O LA’U TALA FO’I

1. Matauina i Tala Fou ni tofiga fou mo le Palemene o Samoa-ma o lea ua tofia ai nei le Afioga a Le’aupepe Toleafou Apulu Faafisi e avea ma Fofoga Fetalai o le Maota ae o le Sui Fofoga Fetalai o Nafo’itoa Talaimanu Keti.

Ia atonu ua matua talafeagai lava ia tofiga e pei ona faia! A tu’u mai la i le Afioga a Le’aupepe Toleafoa Apulu Faafisi- e le o se galuega fou lea ia te ia-aua sa i ai foi muamua! Ae afai la ua toe tofia i ai Leaupepe-ia atonu o le a sili ai ona sologa malie taualumaga a le Palemene i le faafogafoga atu a le atunuu!

E le gata ina masani lelei o ia i le faiga o taualumaga faa-Palemene-ae lava ma totoe le tofā ma le faautaga i tama matutua-e faatumauina ai le mamalu o saunoaga ma fetalaiga a sui o itumalo ta’itasi o Samoa. Ia –atonu la ua tatau ma onomea ona tatou momoli le faafetai ma le faamalo ia Le’aupepe Toleafoa Faafisi e tusa ai ma le tofia o ia e avea ma Fofoga Fetalai o le Maota mo lenei lima tausaga-aemaise ai foi o le faamalo i le faipule fou ua tulai mai e avea ma Sui Fofoga Fetalai! Ia manuia lava lo oulua alofaiva mo lenei lima tausaga! O le a sou taofi?

2. Matauina foi i Tala Fou le leai o se tofiga ua faia e le Tautua Samoa Party mo so latou Ta’ita’i. O le talanoaga ma le Samoa Observer na faaalia ai e le Sui Ta’ita’i o le Tautua Samoa Party o A’e’au Peniamina Leavaiseeta e faapea e leai se tofiga ua faia pe ua talanoaina.

Fai mai A’e’au o le faiga masani lava o le taimi o le Fono Tele ia Me e faatino ai  ia tofiga. Fai mai o le Ta’ita’i o le Tautua Samoa Party o Palusalue Faapo II na faia’ina i le Faiga-Palota Lautele talu ai nei-faapea foi ma Afualo Dr. Wood Salele, Papalii Ta’eu Masipau, Motuopua’a Aisoli Vaai, Tapua’ī Ah Sam, Lefau Harry Schuster, Toeolesulusulu Cedric Schuster ma Aveau Niko Palamo.

ADVERTISEMENT

Ona pau la sui o le Tautua Samoa Party o loo totoe nei o le Sui Ta’ita’i o A’e’au Peniamina Le’avaiseeta-ma sui faipule fou o ‘Ili Setefano Taateo ma ‘Olo Fiti Vaai! Ia-poo le a lava le tulaga ua o’o i ai le Pati-ae ia manatua-e le mafai ona manumalo uma ni ‘au se lua-ae o le itu e sili ona moni ma faamaoni-“E leai se tasi e tu faa-mauga-ma ia manatua foi-e lua lava taimi e sili ona taua o le soifuaga nei- o le taimi e pologa ai poo le taimi e lulu ai-ae o le taimi o le olioli e aupito i sili ona fiafia-o le taimi e selesele ai- O soo se taimi lava e lulu ai-e i ai foi ma le taimi o le seleselega! Ae peitai-o soo se mea lava e te maua ae le’i alu ai sou afu-e le o ni mea ia e tumau!

O soo se mea foi e le tusa ai ma le amiotonu ma le faamaoni-e leai se mea e ese ai ma le la’au e tu a ua oia! E faagasolo pea le soifuaga-ma fai mai le upu e le’i fauina Roma i se aso e tasi! O lona uiga la- a sisina le afu-maligi loimata i soo se taumafaiga-e i ai lava le taimi a le Atua! Talu ai-e leai se mea e mafai ona faalilo i luma o le Atua-ma afai o le Malo o Samoa e faavae i le Atua-o lona uiga la- e i ai le taimi e tali mai ai le Atua! O le a sou taofi? 

3. Matauina foi i Tala Fou se Sui Usufono fou o le Palemene mo le itumalo o Lefaga ma Faleaseela-o le Afioga lea a Toleafoa Ken Poutoa- faatasi ma lana saunoaga fai mai………”o le taimi lenei ou te faia ai se sao e matua tele i lo’u itumalo faapea foi ma Samoa.

O le matau la i lea Sui Faipule fou-e le o le taimi muamua lenei na avea ai ma sui faatu mo le faiga-palota. Sa taumafai muamua ma toe taumafai-ae o lea ua faamanuiaina! O le matau la i lea faipule fou-e tupu mai se tasi o faipule ma ta’ita’i o Samoa i aso ua mavae-ma afai la sa auauna foi lona tua’a i le Palemene mo lona itumalo na tu mai ai- e le taumate foi e mafai e Toleafoa ona toe fai le mea na fai foi e lona tua’ā-aua e tele aso sa faipule ai! Ae o le tuu-a-lalo la i le faipule fou-o le mea e igoa o le “Ta’ita’i moni”-e savali i le upu e tautala ai-ae le o le ese o le upu e tautala ai-ae ese le mea na te faia! O le a sou taofi? 

4. Matau foi i Tala Fou nisi o faipule fou e pei o le Faiupule o Manono ma le Faipule o Vaisigano Nu.1. Ua matauina foi o la finagalo faafetai i le Atua ona ua taunuu manuia o la faamoemoe. Afai la o ia Faipule e fou-o lona uiga-o le a matua tele so la sao i upufai o le Malo o Samoa! E ui foi ina fai mai le upu a le atunuu-“e le faatonuina e le Matapia le Manaia”-ae atonu e i ai lava le taimi fai mai le ‘aumatutua e aoga ai le matofi!

O lona uiga-e ui lava ina le mana’omia le matofi mo le filiina o le ‘afa-ae mafai lava e le tagata fili ‘afa ona toe tua i le matofi-mo nisi vaega o le ‘afa. O le mea lea-matou te le faatonuina le mamalu o sui filifilia o itumalo-ae o sa matou faamanatu ma e toe faamanatu atu pea-“ua matua fia maua lava e Samoa se lavea’i! Ua outou silasila i le anoano o tamaiti i luga o ala tetele, ae le o i le aoga- i le ao ma le po e faatau atu ni oloa ina ia maua ai se tupe e tausi ai o latou aiga?

O le a le pogai? O le tali-ua matua matitiva lava le atunuu! Afai la e mafai ona outou faia e tusa ai ma le filifilia o outou e fai ma ta’ita’i mo lenei lima tausaga-ona outou aveese le VAGST ona ua taugata le soifuaga-ua lava ma totoe lea mo le atunuu!

E tatau foi ona outou fesiligia le Malo ina ia mafai ai ona e mautali atu i lou itumalo-pe o le a le pogai ua le mafai ai ona ave le mataupu tau faiga pi’opi’o a le Malo e pei ona lipotia ma faamaonia e le Pule ma Su’etusi Sili-toe Iloilo ma faamaonia e le Komiti Filifilia a le Palemene-i le Faamasinoga e saili ai le amiotonu ma le faamasinoga! E ala ona una’ia lo outou mamalu-ona e falepuipui soo se tagata pe ana gaoia se $20-ae a faitau miliona ma miliona faiga pi’opi’o a le Malo-e le mafai ona tuuina atu i le Faamasinoga! E te fia lagolagoina la lea ituaiga o faigamalo? O le a sou taofi?

ADVERTISEMENT
Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?