Aua ne’i mapu le fa’atonu – Lea’ana
“Ia o a’u o se tagata fai fa’ato’aga ia ma e nofo lava i Savai’i ma o le taimi lenei o le tulitulimata’i lava o galuega na fa’atino e tua’a ua mavae e manuia ai.” Le’a’ana Fepulea’i, 50 le matua o le soifua o Faleula.
“O a’u o lo’o i’inei e fa’amuli ma va’aia fo’i nisi o le fanau, ma o galuega lava ou te galue ai i Savai’i i si o matou nu’u i Faia’ai a ou sau i’inei ia e fa’atino lava fo’i.
“O le taimi lenei i lo’u maitau atu ia e pei ua solo i tua le tele o tu ma aga na masani mai ai Samoa i aso ua alu.
“E pei la o sa i afiafi , e tatau ona ulufale uma ai tagata uma mo faigalotu, ia ae o nei aso ia ua le toe tele ni afio’aga o lo’o tumau pea i lea faiga.
“O le taimi lenei ua toe laiti lava vaega o le atunu’u o lo’o i ai nei faiga, ae o le maitau atu ai i aso ua mavae e ese le lelei o lea faiga mo aiga.
“Aua fo’i o le taimi o faigalotu afiafi e va’ava’ai ai le tamā o le aiga ma le tinā o le aiga po’o atoa le fanau ma le auaiga.
“A uma le lotu e talatalanoa ma fefa’asoaa’i i galuega e tatau ona fa’atinoina i totonu o le aiga aemaise le fautua o fanua.
Na ia fa’ailoa o le isi lea itu lea ua mafua ai ona tele fa’alavelave ma fusuaga a fanau aoga.
“E pei o suiga o le soifuaga ua tatou i ai nei , ua mafua ai ona le toe fa’atinoina vaega nei, aua ua le ano matua ina taimi lelei mo le aiga.
“Ua tu’u tia’i lava le auaiga ua leai se tala e ave i ai pe fautua ai aua se lelei o tagata uma.
Na ia fa’ailoa o vevesiga o lo’o tele ina maitauina i fanau e mafua mai lava i matua.
“Ia o lea e fa’alogo atu e tele lava ina tu’ua’ia nai faiaoga, e matua’i sese lena tala, o faiaoga latou ia fa’atoā fa’asaga ai le tamaititi i le lima o ona tausaga.
“Ae o le olaga atoa o le tamaititi o ona matua, e fa’afefea la ona fai mai o faiaoga le pogai ae o taimi uma o le ola o matua.
“Ua fa’aletonu, ona o le vaivai o le fa’atonu, vaivai ona fa’atalanoa, ma ua matua’i vaivai lava le leo.
“E pei o lea vaega o le aganu’u o faigalotu afiafi lea ua le toe fa’aauauina ua mafua ai ona tele nisi o itu taua ua misi.
“Aemaise lava mafutaga ma fanau, e fa’asoa atu le matua, ae fa’alogo ma usita’i le tama ma le teine.
“Ae paga lea ua mou atu le taua...o lo’u iloa i ai , ia aua ne’i mapu le fa’atonu.