Aloa’ia le ‘au-pa’u’ū ma le anoano o le ‘au-ususū

By Maiava 12 March 2016, 12:00AM

 

Lea ua ‘aumai fa’ai’uga aloa’ia o faiga-palota sa alo iai le atunu’u.

Ma e to’alima Minisita o le Kapeneta ua fa’amaonia le tu’ua o nofoa o le Palemene, ina ua mae’a Faiga Palota Tele i le Aso Faraile talu ai, e aofia ai: 

• Le Minisita o le Matagaluega mo Tina ma Tama’ita’i, Atina’e o Nu’u ma Agafeso’ota’i, o Tolofuaivalelei Falemoe Leiataua

• Le Minisita o le Matagaluega mo Puna’oa Fa’aleNatura ma le Si’osi’omaga,  Fa’amoetauloa Dr. Faale Tumalii

• Le Minisita o Galuega, Fela’uaa’iga ma Galuega Tetele, o Manualesagalala Enokati Posala

• Le Minisita o A’oga, Ta’aloga ma Aganu’u, o Magele Mauiliu Magele, ma le 

• Minisita o Feso’ota’iga ma Fa’amatalaga Fa’aTekonolosi, o  Tuisugaletaua Sofara Aveau.

O le i’uga o Minisita ia o le Kapeneta, na fa’amaonia mai ananafi ina ua tu’uina mai le fa’ai’uga aloa’ia e le Sui Komesina o Faiga Palota, o Faimalomatumua Mathew Lemisio, i se fa’aaliga fa’alaua’itele e fa’apea: 

“Ua ‘ou tu’uina atu nei le fa’aaliga fa’alaua’itele e fa’ailoa ai fa’ai’uga o Faiga Palota Tele na faia i le Aso 04 o Mati 2016, e filifilia ai Sui Usufono o le Palemene mo itumalo uma.” 

Silasila i le itulau e 4 ma le 5 o le lomiga fa’aPeretania.

I lea lava fa’aaliga, ua fa’amaonia ai fo’i, le Sui Lona 50 o le Palemene, ua fa’amauina nei i tala-fa’asolopito o le Malo Tuto’atasi o Samoa. 

O le afioga lea a Fa’aulusau Rosa Duffy-Stowers, na aupito maualuga pasene o ana palota na maua, mai sui-tauva tama’ita’i uma sa tausinio. Ua avea ai o ia ma ulua’i faipule ua ulufale i le Palemene, i lalo o teuteuga o le Fa’avae, lea e mo’omia ai le iai o sui-tama’ita’i, e le i lalo ifo o le to’alima. 

Ae toe fo’i atu la i i’uga o faiga-palota, o le vaega sa aupito tele iai talanoaga, o le to’atele lea o Minisita o le Kapeneta ua pusi-nofo ua le toe fo’i mai, ae maise la le to’atele o sui fou ua filifilia nei.   

O le 27 o sui fou o le Palemene – ‘ese mai ai ‘Olo Fiti Va’ai lea ua tula’i mai i se itumalo fou – e 54 lava pasene o le Maota Fono, o sui faipule fou. 

O le to’atasi o lea numera, o le sui o le Vaega a le Tautua, o ‘Ili Ta’ateo Tafili, lea na ta’oto ai Tolofuaivalelei i le itumalo o A’ana Alofi Numera 2. O le i’uga o lena palota, e matua mamao lava palota a ‘Ili – e 878 i le 600 a Tolofua.

O le isi sui fou, o Nafo’itoa Talaimanu Keti mai Gaga’emauga Nu.3, lea ua malemo ai Fa’amoetauloa.  E 838 palota na maua e le sa avea ma Sui Komesina o Leoleo, i le 746 a Fa’amoetauloa.   

I le Itumalo o Safata i Sisifo, lea ua aloa’ia le manumalo o Lea’ana Ronnie Posini, ua taufai fa’atatafa ai Manu’alesagalala ma le ta’ita’i o le Tautua, o Palusalue Fa’apo II.  E 1020 palota a Lea’ana, 709 mo Palu ae 675 palota na maua e Manu’a.

I Fa’asaleleaga Nu.1, atonu o le fesuia’iga o tua’oi o le itumalo ua afaina ai le Afioga a Magele, lea sa finau ma Gatoloaifa’ana Amataga Gidlow lea ua toe manumalo mai, i palota e 893 na ‘ausia. 

O le Minisita lona lima ua tu’ua nei le maota, o Tuisugaletaua, lea na faia’ina ia Sulamanaia Tau’ili’ili Tuivasa i le palota a Vaimauga i Sasa’e.

Ua fa’amaonia mai fo’i le fa’ai’uga o le finauga sa to’atele le atunu’u na fa’atalia, i le va lea o Sili Epa Tuioti ma Pauli Ivan Williams i Fa’asaleleaga Nu.1 i Sasa’e. E na o le ono lava palota e malo ai Sili.

I Falealili i Sisifo, e ese mai fa’ai’uga sa fa’asalalau ina ua mae’a le faitauga muamua, o lea ua se’e atu nei Aumua Isaia Lameko e fa’aauau le galuega sa faia e lona tua’a i le Palemene, ina ua manumalo i le Minisita Lagolago o Tusa Misi Tupuola. E 744 palota na malo ai Aumua.

Lea la ua mae’a ona fa’alauiloa o fa’ai’uga aloa’ia o faiga-palota a le atunu’u, a ua matala nei fo’i ma le faitoto’a o le Vaega o Fa’amasinoga mo moliaga, o talosaga ma faitioga e afua mai i faiga-palota ua mae’a atu.

O le Aso Faraile o le vaiaso fou, ua fuafua mo le ulua’i fonotaga a le Palemene, lea o le a fa’atautoina ai sui-fou uma ma sui-tuai ua toe filifilia. 

By Maiava 12 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>