Sili atu le olaga i Apia nai lo’o Savaii

By Vatapuia Maiava ma Sarafina Sanerivi 21 October 2016, 12:00AM

O le masani lava i so’o se atunu’u, e mafua ona femalagaa’i mai tagata i nu’u i tua e nonofo i le taulaga, o le saili manuia lava auā le tausiga o aiga ma fanau. 

O lea foi le mafua’aga na mafua ai ona me’i mai le aiga o Oscar Brown ma ona tua’a mai Aopo i Savai’i, o lo’o ua aumau nei i Falelauniu-Tai. 

Na fa’aalia e le taule’ale’a e 21 ona tausaga ua toeitiiti lava atoa le 10 o tausaga talu ona aumau ai Falelaunia. 

Na fa’ailoa mai e Oscar, e telē lava le eseesega o le olaga i Savaii ma Upolu.

O le eseesega muamua lava na ta’ua e Oscar, o le tulaga lea i faiga nu’u a matai. 

“O iinei, e le pei o Savaii o lo’o ola lava i le mea tuai i le mamalu ma le malosi o le aganu’u a Samoa ma faiga nu’u.

“E fai lava si vaivai o le fa’asamoa iinei i le nofoaga lea matou te aumau ai. 

“O iinei, e ola saoloto lava le tagata ia ma e pule lava le tagata ia i ana mea e fai e le pei o Savaii e mamalu tulafono a nu’u.

“E leai foi ni feau se tele e faia po’o ni aga-i-fanua a nu’u e faia iinei e pei ona vaaia i Savaii.”

Na fa’ailoa mai foi e le taule’ale’a e faigata atu le olaga i nu’u i tua nai lo’o Apia, ma o le ala lea e fiafia atu ai e nofo i Apia. 

“E faigofie lava le olaga iinei i Apia.

“O le mafua’aga foi lea e to’atele ai i latou ua fiafia e omai mai Savaii ma aumau ai iinei i Upolu auā foi e latalata i nofoaga e maua ai galuega ma e faigofie lava mea uma.

“E le gata i lea, e tele fa’afitauli i tua i nu’u i tua ma e tele foi tulaga e aafia ai tagata. 

“O le tele foi o mea e fai i faganu’u o le isi na o tupe alu mo le tele o aiga.

“A’o iinei, e leai lava ni mea fa’apena ma o le tupe e fa’aalu lava auā le tausiaina o aiga.”

O le isi tulaga na fa’ailoa mai e Oscar e fiafia ai i le olaga i Upolu, o le leai lea o ni tulafono e taotaomia ai le sa’olotoga o tagata. 

“O Savaii e mamalu lava faiga nu’u ma e tele tulafono. 

“E le pei la o le nofoaga lenei, e pule lava le tagata ia ma e ola sa’oloto lava tagata uma.”

Ae peita’i na ia fa’ailoa mai fo’i e pau lava le fa’afitauli e tula’i mai i le tulaga lea, ona ua avea lea ma tulaga e fa’aaoga sese ai e le to’atele le avanoa lea e fa’atupu fa’alavelave ai.

“Ia na ona pau lava lena o le tulaga e le lelei ai le leai o ni faiga nu’u. 

“Auā ua tafili saunoa ai loa nisi e matua’i fa’atupu vevesi aua ua leai ni faiga nu’u e puipuia ma fa’asalaina tagata fa’atupu fa’alavelave.”

Peita’i, na fa’ailoa mai e Oscar, o lo’o sologa lelei lava le olaga i lo latou nonofo ai Falelauniu.

“O lo’o seki lava mea uma iinei.

“E leai lava nisi o le matou aiga, ua na’o matou lava ma o’u matua ma lo’u uso laititi.”

By Vatapuia Maiava ma Sarafina Sanerivi 21 October 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>