Ua taugata tele le soifuaga
O le to’atele o tagata ua talanoa le tuagata le soifuaga.
O nisi lava o tagata ua le gafatia le tau o le falaoa ma ua le mafai lava ona maua se $2 mo le falaoa.
“Ua lava lea le faigata o le olaga ae a fa’aopopo ai ma le taugata le soifuaga ua atili ai le faigata le soifuaga,” le manatu o Niupoponepo Fualau I le fa’atalatalanoaga ma le Fofoga o Samoa.
Ae peita’i, na ia fa’ailoa mai fo’i, ua le toe tutusa lava nei aso.
“Ua le pei o la aso sa telē lava se seleni e maua mai pe a maea ona fa’atauina oloa uma.
“Ai ona ua tele le mau pisinisi laiti aemaise o i latou ua fa’atau a latou fuala’au’aina ma isi meataulima i tafatafa o auala, ai o le mafuaaga lea.
“O le ala foi lea ua ou fai atu ai, ua le toe tutusa lava nei aso pe a fa’atusatusa atu i aso ua mavae.
“Ua tele foi ina taugata le soifuaga i lenei vaitau.”
“O lo’u le fiafia o le faigata le soifuaga ae ua alu alu foi luma le taugata o oloa.
Ae peita’i na fa’ailoa mai e Niu o le metotia lava o lo’o faia e lona aiga e fa’aitiitia ai le tulaga lea o le taugata o le tau o oloa, o le faia lea o a latou fa’atau i le amataga o le vaiaso auā le vaiaso atoa.
“E taugata pe’a fa’atau ta’itasi. A’e telē lava le sefe pe a fa’atau atoatoa maim ea mai le faleoloa ona fa’asoasoa loa lea mo le vaiaso atoa.”
Na fa’aalia mai foi e le ali’i, e le’o iai se mativa i Samoa.
Na ia ta’ua, o lo’o tele ma anoanoa’i fa’amanuiaga a le Atua mo Samoa.
“E mafua lava ona mativa le tagata o lona le gaioi. E fesoasoani mai le Atua i le tagata o lo’o tu’itu’i atu pea ia te ia ma aioi atu ae o lo’o fai fo’i lana galuega e atina’e ai lona aiga.
“O a’upega na e lua e maua ai manuia o aiga. O le tatalo ma le galue malosi.
“E leai lava se isi e atoatoa. Ma ua tatou iai foi i le vaitau ua faigata ai le olaga. Na pau lava le mea e fai o le galue ma fa’alagolago i le Ali’i auā o ia e ou le malosi ma le mana uma lava.”