O le Fonotaga Fa’aleTausaga Lona 39 a le Asosi o Faletupe mo Atina’e mo Asia ma le Pasefika o lo’o fai mai i Samoa nei, ua le na o se fono-masani i le silasila a le Vaega o lo’o talimalo. 

Latou ia e aofia ai le Fa’alapotopotoga Tau Fale a Samoa, le NPF ma le Faletupe o Atina’e a Samoa. 

Na fa’aalia e le Ofisa Sili o le Fa’alapotopotoga Tau Fale a Samoa, o Mata’utia Rula Levi, o le talimalo ai i lea fonotaga, o se miti lea taunu’u mo latou uma.

“O se lagona fiafia le maua o le avanoa e talimalo ai i se fonotaga taua fa’apea i o tatou laufanua,” o lana fa’aaliga lea. “O se miti ua taunu’u aua, o le avea ai o se sui-‘auai o le Asosi lea, sa naunau lava ia talimalo lo tatou atunu’u i le fono lenei.”

E talitonu Mata’utia, e tele lava fa’amanuiaga ‘ese’ese e mai le fono.

 “O se ‘auala lelei tele lea e fa’ailoa atu ai si o tatou atunu’u i isi vaega o le lalolagi,

“E lamo’imo’i lava si o tatou nei atunu’u pe a fa’atusatusa i isi atunu’u o lo’o ‘auai mai i le fono, e fai lava si tetele o latou laufanua ma to’atele le faitau-aofa’i o tagata, a o se ‘auala lea e fa’ailoa atu ai i le lalolagi, e le taulia le tele ae mafai tele ona tatou fa’atino so’o se mea.” 

E talitonu fo’i Mata’utia, o le amata-mea ai o Samoa i vaega ‘ese’ese nei tau-atina’e i totonu o le Pasefika, ua naunau ai ia saga ‘aumaia ai pea nisi fonotaga i totonu o le Pasefika.   

Peita’i, e le na o Samoa le atunu’u o le Pasefika, ua mua’i talimalo i se fono a le Asosi lea. O le tausaga e 2004 na talimalo ai Fiti i le fono lava lenei.

Na ta’ua fo’i, o le talosaga a Samoa na tu’uina atu i le 2014, ina ia talimalo i le fono lenei, a’o ‘auai atu i le Fono lenei a’o faia i Malaysia. 

“Ae na matua fa’afiafia lava ina ua ta’u mai, ua talia ma fa’amaonia le matou talosaga.” 

“Ua fiafia ai la e talimalo i lenei tausaga, e ui lava i le tele o lu’itau ma tele tapenaga sa faia. E lelei tele le matou Vaega o lo’o fa’afoeina lenei fa’amoemoe ma e momoli ai fo’i le fa’afetai tele i a matou vaega-lagolago.”

 “E taua tele le fono lenei aua ua ‘aumai ai le silia i le selau tagata mai atunu’u ‘ese’ese o le lalolagi i si o tatou atunu’u. O lo’o matou tulimata’ia lava se tasi o mata’upu taua o lo’o feagai nei ma le tele o motu laiti i le Pasefika i Saute. 

“Ua tutu-fa’atasi uma le lalolagi ma lo tatou itulagi e sa’ili ni fofo e una’ia ai atina’e e fa’afetauia ai suiga o le tau.

“Tatou talia ma le agaga fa’afetai ta’utinoga a ta’ita’i le lalolagi na faia i le Fono o le COP21 i Pale i Farani ia Novema 2015. Ua tatou lagolagoina fo’i Fuafuaga a Malo ‘Aufa’atasi mo le 2030, o Atina’e Fa’aauau. O le avea ai o Samoa ma Vaega mo le Fa’atupeina o Atina’e nei, o se vaega taua lea e lagolagoina ai tulaga uma e mo’omia, e fa’amautuina ai se lalolagi mautu ma manuia mo tupulaga fai-mai. 

Na momoli fo’i lana fa’afetai tele i le Ta’ita’ifono ma le Komiti Fa’atonu a le ADFIAP mo le avanoa e talimalo ai Samoa. 

“Fa’afetai tele lava mo le fa’atuatuaga ua tu’uina mai ia, e ala i le talia o le matou talosaga.”

“E momoli atu fo’i fa’amanuiaga ma mo’omo’oga lelei mo outou uma ua fa’atasi mai i si o matou nei atunu’u to’amalie ma matagofie. Ia manuia lava outou taimi i Samoa nei.”