Manuia i le Taumafaiga fa’a Lua

17 March 2016, 12:00AM

Ripotia e Sarafina Sanerivi

Fa’aliliu e Maiava

 

Fai mai isi, o le fa’atolu e masani ona maua ai laki.

Ae mo le faipule fou o Lefaga ma Falease’ela, o Toleafoa Ken Poutoa, ua tau-tonu lava i manuia a’o lea fa’atoa fa’alua ona tauva mo le nofoa o le Itumalo.

O taea’o a’ena, o le a filofilo ai Toleafoa i isi sui-faipule fou o le  Palemene mo a latou tautoga ma ta’utinoga pe a usuia le ulua’i fono a le Paea’iga Lona XVI o le Palemene a Samoa.  

O Toleafoa – le Fa’atonu o le Komiti Fa’afoe a le Fa’alapotopotoga o Va’a a Samoa – ua fa’aauauina nei le tautua a se tasi o sui ua loa i le Palemene, le Afioga a Le Mamea Ropati Mualia, lea ua filifili e avea ma Sui o le Fono a Sui Tofia. 

Saunoa Toleafoa, o le filifilia ai e avea ma faipule fou o Lefaga ma Falease’ela, o le fa’aaloalo maualuga lea ua fa’afiafiaina ai lava o ia.

“Ua matua fiafia lava ona o le fa’aeaea mo lo’u tagata,” o lana saunoaga lea. “Ma ‘ou te fa’afetai tele ai i Le Atua; aua e seanoa o Ia, ‘ailoga ‘ou te ausia lenei tulaga maualuga.” 

O le fa’alua lea ona tauva Toleafoa mo le tofi o le itumalo.

Sa tauva fo’i Toleafoa –ua 49 tausaga o lona soifua - ma le Afioga a Le Mamea ma isi i le palota o le 2011, peita’i e le’i manuia.

Peita’i, e le’i motusia ai lona naunau ma le mana’o e avea ma faipule o le palemene.

“’Ou te lagona lava o fuafuaga ia a Le Atua mo a’u nei ma sa ‘ou mulimuli ai lava ma taumafai e fa’ataunu’u,” o lana saunoaga lea. 

“Moni sa le-manuia la’u taumafaiga muamua ae na ‘ou iloa e tatau lava ona toe taumafai tasi atonu o le taimi lelei lenei mo a’u e fai ai so’u sao aoga mo lo’u itumalo ae maise fo’i le atunu’u.”

E talitonu Toleafoa, o filifiliga uma e mai Le Atua.

 “E leai so’u manatu o le a ‘ou o’o mai i’inei, e sa iai pea lou fa’atuatua i Le Atua.” 

Na ta’utino fo’i, e le’i faigofie ana tapenaga ma le mau galuega sa fa’atino a’o le’i faia faiga-palota.

E to’alima isi sui-fa’atutu – e ‘ese mai ia Toleafoa – sa finau mo le nofoa o le itumalo, e aofia ai le sa avea ma Ofisa Sili o le Matagaluega o Fa’amasinoga ma le Fa’afoeina o Mata’upu Tau Fa’amasinoga, o Masinalupe Tusipa Masinalupe Venu.

O isi sui-tauva e aofia ai Lemalu Nele Leilua, Lemalu Silivia Taupau, Su’a Tanielu Faia’oga ma Unasa Taua’ipolu Petelo. 

E 945 palota na malo ai Toleafoa. 

E le’i naunau tele Toleafoa e fa’ailoa mai ana fuafuaga mo le lumana’i peita’i, na saunoa, o le a taumafai malosi e tautua lona itumalo i so’o se ‘auala e mafaia.

“O a’u o se ‘au’auna ma o a’u o le a vae ma lima iai le itumalo mo le isi lima tausaga,”

Ua loa ona fa’aipoipo i lona faletua o Vaela’a Poutoa ma si o la alo o Winniefret.  

Sa soifua a’e i le afio’aga o Falease’ela, o se tama-tuai a Malisi i Mulivai, le Kolisi o Sagata Iosefo ma le Kolisi o Samoa i Vaivase.

Sa fesoasoani ma fa’aauau pea ona ‘auai i le fa’agaioiga o le pisinisi a lona aiga, ina ua fa’ai’uina mai le Kolisi o Samoa.

Sa ‘au’auna mo lona nu’u ma le itumalo talu mai lena taimi ma avea ai ma pulenu’u o Falease’ela i le tele o tausaga.

O ia o se ali’i-faiPisinisi ma a’o le’i filifilia nei e avea ma faipule o le Itumalo, sa avea ma Fa’atonu o le Komiti Fa’afoe o le Fa’alapotopotoga o Va’a a Samoa. 

Manuia le Tofiga-fou ma alo i ou faiva-manaia! 

17 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>