Fa’ate’ia le Palemia i le to’ulu o ana Minisita

14 March 2016, 12:00AM

Ripotia e Lanuola Tusani Tupufia

Fa’aliliu e Maiava 

 

Na fa’aalia e le Ali’i Palemia, Tuila’epa Sa’ilele Malielegaoi lona fa’ate’ia i le faia’ina ai o Minisita e to’alima o le Kapeneta ina ua mae’a Faiga Palota Lautele a le atunu’u.

I lana polokalame masani ma le 2AP, na fa’aalia ai e Tuila’epa, atonu o le fesuia’iga o tua’oi o nisi o itumalo, ua mafua ai le to’ulu o nisi o latou nei.

“Na fa’ate’ia lava a’u, ae maise i vaega nei sa toe fesuia’i o latou tua’oi,” o lana saunoaga lea.

“I tausaga ua mavae, sa ta’ilua palota a nisi o itumalo ma ua suia nei, e tasi a le palota a le tagata.

“O le mea na tupu i aso la, sa le fa’aaogaina le isi palota a isi tagata.”

O saunoaga ia a le Palemia ina ua mae’a ona fa’alauiloa fa’ai’uga aloa’ia o faiga-palota. 

 

O nisi o Minisita o le Kapeneta ua le toe pa’au mai, e aofia ai:

• Le Minisita o Tina ma Tama’ita’i, Atina’e o Nu’u ma Agafeso’ota’i, o Tolofuaivalelei Falemoe Leiataua

• Le Minisita o Puna’oa Fa’aleNatura ma le Si’osi’omaga, Fa’amoetauloa Dr. FaaleTumalii

• Le Minisita o Galuega, Fela’ua’iga ma Galuega Tetele, o Manualesagalala Enokati Posala

• Le Minisita o A’oga, Ta’aloga ma Aganu’u, Magele Mauiliu Magele, ma 

• le Minisita o Feso’ota’iga ma Fa’amatalaga Fa’aTekonolosi, o Tuisugaletaua Sofara Aveau.

Pe’ita’e le’i fa’ate’ia Tuila’epa i le fa’ai’uga o le palota a Safata i Sisifo, lea ua pa’u ai le ta’ita’i o le Vaega a le Tautua, o Palusalue Fa’apo II.

Na ‘ata’ata le Ali’i Palemia i le palota lea ma fa’apea ai, ua toe fa’amanatu ai le tala ua silafia uma.

“Le tala i le fetauiga a Tavita ma Koliata, ae uma ane ua malo Sakalia,” o lana saunoaga lea ma ‘ata’ata, e fa’asino i le faipule fou lea ua tulolo uma ai Palu ma lana Minisita o Manu’a.

14 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>