E leai se mativa i Samoa

By Vatapuia Maiava ma Sarafina Sanerivi 26 September 2016, 12:00AM

“E le’o iai se mativa i totonu o Samoa,” o le fa’aaliga lea a le tamā ia Lesoa Kovati mai le afioaga o Tanumapua. 

Ina ua afea e le Fofoga o Samoa le tamā ia Lesoa mo sona finagalo i le soifuaga ma le olaga o Samoa i le vaitau nei, na ia fa’ailoa mai ai, e mo’i lava e faigata le olaga, ae o lona manatu, e le’o ola Samoa i se olaga mativa. 

“O lenei vaitau, ua faigata lava le olaga ua iai nei,” o lana tala lea. 

“A le galue lava le tagata, e le aai lona aiga. A le galulue foi matua, e falolo fanau ma le mafai ona o i aoga. Auā o le vaitau lenei, ua fai a si taugata o le soifuaga ua iai Samoa, ma o le ala lena ua tele ai ina oi le mamalu o le atunu’u.

“O aso la, e maua lava oloa ile $1 po’o le $2 foi. E fiu foi e fa’asoa le $100 pe a maua. Ae o le vaitaimi nei, a maua le $100, e lua a fa’atau e fai ae uma. Ua taugata le tele o oloa ma mea e fa’atau.”

O le manatu o Lesoa, e faigofie lava ia i latou o lo’o mauoloa auā o lo’o lava le seleni e fai ai mea o lo’o manana’o ai. 

Ae faigata mo aiga lima vaivai ma utiuti le fa’asoa. 

“O le isi na o fa’afitauli o lo’o iai nei i Samoa. E tatau lava i le malo ona saili ni auala e fesoasoani ai foi i nai aiga tau atia’e ma fa’apa’u i lalo le tau o oloa. 

“E le tutusa uma tagata i totonu o Samoa. O nisi e tele tupe ae o isi e le lava le fa’asoa. Ae afai la e taugata le soifuaga, ona oi lea o i latou e le’o lava le fa’asoa.”

Ae peitai na fa’ailoa mai e Lesoa, e ui lava ina faigata ma taugata le soifuaga i Samoa, e le’o iai lava se tulaga o le mativa i Samoa. 

“Ou te matua’i lagolagoina le finagalo o le Afioga i le Palemia e tusa ai ma le tulaga lea o le leai o se mativa i Samoa. 

“E a la ona mativa le tagata o le paiē ma le fa’apalapala. E sa’o e faigata le olaga. Ae a le afu le muaulu, e le maua se mea lelei. 

“O le ola taumafai lava o le tagata ia ma le ola finau e maua ai se lumana’i lelei mo ia ma lona aiga ma lana fanau. 

“Ia o nisi o la’u fanau, e lelei i le aoga, ae ua le mafai ona fa’aauauina ona o le utiuti o le fa’asoa. Ae le fa’apea ai la o le a nofonofo ai a ma lē fa’aaogaina tatau le malosi ma le ola mai le Atua. 

“O lea foi e tele fa’atoaga ma lau’ele’ele e mafai ona galulue ai ma maua ai meaai e tausi ai aiga ma fanau. O le mativa o le matua’i leai lava o se meaai. Ae o Samoa o lo’o tele talo, fa’i, ‘ulu, figota mai le sami e fai ai tausiga a aiga ma le tele ma le anoanoa’i o mea e maua i laufanua o Samoa.”

By Vatapuia Maiava ma Sarafina Sanerivi 26 September 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>