a Tama Tuai a le Malisi e fai-ae tausolomua ia Sagato Iosefo ona faata’asina le suafa ta’uleleia o Felela Malisi ma le latou galuega tele na fai mo Samoa! O le a sou taofi? 

3. Matauina le uiga ese ma le matagofie o le faamanatuina o le Aso Sa o Laupama! O le manaia- o le auai lea o fanau laiti ina ia latou iloa ai le tulaga mata’utia o le olaga o le tagata- e pei lava ona tatou vaaia i aso uma!

O le mata’utia o lea tulaga- o le fiafia nei ma tau alaga Hosana-ae o taeao e toe sui ai le alaga ma fai atu ia fasioti…..!O se faamanatu taua foi lea mo i tatou uma ma le atunuu atoa-talu ai o le natura lava lea o le lalolagi o loo outou soifua ma matou ola ai!

Ae o le itu e sili ona taua-o le faamanatuina o le Aso o Laupama-o le faamanatu foi lea ia i tatou ma o tatou uiga femoumou a’i! E alofa nei ae ita taeao. Ae peitai- o le maliu tiga o Iesu e pei ona faamanatuina i lenei vaitau-o le faamanatu sili lea ia i tatou –ua uma ona inosia ma tuu-feanu tagata i le Faaola-e o’o lava i ona Soo filifilia-na latou faalataina o ia-ona o le pala’ai ma le le talitonu.

E agaleaga atu ae agalelei mai e pei o lana toe upu-“Lo’u Tama e-ia e faamagalo atu ia te i latou-aua ua latou le iloa le mea ua latou faia! Ni a fa au? E finagalo le Alii-ina ia tatou faamagalo atu i e ua agaleaga mai! O le a sou taofi?

22 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>