O le i ai fo’i o lenei vaitau fa’ai’u o le tausaga ia e le’o taumateina le tele o mago pula o lo’o ua fa’atauina i so’o se vaega o le atunu’u.

O le aso ananafi na afea ai e le Fofoga o Samoa le tinā i a Valene Tafaialii o Faleula a’o ia fa’atauina atu tau mago i lumāfale o le aiga.

 “Ia o le tele lava o tagata ia e le fesiligia  o lea lava le tulaga o lo’o i ai.

“O le matua’i to’atele lava o i matou e fa’atau mago i luma o le auala ia masalo toeititi taunu’u mai le to’atele.

 “Ia o a’u e i ai la’u fanau aoga, ae o mago nei o lo’o mafai  ona fa’atau atu ma fesoasoani ai le tele o taimi ma e $2 le tau mago.

E ui la na ia fa’ailoa o le taimi lenei e ui i le tele o i latou o lo’o fa’atau mago ae o lo’o mafai lava ona maua tupe mai le tele o aso.

 “Ia a lua a’u pa’elo ou te sau ma a’u i luma i’inei ia e $90 la’u tupe maua.

 “O le vave ia o le fa’atauina atu ai o vaega nei i le mamalu o le atunu’u.

 “Ia o lo’o sefesefe lava nai tupe e maua atu i luma nei aua le eletise, o le vai ma nai isi lava vaega o lo’o aoga mo le tausia lelei o le aiga.

“O si o matou aiga na o lo’u to’alua lava o lo’o faigaluega ia e tele lava a totogi mai i fa’ai’uga o vaiaso e tele atu ai le tupe ou te mauaina nai lo ia.

 “Ia e pei a lelei lava le vaiaso ia e $300 le tupe maua , o nisi o taimi e omai ai le ai vaega i To’elau fa’atau paelo atu ma e $50 i le paelo e tasi.

O le tele o vaega o lo’o ia fa’atinoina na ia fa’ailoa o le atina’eina lava o aiga, ma o le tele lava o tausaga e pei o le isi lea alagatupe o le aiga e va’ava’ai ai lava. “Ia e ono mago o lo’o i totonu o lo matou fanua, ma o lo’o la’u mai lava e fa’atau i le tele o taimi e alu ai le fuata mago, ia e fesoasoani tele lava i si o matou aiga aemaise lava o nai isi o mea fai i le tele o aso.