Filifilia le Loia Sili

24 March 2016, 12:00AM

O lea suiga fou ua filifilia ai nei le Afioga i a Lemalu Hermann Retzlaff ma o le taimi lenei o lo’o ia fa’amoemoe e taliu mai i le atunu’u i le masina o lo’o soso’o ai nei e sui tulaga i le Afioga i a Aumua Ming Leung Wai lea na i ai i le tofi.

I se fa’atalatalanoaga ma le Samoa Observer a’o i ai pea i Niu Sila, sa ia fa’ailoa mai lona agaga maualalo i le tula’i mai ai i lenei tofi ua fa’apea ona tu’uina atu e le malo o Samoa ma le atunu’u atoa i a te ia.

  “E lagona lava le fa’atauva’a ona o le tofiga e pei ona tu’uina mai ai nei” o le saunoaga lea a Lemalu.

 “E le na’o a’u ae o si o matou aiga ona e talitonu e le na’o a’u le tagata na tusi talosaga mo le tofiga ma o se fa’amanuiaga tele  lea e ui ina tele luitau ae o le a fa’amoemoe lava i le Atua e fesoasoani mai.

I le tofia ai i le tulaga lenei, o le a mulimulita’i pea e Lemalu tulaga a’ao o lona tua’a.

O le afioga i a Lemalu na soifua ma tuputupu a’e i totonu o Samoa ma na avea ma Faiaoga Fa’auluulu i le vaega tau i Mataupu Fa’aloia i le Iunivesite Aoao o Samoa mai i le 2001-2004.

“O le toe fo’i mai ai i Samoa e galue ai mai le tele o tausaga o se fiafiaga tele lea i a te a’u lava ia,” o lana tala mai lea.

 “O le ola mai ai i totonu o Samoa o se tasi lea o itu lelei aua ou te talitonu e fai lava si eseese o faiga o lo’o lima ta’ita’iina ai vaega tau Tulafono i atunu’u i fafo ma Samoa.”

E fa’atatau ai i lona tofiga fou e pei ona ua tula’i mai ai nei, sa ia saunoa o le a fa’atinoina uma galuega a le Ofisa o Loia i ona luma. O lana fa’amuamua o le a ave lea i le au faigaluega ‘ma o le fesoasoani mai o le Atua o le a faigofie ai mea uma ma o le a tu’uina atu foi le atoatoa mo vaega uma lava.”

O lo’o ia mata’itu foi le galulue fa’atasi ai lea e pei ona fa’amaoti mai i Faiga Fa’avae o le Malo o Samoa.

O le fa’amoemoega tele lava ia fausia lea o se si’osi’omaga ma ni ta’ita’iga lelei ina ia mafai ai e tagata ona galulue fe’oe’oe’a’i i so o se taimi lava.

O lo’o i ai le fa’amoemoe e amatalia le fa’atinoina o ana galuega i le aso 18 Aperila 2016.

24 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>