O mo’omo’oga o matua uma ina ia manuia le fanau. Ma e eseese lava auala ua faia e nisi o tagata e tali atu ai i le soifuaga ua iai nei. Ma e tusa lava pe taugata pe tele mea fai ae e faamuamua lava le fanau.

Ma o le manaoga foi lea o le tina ia Faatuai Poloai ina ia iu ma le manuia le taumafaiga a lana fanau aua so latou lumanai manuia.

“E leai seisi o le aiga nei e faigaluega e o’o lava i le tama o le aiga pau le tulaga o lo’o faamoemoe iai ua na’o le toga-koko ma le faatoaga aua le fafagaina o le aiga nei” o lana tala mai lea i le Fofoga o Samoa.

“E le natia lava le toatele o le fanau , e to’a sefulu-tasi, na’o le toafa o lo’o ao’oga i le taimi nei ao leisi vaega o lo’o i le fale fesoasoani i le tama i le faatoaga.

I le maua le tina, e moni lava ua tele suiga o lenei vaitaimi ae o le galue lava ma tausi fanau tusa lava po o le a le taugata i fea.

“Ua maualuga foi le tau o le soifuaga latou ia i siitaga nei ua faia e le Malo i le tau o oloa ma nisi otulaga faapena, e moni lava ua iai ni suiga ae o le olaga lava ia e faapena.

E talitonu Faatuai e omai faatasi lava suiga ma luitau o le olaga, ma e le mafia ona ‘aloese mai ai, ua masani ai lava.

“Ua masani ai lava le atunuu ii a tulaga uma e oo foi i mea fai i totonu o aiga ma nuu o le tele o tupe  alu, ae a malolosi a matua mo fanau e ala lea i le saili o galuega ma auala e maua ai le tupe e faapena foi ona manuia fanau.

Pau le naunautaiga o le tina ina ia vave maua sana galuega aua le fesoasoani a ii le tausiga o lana fanau ma lona aiga.

“O le galuega lava ua iai faafetai pau le tulaga e manao ai ina ia maua sina seleni aua le tausiga o fanau mo le latou lumanai manuia.