Ua faaupuina fanau o i latou o tofi mai i le Atua aua o meaalofa uma ia na foaiina mai e le Atua mo matua ina ia tausi ma faapelepele iai aua so latou manuia.

O mo’omo’oga ia o le tama ia Iosefo Alo, 59-tausaga le matua mai le afioaga o Falefa ma Satapuala. O ia o se kamuta ma o lo’o galue ne ii le galuega o lo’o feagai ai nei ma le EFKS i Malua.

O le vaai mamao a le tama ina maua ni galuega lelei a lana fanau aua so latou lumanai manuia.

“Toavalu la’u fanau, to’afa o lo’o ao’oga ma le toalua o lo’o faigaluega ma le toa laity o lo’o nofo i le fale ma le tina o le aiga, ua ou matua ae o la’u galuega i aso uma o lo’u mafaufau ina ia maua e la’u fanau se taunuuga lelei mo le lumanai.

“O miti ia a so’o se matua mo a latou fanau ina ia lelei, e faapena foi la’u miti.

I le mau a le tama e moni lava ua faigata nei aso pe a fua atu ia ia ua matua ae e le nofo a’i ai aua e vaai alofa lava i lana fanau.

“Out e faamuamuaina lava la’u fanau e moni lava e toatele ae o le mea e faamuamua o lo latou ola ina ia manuia mo le lumanai.

Faimai le tama, o le olaga ua iai nei e o faatasi lava ma suiga ma luitau ae po o le a le tele o ia mea ia manatua lava fanau ia faamuamua.

“E fou nei tulaga i nei aso i le olaga ua lau i luma ma vave ae o le alofa moni lava i fanau ma tausi tusa lava po o le a le taugata o le soifuaga ua iai nei.

“E lava ma totoe le tupe maua aua a lelei ona faasoa e iloa foi e fanau i le lumanai ona ola faasoa ma ola alofa i o latou lava aiga.