1. Matauina i Tala Fou fai mai e To’avalu ni tamaiti a’oga ua moilia i le Tulafono ona o le faatupu vevesi i nofoaga faitele- e ui ina tele ni taumafaiga lelei na faatino i aso ua mavae e Pule o ia a’oga, e fo’ia ai lea mataupu.

O le taunuuga la fai mai e to’avalu ni tamaiti a’oga mai Leifiifi ma le Kolisi o Avele ua molia i le Tulafono ona o lea itu!. O lenei la faafitauli-e le o se mea lea faatoa tupu mai-ae o le mea ua leva ona fai e tamaitai a’oga.

O le fesili la-afai ua mae’a ona teuteu lea tulaga e pule a’oga o ia a’oga ae o lea foi ua toe tula’i mai-o lona uiga la- e mafua nei mea uma ona o le ese o le upu e fai mai luma-ae ese le upu e fai i tua! Ana faapea la e tausisi ia pule a’oga i ia upu-ailoga e toe tulai mai lenei faafitauli? O le a la le pogai ua o ai nei tamaiti faatupu nei vevesi i ia nofoaga faitele?

O le tali-e leai se fuafuaga ua faia ina ia mautinoa ai ua titina lea mea mataga o le misa i nofoaga faitele. A tuu la i le ‘auga o lenei mataupu-o le fesili la e tulai mai-“Na outou o atu e fai ni fusuaga i nofoaga faitele pe na o atu e o i le a’oga? O le tali-na outou o atu e o i le a’oga ina ia maua ai le poto ma manuia I le lumana’i! Afai la o nei misa e tupuga mai le Maketi o o loo faatali pasi ai nei tamaiti mo le toe fo’i atu i aiga-e mafua ona o le tasi o le nofoaga e faatali pasi ai nei tamaiti uma mai Sasa’e ma Sisifo!

O le uiga la o se manatu faa-faufautua o lea e tau faailoa atu-talu ai ona pau lava lenei o le faiga e mafai ai ona fofo lenei faafitauli! O le a lea? O le faata’ita’iga e faapea- e tatau ona lua ni nofoaga- e faatali pasi ai tamaiti mo le toe foi atu i aiga!

Afai o tamaiti e o i Sasa’e-sailia se nofoaga i le itu i Sasa’e o le Taulaga –a tuua Aoga i aso uma-ona o lea i ai o tamaitai mai Sasa’e e faatali ai a latou pasi mo le toe foi atu i aiga! Mo tamaiti e malaga i Sisifo, faaaoga e i latou le nofoaga faatali pasi o loo i ai nei-e pu’e ai le pasi e o ai i o latou aiga! E tatau foi ona i ai ma ni Leoleo e faafoeina lea tulaga-ona le toe tulai mai lea o lea faafitauli i le lumana’i! O le a sou taofi? 

2. Matauina i Tala Fou se ulutala fai mai o loo tatali pea se faaiuga e uiga i le vaevaeina o le Itumalo o Safata ma e faapea ole faiuga o Mati poo le masino fou o le a maua ai se tonu mo lea tulaga. O le faaaliga la a le Faamasino o Lesatele –fai mai o le matafaioi a le Resitala o Faamasinoga o le talia lea o talosaga e tuuina atu ae le o ia te ia se pule e toe Iloilo ai se talosaga talu ai- o le matafaioi lena a le Faamasinoga.

O le Loia la o Maiava Visikota Peteru, o loo fai ma sui o le itu tete’e lona tolu –o Paepae Tuia. Anapu Aialii. Sa talosagaina e Afemata Apelu le aveeseina o le itu tete’e lona tolu-talu ai le latou finauga e faapea o le Tulafono na pasia e le Palemene ia Mati 2015-ua vaevaeina ai le Itumalo o Safata i Sasa’e ma Safata I Sisifo-talu ai ona o lea vaevaega e le o faavaeina I luga o tuaoi faavae poo tuaoi masani o Safata.

