Manuia le fa’amasinoga a le toe’ina, le Ali’i Palemia

25 February 2016, 12:00AM

Ripotia e PaiMulitalo Ale

Fa’aliliu e Maiava

 

Ua fa’amaonia nei le toe nofoia e le Ali’i Palemia, Tuila’epa Sa’ilele Malielegaoi, o le nofoa o lona itumalo mo le isi paea’iga a le palemene.

O lana Afioga ma isi sui e to’alua o le HRPP – o Fiame Naomi ma ‘Amituana’i Fagaivalu Samu lea ua manumalo i a latou talosaga na fa’aulu ona o tulaga tau-agava’a mo sui-tauva i faiga-palota. O le taunu’uga la ua iai nei,  o le a leai ni palota a ia itumalo e faia.

O fa’ai’uga uma o mata’upu nei sa tu’uina mai e le Fa’amasino Sili, o Patu Tiava’asu’e Falefatu Sapolu ma le Fa’amasino o Lesatele Rapi Va’ai i le aso ananafi.

O le amataga o le vaiaso nei, na finau atu ai le Ali’i Palemia, e le fa’amalieina e le sui-fa’atu mo le palota a Lepa, o Tuula Kiliri Tuitui, mana’oga e agava’a ai o se sui-tauva.

I le talosaga a Tuila’epa e fa’apea, e le fa’amalieina e Tuula le mana’oga e tolu tausaga o le tautua – monotaga – e pei ona mo’omia ai e le Teuteuga o le Tulafono o Faiga Palota 2015.

E to’atolu matai-taua o le afio’aga o Saleapaga – lea e matai ai Tuula – sa molimau e lagolagoina le Ali’i Palemia ma fa’apea atu i le Fa’amasinoga, e le fa’amalieina e Tuula mana’oga o le tulafono.   

Ae na te’ena uma e Tuula molimau a matai ia e to’atolu.

“E o’o mai lava i le taimi nei, o lo’o fa’atino lava a’u monotaga i le nu’u,” o lana fa’aaliga lea. 

Sa ia ta’ua fo’i le totogi (pili) o le galuega sa ia fa’atino mo le nu’u i le 2009, o se fa’amoniga o lana tautua, e le totogia. Na ta’ua, o se vaega lea o lana monotaga. 

“Afai o tou fa’apea e le’i faia sa’u monotaga, e sili pe a ‘avane se pepa ma se peni e sa’ili ai la’u monotaga e fua i le tototi (pili) o le galuega sa fai.” 

O le fa’ai’uga a le Fa’amasinoga Maualuga ananafi, e malo le Ali’i Palemia.

O le fa’alua lea ona fa’aleaogaina le taumafai a Tuula e taufetuli ma Tuila’epa i faiga-palota. 

O le mata’upu lona lua e aofia ai le Minisita o Fa’amasinoga, o Fiame Naomi lea sa lu’ina le agava’a o le sui la te tauva, o Fiaola Iosua Lole. O le fa’ai’uga o lea mata’upu, na malo ai le tama’ita’i-Minisita.

O le mata’upu mulimuli, o le talosaga a Amituana’i Fagaivalu Samu e fa’asaga ia Leo’o Dr. John Adams o le Itumalo o Aleipata Itupa i Luga. Na finau atu le faipule talu ai o le itumalo, e le’i faia se monotaga a Leo’o e pei ona mo’omia i le tulafono.

Na talia e le Fa’amasinoga le talosaga a Amituana’i ma fa’ai’uina ai lea mata’upu i le fa’aleaogaina o Leo’o e avea o se sui-tauva.

Ina ua mae’a le fa’amasinoga, na saunoa mai Amituana’i i le Samoa Observer, e fa’ailoa lona talia fiafia o le fa’ai’uga ua ‘aumai.

“Sa ‘ou mafanafana lava aua o le mea moni lea,” o lana saunoaga lea.

Sa ia fa’afetaia fo’i lona itumalo ma e sa lagolago ma fa’apea ai, o le a taumafai i le mafai e o’o iai aua le tautuaina o lona itumalo i le isi paea’iga o soso’o ai. 

25 February 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>