Ia taunuu lau miti

by Theresa Meaole 


Ua togo malama o le taeao fou,

Sauni folau foi i le vasa sousou.

O le upu moni e le faigofie le faigamalaga,

E iai foi peau lagavale o le vasa.

E iai le maatui ma le maanao,

Taumafai ia aua nei taunuu la ta miti mo a taeao.

Tele ni isi o miti ua le faataunuuina,

Faamoemoega ua valetuulima.

Ua le tau lau o le faamoemoe,

Ae manumalo ai le fili ma le tiapolo le moe.

Ua saoasaoa le tuinanau,

Le aafiaga tele lea i ni isi o fanau.

O ni isi o miti ua faaiu i le toese,

Ua leai se faautauta ao se faaeteete.

ADVERTISEMENT

Ni isi miti ua le taunuu le toto masaa lona mafuaaga,

Pe leo feeseeseaiga ea le afuaga.

Ua tuu ai maa ae maa i aau,

Ia aafia le lumanai o fanau.

Tupulaga o le faamanatu mo tatou uma,

So ta ai ia tuli i luma.

Tele ni au tuli miti ua faatamala,

Ua aunoa ma le Atua e taitai malaga.

Manatu i le poto ma le malosi,

Ae galo ai o le taunuuga o le oti.

Ia faamaoni ma faamalolosi,

Aua le fiugofie aua le losilosi.

Na taunuu ia Keriso le miti a lona tama,

Agasala a le tagata ia faamama.

Aua nei galo le aiaiuliga a matua,

E tau manuia miti e tuli faatasi ma le Atua.

 



ADVERTISEMENT

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?