Tomai e ola ai

By Fa’aliliu e Maiava 02 May 2016, 12:00AM

Toe Mafaufau tasi lava… E matua ofoofogia lava ma fa’amomoiloto, pe a toe to-manatu, pe na fa’afefea lava ona fa’asaoina tagata Isara’elu mai le fia afe o tausaga sa fa’apologaina ai, na sauaina, pule’esea ma fasiotia fa’atasi e le vaega o le Nazi a Hitila, le 6 miliona o tagata Isala’elu!

O le mafua’aga lena, na avea ai Siamani, o se nofoaga e matua sese lava mo so’o se Isala’elu na soifua i le tausaga e 1934. Na osofa’ia ma pulea e le vaega mata’utia a Hitila, le nu’u o si tamaititi Isala’elu o Heinz, a ua fa’atoa 11 tausaga le matua. 

Na a’oa’i e mātua o Heinz le la fanau, i le tāua o le loto-pulea lelei  Talu ai le tau-fa’afefe o vaega a Siamani i magā-ala o lo latou nu’u, na iloa ai e matua o Heinz, o le taimi lava e le mafai ai loa ona taofiofi le ita i pulega a le Nazi, o lona uiga, ua feoti uma loa lo latou aiga.

Ona taumafai lava lea o Heinz e ‘alo’alo mamao mai fitafita Siamani, o nisi fo’i taimi, e suia ai ‘auala e ui ai mo lona aiga.   

A’o le tasi la aso, na maua ai loa e fitafita a Hitila si ali’i laititi o Heinz. Mo Heinz, o le taimi muamua la lea ua fa’amalosia ai o ia, ina ia talanoa atu i se tamaititi Nazi.

A ona o lona to’amalie, ma le poto i le filifiliga o ana ‘upu e tautala ai, na matua fa’ate’ia ai lava o ia, ina ua mafai ona fa’asa’oloto o ia, e ala i lona talanoa atu, ma ta’aina ai le mafaufau o le fitafita Nazi, e ‘aua nei fasia o ia, ae tu’u loa e alu.

O le aso lava lea, na iloa ai e Heinz, ona agava’a e talanoa atu ai, ma fa’auiga mea e tali atu ai i isi tagata. O se tulaga na avea ma mafuaga o le suiga tele o lona olaga – ae mulimuli ane, suia atoa ai le lalolagi.  

Ua mavae nai tausaga, ae sosola ‘ese loa le aiga o Heinz mai Siamani ae aga’i atu i Amerika. Ae mo le ali’i o Heinz, ua le galo ai lava, lona tomai e talatalanoa ma tagata, ma fesoasoani ina ia maua se filemu i le va o nisi o masesei ma fetaua’i. Silasila fo’i, o le tamaititi 11 tausaga lea sa fa’atalatalanoa lona mana’o mo se filemu ma le Ali’i Nazi o Siamani, sa avea o se tasi o amepasa ta’uta’ua mo le filemu o le lalolagi. Masalo ua e fa’afofoga ia te ia… e le o Heinz la… a’o lona suafa Amerika: Henry Kissinger, lea sa avea o le Failautusi o le Malo o Amerika. Toe mafaufau tasi lava…

By Fa’aliliu e Maiava 02 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>