Galue malosi mo le manuia o aiga

By Vatapuia Maiava ma Sarafina Sanerivi 12 November 2016, 12:00AM

O le tamā ia Pa’iatea Teofilo, o se matai 62 tausaga mai le alalafaga o Tufulele. 

O lona finagalo, o lo’o sologa lelei lava le olaga i Samoa. 

Peita’i, na ta’ua e Pa’iatea, e iai lava nai fa’afitauli laity o lo’o fa’afeagai lea ma le afioaga o Tufulele. 

“E manaia lava le olaga i le vaitau lenei. Na pau lava le fa’afitauli o lo’o feagai ai pea ma si o matou nu’u o le tulaga lea i le auala. 

“E le’o lelei le auala galue mo nai aiga o lo’o iai ma’umaga i le pitonu’u i uta o le nu’u. E o’o foi i le tulaga i le suavai, e le’o au atu i uta le suavai. 

“O le tulaga foi i auala femalagai ai, e iai pasi, ae seāseā lava ona o’o mai i uta ni pasi ona e alolofa fai i nai pasi ona o le leaga o le auala.

“E tele lava la ina savavali i uta e fai galuega i ma’umaga.”

Na ia ta’ua foi, ua ma’ea foi ona talanoaina le tulaga i le toe fa’aleleia ai o auala. 

“E talanoaina lava i fono a le nu’u le mo’omia o le toe fa’aleleia o le auala.”

Peita’i e le’o avea lea ma ala e taofia ai le tamā ia Pa’iatea mai le aga’i atu ai i le ma’umaga e galue ai auā le tausiga o lona aiga. 

“O fa’atoaga lava o lo’o fa’amoemoe iai le ola o le to’atele o tagata o le matou nu’u. Ua masani foi la le to’atele i le ola galulue ma savavali i uta i le ma’umaga.

“E mo’i lava e le faigofie, ae e galue malosi auā a le taumafai lava le tagata, o le a le maua se manuia mo fanau aemaise o le aiga. 

“E faigofie lava mea uma pe a mafaufau i le taimi e selesele ai. E aoga uma lava le tigaina pe a ona ina aai lelei le aiga ma le fanau. 

“O le malosi alu aoga, aua o nei aso, a le galue lava le tagata ia, e leai se mea lelei a le aiga e maua. 

“O le faifa’ato’aga foi e le’o se mea faigofie. E fetaui ma le fesuisuia’i o le tau aemaise o le leaga o le auala e alu ai i uta o le ma’umaga. 

“Ae o le mea lava e tatau ona fai, ina ia maua se mea e aai ai aiga ma fanau. O le telē ia o le fesoasoani a le ma’umaga mo si o matou aiga. 

“O le ala foi lea e le fa’avaivaia ai lo’u tagata ina ia fa’amaoni le faiga o le ma’umaga. E masani foi ona ave fa’atau i le maketi e maua ai foi se seleni e fesoasoani i mea e fai i totonu o le aiga.”

By Vatapuia Maiava ma Sarafina Sanerivi 12 November 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>