O lea la vaevaega ua afaina ai tu ma aganuu a le itumalo o Safata. E tusa ai la ma le finagalo o le Faamasino-fai mai a ia-o le tulafono fai mai e na o le tasi le sui usufono o le Palemene-o le a filifilia mai nuu e pei o Vaie’e e tau I Saanapu ma le isi sui e toatasi o le Palemene o le a filifilia mai nuu o Fusi e tau I Mulivai. E le o vaevaeina e lea Tulafono tuaoi faavae o le Itumalo o Safata…! Ia-o finagalo faaalia na e tusa ai ma le Tulafono na pasi talu ai nei e le Palemene-ae o le fesili lava-aisea ua aafia ai itumalo talu ai nei mea o faiga-palota?

Aisea ua le mafai ai ona tausisia tulaga masani o itumalo ma nuu ona o nei mea o faiga-palota! Ana tuu pea I le faiga masani sa sau a’i o le filifili lea e le itumalo o ona lava sui-semanuia e le lotelotea measino a le atunuu ma ona faavae popo!

O lea la ua tatou tilotilo tonu lava I le ata moni ma le mata’utia o nei mea o faigamalo faa-Vaega! O polokiki faa-Vaega-e le popole i le afaina o se mea-leaga e tasi lava lona sini-o le manumalo-tusa lava pe aafia ai tagata o le atunuu ma latou aia tatau! O le a sou taofi?  

3. Matauina i Tala Fou le uiga ese o taumafaiga a ‘au-lakapi ta’ito’afitu mai Savai i le Tauvaga o le Taito’afitu talu ai nei a le Malisi Sagato Iosefo. O le manaia-o lea ua matua talitonu lava le atunuu-e matua to’atele tupulaga mai Savaii e agavaa mo le Manu Samoa Sefululima ma le Manu Samoa Ta’ito’afitu.

Afai e le’i leva tele ona taunuu le Lakapi i Savaii a’e o lea ua matua uiga ese ma mata’utia taleni o loo i Savaii-o le manatu la e fia faaali atu- e faitau afe ma afe tama taalo e mafai ona maua mai Savaii e toe faaleleia ai le tulaga o le Manu Samoa 15 ma le Manu Samoa Ta’ito’afitu!

O le mea lea e tatau ai ona matua una’ia le lakapi i Savaii ma Upolu ma ia tofu avanoa i latou upu I soo se tauvaga.Tatou te le toe tilotilo foi  fafo mo nisi tama taalo-ae mafai lava ona maua tama lelei uma ma le malolosi i Samoa nei e faatinoina lo tatou faamoemoe.

O tama taalo uma nei e tatau ona faalatalata mai mo a tatou ‘au lakapi-ma e tatau ona matua tapenapena ma sauniuni i taimi uma mo lea faamoemoe. Ia manatua foi a lelei le lakapi iinei e mafai ai ona maua se konekarate mai fafo ona maua ai lea o le lumana’i manuia mo le aiga ma le fanau i le lumana’i! O le a sou taofi? 

4. Matauina  i le Televise le faalauiloa aloa’ia o sui tauva o se tasi o Vaega Faa-Upufai. O le matau la i lea faalauiloa –o nisi o sui faatutu sa auai ae o nisi o sui faatutu fou sa le mafai ona auai! O le mea la e ofo ai-afai o le faalauiloa lea mo le latou vaega atoa-sa tatau lava ona i ai! O le a la le matau mai a tagata palota o lona itumalo? Oi-e fai mai e fia alu i le Palota ae o lenei e le o auai I le faalauiloa a lana Pati.

O le a le mea o le a te’i ai lava ua fefe ae le’i pa se fana?

Sa tatau  ona matua tulai mai e aumai sona finagalo ia Samoa ma faailoa mai mataupu ua na ave I ai le faamuamua pe a manuia lana taumafaiga! Ia afai ua le mafai ona auai ona o le fefe o le la e matamata mai le isi vaega-ia atonu e mafua mai le faalotoloto-lua ma le tele o tautoga ua uma ona fai i le isi sui faatu, ae o lea o le a tete’i nei i le vaai mai o lea ua e tu atu e avea ma sui faatutu mo le isi vaega? O le a sou taofi?