O lea le talitonuga o le ali’i o Li’a Tavita i le Fofoga o Samoa.

E maua e le Fofoga o Samoa le fa’atalatalanoaga ma le ali’i i a Li’a Tavita o lo’o asia mai e ia lona aiga i Sale’aumua ona toe fo’i lea i Tutuila mo le lua vaiaso.

“O le taimi lenei o lea lava le fa’amoemoega o lo’o i ai le taimi lenei, ia e o a i o e le mafai ona tu’ua le tatau ai ona omai e va’ai matua aemaise o aiga.

“E ui ina nofo ai la, ae o le itu taua o le fa’amuamua o aiga, ia o le toe o’o mai fo’i i lenei tausaga ia o lea lava le agaga e tasi.

“O le taumafai ai pea ina ia aua ne’i gata le so’otaga lea, e le gata la ina lafo mai seleni e fesoasoani a i le tele o fa’alavelave ia ae pei e pito sili i a te a’u o itu tau tausiga o lo’u aiga aemaise o nai o’u matua.

“Ia o lo’u olaga atoa na tausia mai a’u e le tinā o si o’u tinā, ma e vavalata tele la ma mafutaga ma si o’u tinā.

“O le uiga o la’u tala e tupu le alofa i lou loto pe a e matua pe afai o lou olaga atoa e pipi’i ma vavalalata le lua mafutaga ma si ou tinā.

“I a te a’u ia, e pei o lea lava le tulaga o lo’o i ai e o’o mai lava le taimi lenei, e ui la ina faiilagi le folauga a si o’u tinā, ae le mafai ona galo fa’ata’ita’iga lelei mo a’u se’ia mai i le matua lea ua i ai le taimi lenei.

“O mo’omo’oga i a te a’u ma’imau e pe ana mafai ona soifua mai pea lenei taimi, se’i va’ai i ana galuega ma fautuaga lea ua manuia ai lenei taimi i la fo’i atunu’u.

“Ia ae pule lava le Matai Sili.

Na ia ta’ua o le a le gata ai pea le va’ava’ai i itu uma ina ia manuia pea lona aiga i Samoa nei ona o lona aumau ai i atunu’u ese.

“Ia ou te iloa o lea lava le manaoga o so’o se tama fanau lava a Samoa, ia manuia nai o latou aiga i Samoa, ia o lea fo’i lo’u mafaufau i le taimi lenei, o le a se mea ua mafai ona ou maua.

“E ao lava ina ou taumafai e fa’atino aua le aga’i ai le lumana’i ina ia manuia si o’u aiga, ma o lea lava le fa’amuamua i le taimi lenei.