Telē le ese’esega o le olaga i le taulaga ma nu’u i tua

By Sarafina Sanerivi 23 September 2016, 12:00AM

O le fa’atuputupula’ia o le tele o fa’afitauli e tutupu mai i le taulaga, ua avea lea ma ala ua manatu ai nisi o lo’o aumau nei i le taulaga, e sili atu ai le olaga i nu’u i tua.

O le tamā ia Lautalie Maepu mai le afioaga o Vaitele-Uta, ua 58 nei ona tausaga. 

Ina ua afea e le Fofoga o Samoa i le aso ananafi mo sona finagalo i le tulaga o lo’o iai le soifuaga i Samoa i lana fo’i ia maitau, na ia fa’apea mai ai, ua sili atu i lana va’ai le olaga i nu’u i tua.

Aisea?

“E telē lava le eseesega o le olaga i nu’u i tua ma le olaga i le taulaga,” o le fa’aaliga lea a Lautalie. 

“O le olaga i nu’u i tua, o lo’o ua iai lava fanua o aiga e galulue ai ma fai ai a latou fa’atoaga. E mo’i e iai fanua iinei, ae na’o le mea lava e tu ai le fale o lo’o lava i fanua. 

“O le isi fo’i mea, o iinei, a le faigaluega le tagata, e le maua se mea e tausi ai aiga ma fanau. E le pei o nu’u i tua, e iai fanua ia ma le sami e fa’amoemoe iai le tausiga o le aiga. Auā e mafai ona fai fa’atoaga mo mea’ai ia ma fa’atau fo’i.”

O le isi tulaga na ia fa’ailoa mai o lo’o fai ma fa’afitauli i le olaga o tagata Samoa, o le taugata lea o le soifuaga i Samoa. 

“Ua faigata lava ma taugata le soifuaga o Samoa ua iai nei.

“E atili la ona faigata pe afai e le iai sau galuega. O le taimi nei, out e le’o faigaluega fo’i ma e fa’alagolago si matou aiga i le tupe e maua mai i le tagata faigaluega e to’atasi.”

E le gata i lea, na fa’aalia mai e Lautalie, a fa’apa’ū le tau o le soifuaga, o le faigofie fo’i le olaga o tagata Samoa ma lava le fa’asoa a aiga ta’itasi. 

Na ia fa’ailoa mai fo’i o le isi fa’afitauli o lo’o feagai pea ma nu’u o lo’o iai i le taulaga, o le leai lea o ni faiganu’u mamalu. 

“O le tele o aso, e pisapisaō lava onanā i luma o fale o aiga i le leva o po ma fa’amisa solo. Auā e le pei o nu’u i tua e fai sā ma tapu a nu’u. 

“O le eseesega tele lava lena ole aumau ai i le taulaga ma nu’u i tua.

“Ma ia te au lava ia, ua tatau lava ona tagataga’i iai le malo po’o faipule fo’i i lea tulaga, aua e le’o se aga po’o se amio e manaia ise vaai.

By Sarafina Sanerivi 23 September 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>