Taugatā o le soifuaga o se fa’afitauli i totonu o Samoa
O Amusia La’ulu mai le alalafaga o Vaitele-fou o se tinā e 57 ona tausaga. O le tamā o le aiga ia Sivauila La’ulu o lo’o faigaluega i Amerika Samoa, ae ua na’o Amusia ma ona alo e to’afitu o lo’o alala ma papa’aao nei i Vaitele-fou.
O lona manatu, o le fa’afitauli lava o lo’o feagai ai ma le to’atele o tagata Samoa o le taugata o le soifuaga. “O le mea lava lena o lo’o tapisa ai le to’atele o le taugata o le soifuaga. Ma ou te lagolagoina foi lea manatu.
“O le tau o le soifuga ma oloa ua iai nei ua matua’i taugata lava, ae o le fa’alavelave, o le tele o aiga, e utiuti le fa’asoa ma e le lava se tupe maua.“Auā e mo’omia tupe mo le totogiina o pili o le vai, pili o le molī, ia ma mea’ai a ale aiga, aemaise fo’i o aoga a le fanau.
“Ae a le lava la le fa’asoa ma tupe maua, ia ona tupu ai lea o le fa’alavelave.”Ae peita’i, na fa’aalia mai e Amusia, e mama le avega pe afai e tausoa fa’atasi.
“E pei ona tagataga’i atu, e tolu fale o lo’o iai i totonu o le matou fanua. “O lo’o nonofo ai si a’u fanau ma o latou ta’ito’alua ma fanau fo’i. E fesoasoani la le isi fale i le isi fale aua le tausiga o si o matou aiga.”
Na fa’aalia mai e Amusia, e to’atasi lona alo o lo’o faigaluega i le S.S.F.A, a’o le isi ona alo e faigaluega i le falemasi i Moata’a. O le isi ona alo o lo’o faigaluega o se avepasi ma o tupe maua mai i lana fanau o lo’o faigaluega e fesoasoani tele ile tausiaina o le aiga o Amusia.